દુનિયાનો લગભગ દરેક દેશ હંમેશાં તેના કટ્ટર હરીફ કે પછી દુશ્મન દેશને માત આપવાની કોશિશોમાં જ લાગેલો હોય છે. દરેક વખતે લડાઈ સીધી હરીફ સાથે જ હોય અને દુશ્મનને હંમેશાં ફક્ત જંગના મેદાનમાં જ હરાવી શકાય એ વાત હવે બહુ જૂની થઈ ગઈ.
ગુપ્તચર એજન્સીઓએ દુશ્મનને કારમી હાર આપવા માટે એક ખતરનાક હથિયારનું નિર્માણ કર્યું છે, જેને ‘હની ટ્રેપ’ તરીકે આળખાય છે. આમ તો નામ પરથી જ અંદાજ લગાવી શકાય છે કે હની એટલે કે મધ અને ટ્રેપ અર્થાત્ જાળ એટલે કે એક એવી મીઠી જાળ, જેમાં ‘શિકાર’ને જાણ પણ નથી થતી કે તેને ફસાવવામાં આવ્યો છે. મધમીઠી વાતોની જાળમાં ફસાયેલી વ્યક્તિને ઘણી વખત તેને કોણ ફસાવી રહ્યું છે કે તેના ઈરાદા વિશે પણ કોઈ માહિતી હોતી નથી.
લોકોને હની ટ્રેપમાં ફસાવવાની કોશિશ કરતા
દુશ્મન દેશોની બેહદ ખૂબસૂરત મહિલા એજન્ટ્સ સેનાના અધિકારીઓ કે જવાનોને સોશિયલ મીડિયાના માધ્યમથી પોતાના રૂપની જાળમાં ફસાવે છે અને તેમની પાસેથી જોતજોતામાં ખૂબ જ મહત્ત્વપૂર્ણ અને સંવેદનશીલ જાણકારીઓ મેળવી લે છે.પાકિસ્તાનની ખતરનાક ગુપ્તચર એજન્સી આઈએસઆઈ મોટા ભાગે ભારતીય થલસેના, વાયુસેના અને નૌસેના સાથે સંકળાયેલા લોકોને હની ટ્રેપમાં ફસાવવાની કોશિશ કરે છે.
તાજેતરમાં રાજસ્થાનના સીકરના રહેવાસી એવા સેનાના જવાનની આર્મીની અત્યંત ગુપ્ત અને સંવેદનશીલ માહિતી પાકિસ્તાની મહિલા એજન્ટને આપવાના આરોપમાં ધરપકડ કરવામાં આવી હતી. મહિલા એજન્ટે આ જવાનને હની ટ્રેપમાં જોરદાર રીતે ફસાવ્યો હતો. શાતિર દિમાગ ધરાવતી મહિલા એજન્ટ જવાન સાથે વીડિયો કોલ પર નગ્ન થઈને અશ્લીલ વાતો કરતી હોવાનો ચોંકાવનારો ખુલાસો પણ પૂછપરછમાં થયો છે.
એક સમયે ફક્ત અમેરિકા, ચીન, રશિયા કે જાપાન જેવા દેશો જ હની ટ્રેપનો ઉપયોગ કરતા હતા પણ છેલ્લાં થોડાં વર્ષથી પાકિસ્તાની એજન્સી આઈએસઆઈ તેની સુંદર મહિલા એજન્ટ્સની જાળ બિછાવીને આપણી સેનાના જવાનો-અધિકારીઓને ફસાવી રહી છે. આવા મોટા ભાગના કિસ્સાઓમાં જાણીતાં સોશિયલ મીડિયા પ્લેટફોર્મ જેવાં કે ફેસબુક, ઈન્સ્ટાગ્રામ, ટેિલગ્રામ, સ્નેપચેટ પર ‘શિકાર’ સાથે દોસ્તી કરવામાં આવે છે. બાદમાં દોસ્તીની આડમાં તેની સાથે સેક્સ ચેટ, લાઈવ વીડિયો કોલ, અશ્લીલ હરકતોનું રેકોર્ડિંગ વગેરે કરી તેને જાળમાં ફસાવવામાં આવે છે અને છેલ્લે બ્લેકમેલ કરી તેની પાસેથી સેનાની ગુપ્ત જાણકારી, નકશાઓ, આર્મીની પોઝિશન વગેરે જેવી માહિતી કઢાવવામાં આવે છે. આઈએસઆઈ તેની મહિલા જાસૂસોને ભારતીય જવાનોને ફસાવવાના બદલામાં તગડું ઈનામ અને પ્રમોશન પણ આપે છે. કેટલાક કિસ્સાઓમાં તો આઈએસઆઈના ચાલાક પુરુષ એજન્ટ જ મહિલા બનીને ફેક પ્રોફાઈલના સહારે ચેટિંગ કરતા હોય છે, જેની જાણ પીડિતને અંત સુધી થતી નથી.
સોશિયલ મીડિયા પરની ૧૫૦ પ્રોફાઈલનો પર્દાફાશ
કોઈ પણ રીતે વાતોમાં ફસાવીને અશ્લીલ તસવીર કે ન્યૂડ વીડિયો ઉતારી લેવામાં આવે છે, જેનો પાછળથી હથિયાર તરીકે ઉપયોગ થાય છે અને બદનામ થવાના ડરથી પીડિત વ્યક્તિ કોઈની મદદ પણ લઈ શકતી નથી. સુરક્ષા એજન્સીઓનાં ઉચ્ચ સ્તરીય સૂત્રોનો દાવો છે કે આઈએસઆઈ હની ટ્રેપ માટે તેની મહિલાઓને વિદેશી એજન્ટ્સના હાથ નીચે સ્પેશિયલ ટ્રેનિંગ પણ આપે છે. થોડા સમય પહેલાં જ ભારતીય સેનાએ સોશિયલ મીડિયા પરની એવી અંદાજે ૧૫૦ પ્રોફાઈલનો પર્દાફાશ કર્યો હતો, જેની મદદથી પાકિસ્તાન ખૂબસૂરત યુવતીઓને આગળ ધરીને ભારતીય સેનાના અધિકારીઓને પોતાની હની ટ્રેપમાં ફસાવીને ગુપ્ત માહિતી મેળવવાની કોશિશ કરી રહ્યું હતું.
દુશ્મન દેશની શાતિર એજન્સીના બદઈરાદા પારખીને ભારતીય સેનાએ પણ પોતાના જવાનોને આ પ્રકારની ચેટ અને દોસ્તીથી દૂર જ રહેવાની સલાહ આપી છે. સેનાના જવાનો અને અધિકારીઓને સોશિયલ મીડિયાથી અંતર જાળવી રાખી અજાણી વ્યક્તિ સાથે વાતચીત ન કરવા પણ વારંવાર જણાવાયું છે. આજના આધુનિક જમાનામાં જ્યારે સોશિયલ મીડિયા એક શક્તિશાળી હથિયારના રૂપમાં વિકસિત થઈ ગયું છે ત્યારે તેનો વિવેકપૂર્ણ, શાલિન ઉપયોગ જ આપણને દુશ્મનોની આવી ખતરનાક જાળમાં ફસાતાં બચાવી શકશે.•