સુરતમાં હનીટ્રેપની ઘટના સામે આવી છે. વરાછા સરથાણા વિસ્તારમાં રહેતા યુવકનો જહાંગીરપુર વિસ્તારમાં યુવતી સાથે કઢંગી હાલતમાં બનાવેલ મોબાઈલ વીડિયો વાયરલ કરવાની ધમકી આપી હતી. યુવક પાસે રૂપિયા 25 લાખની માગણી કરવામાં આવી હતી. જેથી યુવકે રાંદેર પોલીસ ફરિયાદ કરતા પોલીસે આ મામલે ફરિયાદ ના આધારે સ્થાનિક ચેનલની એક મહિલા પત્રકાર સાથે બે મહિલાઓની કરી ધરપકડ કરી વધુ તપાસ શરૂ કરી છે.
કઢંગી હાલતમાં બનાવેલ મોબાઈલ વીડિયો વાયરલ કરવાની ધમકી
રૂપિયા 25 લાખની માંગણી કરી
ડરી ગયેલા યુવકે મિત્રને ફોન કરીને જણાવી હકીકત
સુરતના સરથાણા જકાતનાકા વિસ્તારની શક્તિ વિજય સોસાયટીમાં રહેતા યુવક પરિવાર સાથે રહે છે. આ યુવક શરીરસુખ માણવા માટે એક મિત્ર પાસેથી મોબાઈલ નંબર મેળવી જહાંગીરપુર મોરાભાગળમાં રહેતી યુવતીનો સંપર્ક કર્યો હતો. જોકે ગતરોજ તેના ઘરે ગયો હતો. જ્યાં યુવક પહેલાં આ યુવતી સાથે ભાવતાલ નક્કી કરી બેડરૂમમાં ગયો હતો. બાદમાં યુવક અને યુવતી કઢંગી હાલતમાં હતા તે દરમિયાનમાં અન્ય એક યુવતી બેડરૂમમાં આવી હતી. ત્યારબાદ કઢંગી હાલતના યુવક અને યુવતીનો વીડિયો ઉતારી દરવાજો અંદરથી બંધ કરી દીધો હતો.
વીડિયો વાયરલ કરવાની ધમકી આપી 25 લાખ માગ્યા
જોકે વીડિયો ઉતારનારી યુવતીએ પોતાની ઓળખ ખાનગી લોકલ ન્યૂઝ ચેનલની પ્રેસ રિપોર્ટર તરીકે આપી હતી. યુવકને વીડિયો વાયરલ કરવાની ધમકી આપી રૂપિયા 25 લાખની માંગણી કરી હતી.
ડરી ગયેલા યુવકે મિત્રને ફોન કરીને કહ્યું...
પરસ્ત્રી સાથે શરીર સુખ માણવાના ચક્કરમાં બદનામ થવાનો વારો આવતા યુવક ડરી ગયો હતો. તેને ખ્યાલ આવી ગયો હતો કે આ યુવતીઓ દ્વારા તેને હનીટ્રેપમાં ફસાવી રૂપિયા પાડવાનો કારસો રચ્યો હોય તેવું લાગતા યુવકે તેના એક મિત્રને ફોન કરી તમામ હકીકત જણાવી દીધી હતી.
પોલીસે કરી બન્ને મહિલાઓની કરી ધરપકડ
જેથી મિત્રએ રાંદેર પોલીસને જાણ કરી ઘટનાસ્થળે પહોંચ્યા હતા. ત્યારબાદ પોલીસે બન્ને મહિલાઓની ધરપકડ કરી હતી. હાલ યુવકની ફરિયાદના આધારે પોલીસે મહિલાની પૂછપરછ શરૂ કરી આ મામલે ગુનો નોંધી વધુ તપાસ હાથ ધરી છે.