સોશિયલ નેટવર્કિંગ સાઈટ ફેસબુક પર રહસ્યમય પાકિસ્તાની યુવતી અનિકા ચોપરા ભારતીય સેનાના જવાનોને પોતાની કાતિલ અદાના દીવાના બનાવીને ગુપ્ત અને સંવેદનશીલ માહિતીઓ-જાણકારીઓ લઈ રહી હોવાનો ચોંકાવનારો પર્દાફાશ થયો છે.
અનિકા ચોપરા હકીકતમાં પાકિસ્તાનની જાસૂસી સંસ્થા આઈએસઆઈની એજન્ટ હોવાની વાત સામે આવી છે. ખુબસુરત અનિકા ભારતીય સુરક્ષાદળો અને સેનાના જવાનોને 'હનીટ્રેપ'માં ફસાવીને શિકાર બનાવતી હતી. તે આ અગાઉ પણ ભારતીય સેના સાથે સંકળાયેલા અનેક યુવાનોને પોતાની જાળમાં ફસાવી ચૂકી છે. નારનૌલના ગામ બસઈનો રહેવાસી અને ભારતીય સેનાનો જવાન રવિન્દ્ર યાદવ તેની 'હનીટ્રેપ'માં આબાદ ફસાઈ ગયો હતો.
સુરક્ષા એજન્સીઓનો દાવો છે કે, અનિકાના શિકાર બનેલા જવાનોની સંખ્યા ઘણી મોટી છે. તે પાકિસ્તાનમાં બેઠી બેઠી આસાનીથી જવાનોને પોતાની સુંદરતાની જાળમાં ફસાવી તેમની પાસેથી ગુપ્ત માહિતીઓ મેળવી લેતી હતી.
ઉલ્લેખનીય છે કે, પાકિસ્તાનની ગુપ્તચર એજન્સી આઈએસઆઈ ઘણા વર્ષોથી 'હનીટ્રેપ' દ્વારા ભારતીય સેના, વાયુસેના અને નૌસેનાના જવાનો અને અધિકારીઓને ફસાવવાનું ષડ્યંત્ર બનાવતી રહી છે. છેલ્લા 5 વર્ષોમાં હનીટ્રેપની અનેક ચોંકાવનારી ઘટનાઓ સામે આવી છે અને આ કારણે જ સેનાએ જવાનોને સોશિયલ મીડિયાથી દૂર રહેવાના આદેશો આપ્યા છે.
ભારતીય સેનાએ સોશિયલ મીડિયાના ઉપયોગ અંગે કડક ગાઈડલાઈન્સ પણ જારી કરેલી છે. એ મુજબ સેનાનો જવાન સોશિયલ મીડિયા પર વર્દી સાથેની તસ્વીર કે પોતાની ઓળખ, રેન્ક, પોસ્ટિંગ, લોકેશન સહિતની કોઈ જાણકારી શેર કરી શકતો નથી.
સૂત્રોના જણાવ્યા અનુસાર, અનિકા આ અગાઉ સેનામાં ભરતી માટેની તૈયારી કરી રહેલા રોહતકના ગૌરવ નામના યુવકને પણ જાળમાં ફસાવી ચૂકી છે. સેના હાલ અનિકા સાથે સંપર્કમાં હોય એવા તમામ લોકોની તપાસ કરી રહી છે અને તેમણે અનિકા સાથે કઈ કઈ વાત શેર કરી છે તેની માહિતી પણ એકઠી કરવામાં આવી રહી છે.
એજન્સીઓનું માનવું છે કે, હકીકતમાં અનિકા ચોપરા એ કોઈ પાકિસ્તાની યુવતીની ફેક પ્રોફાઈલ પણ હોઈ શકે છે. આ ખુબસુરત ચહેરાની અસલી ઓળખ હજુ સુધી થઈ શકી નથી.