ઘરવાપસી / ગુજરાત ભાજપમાં એક મહિનામાં ત્રીજા પૂર્વ ધારાસભ્યની ઘરવાપસી, કમલમમાં ગાડીઓના કાફલા સાથે કરશે શક્તિપ્રદર્શન

• પૂર્વ ધારાસભ્ય પ્રવિણ મારુ આજે ભાજપમાં જોડાશે 
• 2020માં ધારાસભ્ય પદેથી આપ્યું હતું રાજીનામું
• એક મહિનામાં ત્રીજા પૂર્વ ધારાસભ્ય ભાજપમાં જોડાશે

એક મહિનામાં ત્રીજા પૂર્વ ધારાસભ્ય ભાજપમાં જોડાશે

2022ની વિધાનસભાની ચૂંટણી પહેલા પક્ષ પલટાની મોસમ શરૂ થઈ ગઈ છે. ત્યારે ભાજપ દ્વારા પક્ષમાંથી બરતરફ કરેલા લોકો ફરી ભાજપમાં જોડાવાનું અભિયાન શરૂ કરી દીધું છે. કેમકે થોડા દિવસો અગાઉ માંડલના પૂર્વ MLA પ્રાગજીભાઈ પટેલ, ગત રોજ  પૂર્વ ધારાસભ્ય કમા રાઠોડ પુનઃ ભાજપમાં જોડાયા છે. ત્યારે આજે ગઢડાના પૂર્વ ધારાસભ્ય પ્રવીણ મારૂ પણ ભાજપમાં જોડાશે.

રાજ્યસભાની ચૂંટણી પહેલા પ્રવીણ મારૂએ આપ્યું હતું રાજીનામું

સૂત્રોના જણાવ્યા અનુસાર આજે ગઢડાના પૂર્વ ધારાસભ્ય પ્રવીણ મારુ પોતાના સમર્થકોને અમદાવાદના ગોતા સર્કલ પાસે એકત્ર થવા આહ્વાન કર્યું છે. ગોતા સર્કલથી રેલી સ્વરૂપે પ્રવીણ મારુ કમલમ પહોંચી કેસરિયો ખેસ પહેરશે. મહત્વનું છે કે, કોંગ્રેસ સાથે છેડો ફાડનાર પ્રવીણ મારુએ વર્ષ 2020માં ધારાસભ્યપદેથી રાજીનામું આપ્યું હતું.

ગત રોજ ભાજપના પૂર્વ નેતા કમાભાઈ રાઠોડની ભાજપમાં થઈ ઘર વાપસી

સાણંદના પૂર્વ ધારાસભ્ય કમાભાઈ રાઠોડની ભાજપમાં ઘર વાપસી થઈ છે. કમાભાઈને ગતરોજ ભાજપનો ખેસ પહેરાવી પાર્ટીમાં સામેલ કરવામાં આવ્યા હતા. કમાભાઈ રાઠોડ તેના સમર્થકો સાથે ભાજપમાં જોડાયા છે. ગુજરાત બીજેપી પ્રદેશ અધ્યક્ષ સીઆર પાટીલ સહિત અનેક નેતાઓ આ પ્રસંગે હાજર રહ્યા હતા. 

આ પહેલા માંડલના પૂર્વ ધારાસભ્ય પ્રાગજીભાઈ પટેલની પણ ભાજપમાં થઈ ઘર વાપસી

2022ની વિધાનસભા ચૂંટણી પહેલા પક્ષ પલટાની મોસમ શરૂ થઈ છે.ત્યારે થોડા દિવસો અગાઉ માંડલના પૂર્વ MLA પ્રાગજીભાઈ પટેલ પણ જોડાયા હતા.કમલમ ખાતે તેઓ પોતાના સમર્થકો સાથે ભારતીય જનતા પાર્ટીમાં પ્રદેશ અધ્યક્ષ સી.આર.પાટિલની હાજરીમાં પુન: પ્રવેશ્યા અને કેસરિયો ધારણ કર્યો.