સંશોધન / બટાકામાંથી બનાવાશે બાયો પ્લાસ્ટિક, ચીનથી આયાત થશે બંધ!, ગુજરાતની આ યુનિ.ને મળ્યો સૌથી મોટો રિસર્ચ પ્રોજેક્ટ

• HNGUને મળ્યો સૌથી મોટો રિસર્ચ પ્રોજેક્ટ 
• બટાકાનો સ્ટાર્ચ કાઢીને બનાવશે બાયોપ્લાસ્ટિક
• પર્યાવરણ તેમજ માનવી ઉપર નથી કોઈ આડઅસર 

પાટણની હેમચંદ્રાચાર્ય ઉત્તર ગુજરાત યુનિવર્સીટીને સૌથી મોટી સફળતા મળી છે જેમાં પાટણની એચ.એન.જી.યુ હવે બટાટા માંથી બાયો વેસ્ટ પ્લાસ્ટિક બનાવશે જે સમગ્ર જીવ શ્રુષ્ટિ માટે આશીર્વાદ રૂપ બની રહેશે.

બટેટાના સ્ટાર્ચમાંથી પ્લાસ્ટિક બનશે
ડો. આશિષ પટેલે જણાવ્યું હતુકે ડીસાના બટેટાનો સ્ટાર્ચ કાઢીને તેમાંથી બાયો પ્લાસ્ટિક બનાવશે. તેમના જણાવ્યા મુજબ હાલ ભારતમાં ડીસા બટેટાનું સૌથી વધુ ઉત્પાદન કરે છે, જેના લીધે ઘણીવાર ખેડૂતોને પૂરતા ભાવ નથી મળતા, તો આ બટેટાના સ્ટાર્ચમાંથી જો પ્લાસ્ટિક બનાવામાં આવે તો તેમને પૂરતા ભાવ પણ મળે અને પર્યાવરણ ને પણ બચાવી શકાય. આ બાયો પ્લાસ્ટિક એક જ અઠવાડિયામાં પર્યાવરણમાં કુદરતી રીતે નાશ પામે છે અને તેની પર્યાવરણ તેમજ માનવો ઉપર કોઈ આડઅસર થતી નથી. 

ચીન પર આત્મનિર્ભરતા ઘટી જશે
તેમના જણાવ્યા પ્રમાણે હાલમાં બાયો પ્લાસ્ટિકનો કાચો માલ આપણે ચીનથી આયાત કરીએ છીએ. જો આ પ્રોજેક્ટ સફળતાપૂર્વક પૂર્ણ થશે તો આવનારા સમયમાં આપણે ભારતની અંદર જ બાયો પ્લાસ્ટિકના કાચા માલનું નિર્માણ કરી શકશું અને સ્વચ્છ ભારત તરફ મોટું પગલું ભરી શકશું. સમગ્ર ગુજરાતમાં સૌ પ્રથમવાર પાટણ હેમચંદ્રાચાર્ય ઉત્તર ગુજરાત યુનિવર્સિટીના સાયન્સ વિભાગમની લેબમાં હાલ આ બાયો પ્લાસ્ટિક બનાવવાની તૈયારી આરંભી લેવામાં આવી છે જોકે આ પ્રોજેકટ ત્રણ વર્ષ ચાલે તેમ હોવાથી હજુ બાયો પ્લાસ્ટિક માટે રાહ જોવી પડશે જોકે આ પ્રોજેક્ટ કેટલો સફળ થાય છે એ આવનાર સમય બતાવશે જો કે એક વાત તો ચોક્કસ છે બાયો પ્લાસ્ટિકની બેગ એટલે કે એમાંથી બનતા પ્લાસ્ટિકના ઝબલા ખુબ મોંઘા રહશે એ વાત નકારી શકાય નહીં.

હાનિકારક પ્લાસ્ટિકનો ઉપયોગ સાવ ઘટી જશે
હાલના સમયમાં પ્લાસ્ટિકની માંગ ખુબ જ ઝડપથી વધી રહી છે, જોકે આજ પ્લાસ્ટિક પર્યાવરણ માટે અને સમગ્ર માનવજાત માટે ખુબજ હાનિકારક છે કારણ છે દુનિયામાં અત્યારે ૧૫૦ મેટ્રિક ટન એટલે કે અંદાજે ૧,૫૦,૦૦૦ કિલોગ્રામ પ્લાસ્ટિક એક વર્ષમાં નીકળે છે. જે વધીને ૨૦૫૦ સુધીમાં ૭૬૧ મેટ્રિક થવાનો અંદાજ છે, જેના માટે થઇ ને ગુજરાત સ્ટેટ બાયોટેકનોલોજી મિશન (જી.એસ.બી.ટી.એમ.) એચ.એન.જી.યુ ના લાઈફ સાયન્સ વિભાગ ના એસોસીએટ પ્રોફેસર ડૉ. આશિષ પટેલને ₹.૪૭,૦૦,૦૦૦/- નો રીસર્ચ પ્રોજેક્ટ આપવામાં આવ્યો છે  જે અત્યાર સુધીમાં યુનિવર્સીટીને મળેલા રીસર્ચ પ્રોજેક્ટમાં સૌથી મોટો છે.