ચેતવણી / હવે સોશિયલ મીડિયા પર હનીટ્રેપનો ભોગ બન્યાં તો જાતે આવું કરવું પડશે- કોર્ટે જાહેર કર્યો ચુકાદો

• હનીટ્રેપનો ભોગ બનેલા લોકો ચેતે 
• પીડિતોએ હવે કોર્ટમાં જાતે રજૂ કરવા પડશે સાક્ષીઓ
• દિલ્હીની સાકેત કોર્ટે યુવકની અરજી પર આપ્યો ચુકાદો

સોશિયલ મીડિયા પર હનીટ્રેપનો ભોગ બનનાર લોકોએ હવે સાવધાની રાખવી પડશે. યુવતી પર હની ટ્રેપ દ્વારા લાખો રૂપિયા પડાવવાનો આરોપ લગાવનાર યુવકની અરજી ફગાવતી દેતા દિલ્હીની સાકેત કોર્ટે એવો ચુકાદો જાહેર કર્યો કે જો તમે સોશિયલ મીડિયા પર હનીટ્રેપનો ભોગ બન્યાં હોવ તો તેના સાક્ષીઓ જાતે રજૂ કરો.  કોર્ટે યુવકની અરજી પર સુનાવણી કરતા કહ્યું કે, જો તમે હની ટ્રેપમાં ફસાયા હોવ કે  ફ્રોડનો શિકાર બન્યા હોવ તો તમારે પોતે જ સાબિત કરવું પડશે. કોર્ટે પીડિત યુવકને કહ્યું કે પુરાવા રજૂ કરવાની જવાબદારી પણ તમારી પોતાની રહેશે. 

યુવાન અને યુવતી વચ્ચે આવું બન્યું 
દિલ્હીના એક યુવાને સાકેત કોર્ટમાં અરજી કરીને યુવતી પર મોટા આરોપ મૂક્યા હતા. ફરિયાદમાં પીડિતે ફેસબુક પર એક યુવતી સાથે મિત્રતા કરી હોવાનું જણાવ્યું હતું. બંને વચ્ચે પ્રેમસંબંધ બંધાયો હતો. જોકે મહિલાએ યુવકને પોતે પરિણીત હોવાનું અને તેના પતિએ ત્રાસ આપ્યાનું જણાવ્યું હતું. આ દરમિયાન યુવતિએ યુવકના લેપટોપ સાથે ત્રણ લાખ રૂપિયા પણ લીધા હતા. થોડા દિવસ બાદ જ્યારે યુવકને યુવતી પર શંકા થવા લાગી તો તેણે લેપટોપ માગ્યું. તે લેપટોપમાં યુવકને યુવતિની એક વોટ્સએપ ચેટ મળી આવી હતી, જેમાં તે પોતાના પતિ સાથે ચેટિંગ કરી રહી હતી કે યુવક પાસેથી વધુ પૈસા કેવી રીતે પડાવી શકાય. આ પછી પીડિત યુવકે પોલીસમાં ફરિયાદ કરી હતી, પરંતુ પોલીસે એફઆઈઆર નોંધવાની ના પાડી દીધી હતી. ત્યારબાદ યુવકે સાકેત મેટ્રોપોલિટન મેજિસ્ટ્રેટની કોર્ટમાં અરજી કરી હતી. ત્યાં પણ તેનો સ્વીકાર ન થતાં પીડિત યુવાન સેશન્સ કોર્ટમાં પહોંચ્યો હતો. 

હની ટ્રેપનો ભોગ બનેલા લોકો સાવચેતી રાખે- કોર્ટ 
યુવકની અરજી ફગાવી દેતા કોર્ટે એવો ચુકાદો જાહેર કર્યો કે સોશિયલ મીડિયા પર હની ટ્રેપનો ભોગ બનેલા લોકોએ જાતે જ સાવચેતી રાખવી જોઈએ. કોર્ટનું કહેવું છે કે જો તમે છેતરપિંડીનો ભોગ બન્યા હોવ તો તેને સાબિત કરવા માટે પુરાવા રજૂ કરવાની જવાબદારી પણ તમારી પોતાની છે.