ભારત-દક્ષિણ આફ્રિકા વચ્ચેના મુકાબલા સાથે હોકી વર્લ્ડકપનો શુભારંભ

આજથી હોકી મહાકુંભનો પ્રારંભ થઇ રહ્યો છે. ચાહકો જેની લાંબા સમયથી રાહ જોઇ રહ્યાં હતા તે હોકી વર્લ્ડકપનો આજથી પ્રારંભ થઇ રહ્યો છે. આજના દિવસે સુકાની સેંટર હાફ મનપ્રીત સિંહની આગેવાની હેઠળ મેજબાન ભારત તેમજ દુનિયાના અન્ય 16 દેશો વચ્ચે હોકી મહાકુંભનો પ્રારંભ થઇ રહ્યો છે. આજરોજ ભારત અને દક્ષિણ આફ્રિકા વચ્ચે પ્રથમ મુકાબલો યોજાશે. ભારતનું પ્રથમ લક્ષ્યાંક પોતાના 'સી' ગ્રુપમાં બધી મેચ જીતીને પ્રથમ નંબરે રહી ક્વાર્ટર ફાઇનલમાં પોતાનું સ્થાન પાકુ કરવાનો રહેશે.

ભારતના ગ્રુપમાં ચાર ટીમ અલગ-અલગ શૈલીથી રમવાની છે. ભારતને પોતાના ગ્રુપમાં સૌથી મોટો પડકાર બેલ્જિયમની ટીમ આપશે. તેમ છતાં ભારતને દક્ષિણ આફ્રિકા તેમજ કેનેડાની ટીમને પણ સામાન્ય ગણવાની ભૂલ ભારે પડી શકે છે.

ભારતે પોતાની તાકાત આક્રમક હોકી તેમજ યુવા ખેલાડી પર ભરોસો રાખવાનો રહેશે. ભારતીય ટીમ સામે પોતાના હોકી ચાહકો માટે પદક જીતવાનો પડકાર રહેશે. ભારત ત્રીજી વખત હોકી વિશ્વ કપની મેજબાની કરી રહ્યું છે.

ભારત એફઆઇએચ રેન્કિંગમાં પાંચમાં સ્થાન પર છે જ્યારે દક્ષિણ આફ્રિકા 15માં સ્થાન પર છે. જો કે મેદાન પર કોઇપણ પ્રકારનું રેન્કિંગ ધ્યાનમાં લેવાતું નથી. યજમાન ટીમ ભારત આ વખતે વિશ્વકપની સેમિફાઇનલ સુધી પહોંચે તેવી આશા સેવવામાં આવી રહી છે.