દેશી નુસખા / આ 5 ઘરેલૂ ઉપાય છાતી અને ગળામાં જામેલો કફ તરત જ દૂર કરી દેશે, અજમાવો

• બ્રોન્કાઈટિસ, અસ્થમા, એલર્જી કે શરદીને કારણે છાતીમાં જમા થઈ જાય છે કફ
• છાતી અને ગળામાં કફ જમા થવાથી શ્વાસ લેવામાં થાય છે તકલીફ
• હળદરનો ઉપાય તરત જ દૂર કરશે કફ

આદુનો ઉપાય કરો

આદુ શિયાળામાં વરદાન સમાન છે. તે ઘણી સમસ્યાઓથી રાહત અપાવે છે. જેથી છાતી કે ગળામાં કફ જામી ગયો હોય તો આદુવાળી તીખી ચા પીવો અથવા તો આદુનો ઉકાળો બનાવીને પીઓ. દિવસમાં 2-3 વાર આ ઉપાય કરવાથી ઝડપથી રાહત મળશે. તમે તેમાં મધ પણ નાખી શકો છો. 

ડુંગળી

ડુંગળીમાં રહેલાં એન્ટીસેપ્ટિક અને એન્ટીઈન્ફ્લામેટરી તત્વ છાતીમાં કફ જામી જવાની સમસ્યામાં ઘણો આરામ આપે છે. તમે ડુંગળીનો આ ઉપાય અજમાવી ઝડપથી આરામ મેળવી શકો છો. તેના માટે 1 નાની ડુંગળીનો રસ કાઢી તેમાં 1 ચમચી લીંબુનો રસ અને 1 ચમચી પાણી અને થોડું મધ મિક્સ કરીને દિવસમાં 3 વાર લો. આને સહેજ ગરમ પણ કરી શકો છો. આ એક રામબાણ ઉપાય છે. જે કફને દૂર કરી દેશે. 

પાઈનેપલનો રસ

પાઈનેપલમાં એન્ટીઈન્ફ્લામેટરી અને ડિટોક્સીફાઈંગ પ્રોપર્ટી હોય છે. જેથી છાતી અને ગળામાં કફ જામી જવાની સમસ્યામાં આ રસ પીવાથી જબરદસ્ત ફાયદો થાય છે અને આ સમસ્યા ઝડપથી દૂર થાય છે. તેના માટે રોજ 1 ગ્લાસ તાજો પાઈનેપલનો રસ પીવો. તમે તેમાં મધ પણ નાખી શકો છો. ખાંડ નાખવી નહીં. 

સ્ટીમ છે બેસ્ટ ઉપાય

છાતી અને ગળામાં જામી ગયેલા કફને દૂર કરવા માટે સ્ટીમ પણ બેસ્ટ ઉપાય છે. તેનાથી તરત જ ફરક પડે છે. પણ તમારે દિવસમાં 4-5 વખત આ પ્રક્રિયા કરવી જરૂરી છે. તેના માટે એક વાસણમાં ઉકળતું પાણી લઈ તેમાં નીલગિરી તેલના થોડાં ટીપાં અથવા વિક્સ નાખીને ટુવાલથી માથું ઢાંકી 5 મિનિટ સ્ટીમ લેવું. 

હળદર દૂર કરી દેશે કફ

હળદર કેટલી ફાયદાકારક છે એ તો બધાં જાણે જ છે. તેમાં રહેલાં એન્ટીસેપ્ટિક, એન્ટીબેક્ટેરિયલ અને એન્ટીઈન્ફ્લામેટરી ગુણો શરદી, ખાંસી અને કફની સમસ્યામાં રામબાણની જેમ અસર કરે છે. હળદર એક અક્સિર ઈલાજ છે. તેના માટે અડધી ચમચી હળદર પાઉડરમાં અડધી ચમચી કાળા મરીનો પાઉડર મિક્સ કરી તેમાં 1 ચમચી મધ મિક્સ કરી દો. હવે આ મિશ્રણને દિવસમાં 3-4 વખત ખાઓ. પછી જુઓ કેવી અસર થાય છે.