રાજરમત / કરજણના એક યુવકે ગુમ થતા પહેલા ભાજપના MLAનું ચીઠ્ઠીમાં લખ્યું નામ, જાણો શું છે સમગ્ર મામલો

• વડોદરામાં ચીઠ્ઠી લખી યુવક ગુમ થવાનો મામલો
• VTV સમક્ષ કરજણના ધારાસભ્ય અક્ષય પટેલનું નિવેદન
• હું છેલ્લા 1 વર્ષથી હિતેષ વાળંદને મળ્યો નથી 

વડોદરામાં હિતેષ વાળંદ નામના યુવકનો પત્ર ચર્ચાનો વિષય બન્યો છે. યુવકે ધારાસભ્ય અક્ષય પટેલ સહિત 11 લોકોના નામ લખીને વ્યાજ ઉઘરાવવા માટે ત્રાસ આપતા હોવાનો ઉલ્લેખ કર્યો છે. આ યુવકે પત્ર લખીને પોતે આત્મહત્યા કરવા જતો હોવાની વાત કરી છે. એટલું જ નહીં યુવકની બાઈક નર્મદા નદીના બ્રિજ પરથી મળી આવ્યું છે. જોકે યુવક હાલ ગુમ છે. બીજી તરફ યુવકને શોધવાના પ્રયાસ ચાલી રહ્યા છે. આ મામલે ધારાસભ્ય અક્ષય પટેલે તેમના પર લાગેલા આરોપો ફગાવી દીધા છે.3

અક્ષય પટેલે જણાવ્યું કે તેમને હિતેષ સાથે કોઈ લેવા દેવા નથી. કોઈ પૈસાની લેવડદેવડ નથી થઈ. તેને ધંધો નાખવામાં પણ તેમને મદદ કરી હતી. આ કોઈના કહેવાથી અને રાજકીય સ્ટંટ હોઈ શકે છે. મારા પર આક્ષેપો લગાવીને કોઈ રાજકીય ફાયદો લેવા માગતું હોય તેમ લાગી રહ્યું છે. જોકે હાલ તો તપાસનો વિષય એ છે કે યુવક ક્યાં છે. યુવક મળ્યા બાદ જ આગળની તપાસ કઈ દિશામાં થશે તે નક્કી થશે.