ઑટોમોબાઇલ / દુનિયામાં સૌથી વધુ ડિમાન્ડ છે આ કારની, મળે છે માત્ર 3 લાખમાં

• ઇલેક્ટ્રિક કાર સેગમેન્ટમાં પણ ચીનનો પ્રવેશ
• ટેસ્લાની કારને ટક્કર આપી રહી છે ચીનની મિની કાર 
• એક જ ચાર્જમાં 170 કિમીની આપે છે રેન્જ

આમ તો ઇલેક્ટ્રિક કારની જ્યારે પણ વાત આવે ત્યારે એલોન મસ્કની કંપની ટેસ્લાનું નામ સૌથી વધુ લેવામાં આવે છે, પણ હવે લાગે છે કે આ કંપનીની બાદશાહતને કોઈ ટક્કર આપવા માટે સજ્જ થઈ રહ્યું  છે, અને આ વખતે આ ટક્કર ચીનની એક નાની કંપની દ્વારા અપાઈ રહી છે. 

ચીની કંપનીની કાર આપી રહી છે ટક્કર 

ચીનની વ્હીકલ મેન્યુફેક્ચરિંગ કંપની SAIC ની નાની ઇલેક્ટ્રિક કાર Hong Guang છેલ્લા સમુક મહિનાઓથી ટેસ્લાની કારણે આ સેગમેન્ટમાં કસોકસની ટક્કર આપી રહી છે, એટલું જ નહીં પણ વેચાણના મામલે પણ ચીની કંપનીની આ કારે ટેસ્લાની કારને પાછળ છોડી દીધી છે. આ કાર છેલ્લા અમુક મહિનાઓ, ખાસ કરીને જાન્યુઆરી અને ફેબ્રુઆરી 2021થી દુનિયાની સૌથી વધુ વેચાણ ધરાવતી ઇલેક્ટ્રિક કાર બની ગઈ છે, જો વેચાણના આંકડાઓને જોવામાં આવે તો Tesla Model 3 ની ઇલેક્ટ્રિક સેડાનને પણ આ કારે પાછળ પાડી દીધી છે, Hong Guang મિની કાર હવે દુનિયાની સૌથી વધુ વેચાણ ધરાવતી ઇલેક્ટ્રિક કાર બની ચૂકી છે. 

આંકડાઓ પર જો નજર કરીએ તો જોઈ શકાય છે કે જાન્યુઆરી 2021માં ચીની કારના 36000 યુનિટ્સ વેચાયા છે, જ્યારે કે ટેસ્લાની કાર Model 3 ના 21500 યુનિટ્સ જ વેચાયા છે, ફેબ્રુઆરીના ડેટામાં પણ આ કારે ટેસ્લાની કારને પછાડી દીધી હતી, ફેબ્રુઆરી 2021 માં આ ચીની મિની કારના 20000 યુનિટ્સ વેચાયા છે, અને ટેસ્લાની કારના માત્ર 13700  યુનિટ્સ જ વેચાયા છે.

આ કારની કિંમત ટેસ્લાની કાર કરતાં ઘણી ઓછી છે 

જો કે આની પાછળનું કારણ જોવામાં આવે તો એક મોટું કારણ એવું છે કે એક તો આ ચાઇનીઝ કારની કિંમત ઓછી છે, અને લુક શાનદાર છે, જો કે ડ્રાઇવિંગ રેન્જ, પરફોર્મન્સ અને સાઇઝના હિસાબે ટેસ્લાની કાર આ કાર કરતાં ક્યાંય આગળ છે. જો કે ઓછી કિંમતના કારણે આ ચીની કારની ડિમાન્ડ વધી રહી છે.

અ કારને બનાવનારી કંપનીનો દાવો છે કે આ કાર સિંગલ ઇલેક્ટ્રિક ચાર્જમાં 170 કિમી સુધી ચાલી શકે છે, અને આની ટોપ સ્પીડ 100 કિમી સુધીની જઈ શકે છે. આ કારમાં 13 kWhનું બેટરી પેક મળે છે, આની સામે ટેસ્લાની કાર સિંગલ ચાર્જમાં 402 કિમી સુધીની રેન્જ આપે છે.