ટેક્નોલોજી / મોબાઇલના વધુ પડતા ઉપયોગથી માથામાં ઉગી રહ્યા છે શિંગડા! જાણો શું છે કારણ

હવે એક નવા સંશોધનમાં એવી ચોંકાવનારી બાબત સામે આવી છે કે મોબાઇલના એડિકશનથી એટલે કે કલાકો સુધી મોબાઇલનો યુઝ કરવાથી યુવા લોકોના ખોપડી (સ્કલ)ના સ્ટ્રકચરમાં ફેરફાર થાય છે. સંશોધકો કહે છે કે મોબાઇલ એડિકટ યુવાઓમાં ખોપડીના પાછળના ભાગમાં શિંગડા જેવું નાનું હાડકું વિકસિત થાય છે. 

ઓસ્ટ્રેલિયાના કવીન્સલેન્ડની સનશાઇન કોસ્ટ યુનિવર્સિટીમાં થયેલા એક સંશોધનમાં 18થી 30 વર્ષની વયના લોકોના એકસરે લીધા હતા. જે પૈકીના 41 ટકામાં ખોપડીના પાછળના ભાગમાં 10થી 30 મિલિમીટરનું હાડકુ વિકસિત થયાનું જણાયું હતું, આ લોકોના એમઆરઆઇ, બ્લડ ટેસ્ટ સહિતના ટેસ્ટ કરાયા હતા તેમાં સાફ જણાયું હતું કે કોઇ જિનેટીક કે અન્ય ખામીના કારણે હાડકુ વિકસ્યું ન હતું. 

સંશોધકો કહે છે કે એન્થેસોફાયટ્સ તરીકે ઓળખાતું આ પ્રકારનું હાડકુ સામાન્ય રીતે મોટી ઉંમરના લોકોમાં જોવા મળે છે જેમનું પોશ્ચર યોગ્ય હોતું નથી. ખોપડી પર વધુ પડતું સ્ટ્રેસ આવે તેના રિસ્પોન્સમાં આવું હાડકુ વિકસિત થાય છે. માથુ નીચે ઢાળીને કલાકો સુધી મોબાઇલ ફોન યુઝ કરવાથી આ સમસ્યા થાય છે. તેનાથી ખોપડીનો નીચેનો ભાગ સતત દબાણ અનુભવે છે. 

આ રીતે માથાનું વજન આપણી કરોડરજજુના હાડકાના બદલે ગરદન પાછળના સ્નાયુઓ પર આવે છે. જોકે નિષ્ણાતો કહે છે કે આ બાબત એટલી ગંભીર નથી પરંતુ ખરાબ પોશ્ચરની નિશાની છે અને તેનાથી ભવિષ્યમાં દુખાવાની સમસ્યા થઇ શકે છે.