ઘણા લોકોને અવારનવાર દાંતનો દુખાવો થતો હોય છે, જેનાં ઘણાં કારણો હોય છે, જેમ કે કેવિટી, બેક્ટેરિયલ ઇન્ફેક્શન, કેલ્શિયમની ઊણપ, દાંતમાં સફાઈની ઊણપ તેમજ ડહાપણની દાઢ.
દાંતના દુઃખાવાને ઇગ્નોર ન કરશો
ઘરેલૂ ઉપચારથી કરો પિડા દૂર
ડૉકટર પાસે ન જવુ હોય તો અપનાવો આ ઉપાય
આજકાલના વ્યસ્ત જીવનમાં આવી નાની-નાની સમસ્યાઓ માટે લોકો ડોક્ટર્સ પાસે જવા ઇચ્છતા નથી. તેઓ ડોક્ટરની સલાહ વિના જ પેઈન કિલર ખાઈ લે છે, જોકે તેનાથી સાઈડ ઈફેક્ટ્સનું જોખમ વધી જાય છે. અહીં કેટલાક ઘરેલુ ઉપાયો જણાવી રહ્યા છીએ, જેનાથી દાંતના દુખાવામાં રાહત મળશે તેમજ સાઈડ ઇફેક્ટ્સ પણ નહીં થાય.
જામફળનાં પાન
જામફળનાં પાન દાંતનો દુખાવો ઓછો કરવામાં મદદરૂપ છે. જામફળનાં પાનને ધોઈ સારી રીતે ચાવો. દિવસમાં બેથી ત્રણ વાર આવું કરવાથી દાંતના દુખાવાથી રાહત મળશે.
લસણ
દાંતમાં દુખાવાથી રાહત મેળવવા લસણની કળીઓને ચોળીને ચાવો. આ કળીઓને એ દાંતથી ચાવો, જ્યાં દાંતનો દુખાવો થાય છે. આમ કરવાથી દાંતનો દુખાવો દૂર થશે.
ડુંગળી
દાંતના દુખાવાથી છુટકારો મેળવવા ડુંગળીની એક સ્લાઈસ લઈને ચાવો, જેનાથી મોઢાના બેક્ટેરિયા પણ સાફ થઇ જશે.
હિંગ
ત્રણ-ચાર ચપટી હિંગ લો અને તેમાં ત્રણ-ચાર ટીંપાં લીંબુનો રસ ભેળવો. આ મિશ્રણથી દાંત પર મસાજ કરવાથી દુખાવામાં રાહત મળશે.
સિંધવ
એક ગ્લાસ નવશેકા પાણીમાં સિંધવ મીઠું ઉમેરીને એ પાણીથી કોગળા કરો. દિવસમાં આ પ્રક્રિયા બે-ત્રણ વાર કરવાથી દાંતના દુખાવાથી છુટકારો મળશે.
બ્રાન્ડી
બ્રાન્ડી પણ દાંતનો દુખાવો ઓછો કરવામાં મદદરૂપ થાય છે. થોડા કોટનને બ્રાન્ડીમાં ડુબાડીને જે દાંત દુખતો હોય તેની નીચે મૂકી દો.
બટાકા
દાંતનો દુખાવો ઓછો કરવા બટાકો લો અને તેને છોલીને તેની એક સ્લાઈસ કાઢી લો. તેને દુખાવો થતો હોય તેવા દાંત નીચે પંદર મિનિટ માટે દબાવીને રાખો.
સરસવનું તેલ અને મીઠું
અડધી ચમચી મીઠું લઈ તેમાં પાંચ-છ ટીપાં સરસવનું તેલ ઉમેરો. હવે આ મિશ્રણથી દાંતમાં મસાજ કરો.