ઈલી સાદિકનું પંજાબી નામ નવપ્રીત કૌર રાખવામાં આવ્યું છે. મનપ્રીત ૨૦૧૨માં મલેશિયામાં રમાયેલા સુલતાન ઓફ જોહોર કપ દરમિયાન ઇલીને મળ્યો હતો. એ સમયે મનપ્રીત ભારતની જુનિયર હોકી ટીમનું નેતૃત્વ કરી રહ્યો હતો.
ઇલી સાદિક એ મેચ જોવા સ્ટેડિયમમાં આવી હતી. મનપ્રીત અને ઇલીની મુલાકાત થઈ. ત્યાર બાદ મનપ્રીત ભારત પાછો ફર્યો, પરંતુ બંને પહેલી જ નજરે એકબીજાનાં પ્રેમમાં પડી ગયાં હતાં. ત્યાર બાદ ઇલી ઘણી વાર ભારત અને મનપ્રીત પણ ઘણી વાર મલેશિયા ગયો હતો.
પ્રેમનો એકરાર સૌથી પહેલાં મનપ્રીતે કર્યો હતો. મનપ્રીતે સુલતાન જોહોર કપ દરમિયાન સ્ટેડિયમમાં ડ્યૂટી કરી રહેલા એક ઓફિસર પાસેથી ઈલીનો મોબાઇલ નંબર લીધો હતો. ભારતની હોકી ટીમનો કેપ્ટન મનપ્રીતસિંહ '૭' નંબરને પોતાનો લકી નંબર માને છે. મનપ્રીતની જર્સીનો નંબર પણ '૭' જ છે. ગઈ કાલે લગ્ન સમયે પણ મનપ્રીત '૦૦૭' નંબરની ફોર્ચ્યુનર કાર લઈને પરણવા ગયો હતો.
આ પ્રસંગે મનપ્રીતે જણાવ્યું, ''આઠેક વર્ષથી અમે રિલેશનમાં હતાં. હવે લગ્ન થઈ જતાં ઘણું સારું લાગી રહ્યું છે. અમારાં લગ્નની તારીખમાં ઘણી વાર ફેરફાર થયો. કોરોનાને કારણે હું મારા ઘણાં મિત્રો-સંબંધીઓને લગ્નમાં બોલાવી શક્યો નહીં, પરંતુ પરિસ્થિતિ સુધર્યા બાદ રિસેપ્શનનું આયોજન કરીશ.''