અમદાવાદઃ શહેરમાં લાગે છે કે હવે લુખ્ખા તત્વોનો ત્રાસ દિવસેને દિવસે વધી રહ્યો છે. અસામાજિક તત્વો હવે ખુલ્લેઆમ વેપારીઓ પાસે હપ્તાઓ ઉઘરાવી રહ્યાં છે. આ તત્વો રિવોલ્વર લઈને ખુલ્લેઆમ હપ્તાઓ ઉઘરાવી રહ્યાં છે અને પોલીસ પણ મૂંગા મોઢે તમાશો જોઈ રહી છે.
અમદાવાદનાં નિકોલમાં આવેલા ઉત્તમનગરમાં ખુલ્લેઆમ દાદાગીરીથી હથિયાર સહિત વેપારીઓ પાસેથી રૂપિયા ઉધરાવતા હોય તેવાં સીસીટીવીનાં ફુટેજ પણ પોલીસે કબ્જે કર્યા છે. ઠક્કર પરિવાર પાસેથી ઝેરીબાપુ નામનો વ્યક્તિ ખુલ્લેઆમ ધાક ધમકીથી વેપારીઓ પાસેથી રૂપિયા ઉધરાવે છે.
આવા આવારા ગુંડાગર્દી કરનારા તત્વો મહિલાઓની છેડતી પણ કરી રહ્યાં છે. ઝેરીબાપુનો ત્રાસ આ વિસ્તારમાં દિવસે ને દિવસે વધી રહ્યો છે પરંતુ પોલીસ મુકબધિર બનીને આ બધું જોઇ રહી છે. જો કે આ ઘટનાથી સ્થાનિકોમાં ઉગ્ર રોષ જોવાં મળી રહ્યો છે.
મહત્વનું છે કે પોલીસે જે સીસીટીવી કબ્જે કર્યા છે તેમાં ખુલ્લેઆમ એક વ્યક્તિ સિનિયર સીટીઝનને હથિયાર દેખાડી રહ્યો છે. હથિયાર દેખાડ્યાં બાદ તે અસામાજિક તત્વો ખુલ્લેઆમ પૈસા લઇ રહ્યાં છે અને આટલે સુધી ના અટકતા તે ગંદી ગાળો પણ આપી રહ્યો છે. આ ઘટના એ અમદાવાદનાં નિકોલની છે.
નિકોલનાં ઉત્તમનગરમાં દુકાન ચલાવતા ઠક્કર પરિવારને વારંવાર ઝેરીબાપુ નામનો વ્યક્તિ પૈસા માંગી રહ્યો હતો. પૈસા ના આપતા અંતે ઘરે પહોંચીને ઉઘરાણી કરી લીધી અને ધંધો કરવો હોય તો પૈસા આપવા જ પડશે તેવી ધમકી પણ આપી હતી.