શહેરમાં કોરોનાના વાઇરસનો ફફડાટ ફેલાયો છે. ગઇ કાલે એકસામટા ત્રણ કેસ નોંધાતાં મ્યુનિસિપલ તંત્ર પણ દોડતું થયું છે. મ્યુનિસિપલ કમિશનર વિજય નહેરા દ્વારા વિદેશથી આવેલ વ્યકિતનો પરિવાર સ્વેચ્છાએ ક્વોરન્ટાઇનમાં રહે તે માટે વોલન્ટરી ફેમિલી ક્વોરન્ટાઇન સ્કીમ (વીએફક્યૂ)ની જાહેરાત કરાઇ છે.
આઈસોલેશન હેઠળ રહેનારા પરિવારને સાત દિવસ અપાશે સુવિધા
દૂધ-પાણી ખાખરા-બિસ્ક્ટિ અને મેગી-સિંગ પૂરાં પડાશે, લંચ-િડનર પણ અપાશે
શહેરમાં કોરોનાનો ભય વધ્યો હોઇ આજની સ્થિતિએ ૬૦૦થી વધુ નાગરિકોને હોમ આઈસોલેશન હેઠળ રખાયા છે અને કમિશનરની વીએફક્યૂ સ્કીમની જાહેરાતના પગલે વધુ ને વધુ લોકો સ્વૈચ્છિક રીતે હોમ આઈસોલેશન માટે આગળ આવે તેવી તંત્ર આશા રાખી રહ્યું છે.
હજુ બે દિવસ પહેલાં વિદેશથી આવેલા ૪૬૭ નાગરિકો હોમ આઇસોલેશન હેઠળ હતા, જેમાં સેટેલાઇટ-થલતેજ, જોધપુર-રાણીપ, નવરંગપુરા સહિતના પશ્ચિમ અમદાવાદમાં લોકોની સંખ્યા સૌથી વધુ હતી. જ્યારે આજની સ્થિતિએ હોમ આઇસોલેશન હેઠળ ૬૦૦થી વધુ લોકોને રખાયા હોઇ શહેરમાં કોરોના વાઇરસનો ભય વધ્યો છે.
બીજી તરફ કમિશનરની વોલન્ટરી ફેમિલી ક્વોરન્ટાઇન સ્કીમ હેઠળની હોમ આઈસોલેશનની એક ટીમમાં સેનેટરી ઇન્સ્પેક્ટર-આશાવર્કર, મલ્ટિપર્પઝ હેલ્થ વર્કર સહિત પાંચ જણાનો સમાવેશ કરાયો છે. આ ટીમ દ્વારા હોમ આઈસોલેશનમાં રખાયેલા લોકોનું મોનિટરિંગ તેમજ તેમને વોલન્ટરી ફેમિલી ક્વોરન્ટાઇન સ્કીમ હેઠળ મફતમાં બપોરે-રાત્રે લંચ અને ડિનર પૂરું પાડશે. તંત્ર દ્વારા હોમ ક્વોરન્ટાઇનમાં રહેનારા લોકોને સેનિટાઇઝર-માસ્ક, કોરોના વાઇરસની ગાઇડલાઇન્સ સહિતની કિટ અપાઇ રહી છે.
મ્યુનિસિપલ કોર્પોરેશનના સત્તાવાળાઓએ ફેમિલી ક્વોરન્ટાઇન સ્કીમ હેઠળ પરિવારને આજથી સાત દિવસ સુધી ચાલે તેવી ખાદ્યસામગ્રી પણ અપાશે. આ ખાદ્યસામગ્રીમાં સાત દિવસ સુધી તાજી રહે તેવી વસ્તુઓ એટલે કે સાત લિટરના ટેટ્રાપેકમાં દૂધ-પાણી, ખાખરા-બિસ્કિટ, મેગી-સિંગ તેમજ પેપર નેપ્કિન અને વેસ્ટ ડિસ્પોઝલ બેગનો સમાવેશ થાય છે. સત્તાવાળાઓ સાત દિવસ બાદ વધુ સાત દિવસ માટે ફરી વાર ખાદ્યસામગ્રી પૂરી પાડશે.
ફેમિલી ક્વોરન્ટાઇન સ્કીમ હેઠળ મફતમાં અપાનાર આ રેશન માટે તંત્રે કોઇ નિશ્ચિત મર્યાદા નક્કી કરી નથી. જે તે પરિવારની આવશ્યકતા મુજબ રેશન અપાનાર હોઇ ભવિષ્યમાં જો તેમાં ભાવવધારો થાય તો પણ આ સ્કીમ હેઠળનો ખાદ્યસામગ્રીનો પુરવઠો યથાવત્ જાળવી રખાશે.
બીજી તરફ મધ્ય ઝોનમાં ૩૦ લોકોને આઇસોલેશન હેઠળ રખાયા છે, જેમાં સૌથી વધુ ગિરધરનગર વિસ્તારના ૧૩, જમાલપુરના ૪ અને માધુપુરાના ત્રણ છે. આમાં દુબઇ અને સાઉદી અરેબિયાથી આવેલા લોકોની સંખ્યા વધુ છે. કેટલાક લોકો અમેરિકા-બેંગકોક, જર્મની અને ફ્રાન્સથી પણ આવ્યા છે. આમ, મધ્ય ઝોન જેવા ગીચ વિસ્તારમાં પણ કોરોના વાઇરસની દહેશતથી લોકો ફફડી ઊઠ્યા છે.