દુર્ઘટના / પાટણમાં ભયંકર હિટ એન્ડ રન: બાંકડા પર બેઠેલા 5 સિનિયર સિટીઝનો પર કાર ચડાવી દીધી, 1નું મોત, 4 ઇજાગ્રસ્ત

• લીલીવાડી ચાર રસ્તા પાસે હિટ એન્ડ રન 
• 5 સિનિયર સિટીઝન પર ફળી વળી કાર
• એકનું મૃત્યુ, 4 લોકો ઈજાગ્રસ્ત

પાટણમાં હિટ એન્ડ રનની ઘટના બની છે. આ અકસ્માતમાં એકનું મોત થયું છે, જ્યારે ચાર લોકોને ગંભીર ઇજા થતાં સારવાર અર્થે  હોસ્પિટલમાં ખસેડવામાં આવ્યા છે. હાલ બી-ડિવિઝન પોલીસે ફરાર કાર ચાલકની શોધખોળ હાથ ધરી છે. 

પાટણ: લીલીવાડી ચાર રસ્તા પાસે બાંકડા પર બેઠેલા 5 સિનિયર સીટીઝન પર ફળી વળી કાર, અકસ્માતમાં એકનું મોત ચારને ગંભીર ઇજા થતા હોસ્પિટલ ખસેડાયા, અકસ્માત સર્જી કાર ચાલક કાર મુકી થયો ફરાર, બી.ડિવિઝન પોલીસે ઘટનાસ્થળે પહોંચી તપાસ હાથ ધરી#patan #vtvgujarati #gujarat #news pic.twitter.com/J8CySBgaAs

— VTV Gujarati News and Beyond (@VtvGujarati) April 16, 2023

5 સિનિયર સિટીઝન પર ફરી વળી કાર
મળતી માહિતી અનુસાર, પાટણના લીલીવાડી ચાર રસ્તા પાસે ગઈકાલે રાત્રે બાંકડા પર બેઠેલા 5 સિનિયર સિટીઝન પર પૂરપાટ ઝડપે આવેલી કાર ફરી વળી હતી. જેમાં એક વ્યક્તિનું ઘટના સ્થળે જ મોત નીપજ્યું હતું. આ બનાવને પગલે રાહદારીઓના ટોળે ટોળા ઘટના સ્થળે એકઠા થઈ ગયા હતા. જોકે, અકસ્માત સર્જી કાર ચાલક કાર મુકીને ફરાર થઈ ગયો હતો. 

બી-ડિવિઝન પોલીસે તપાસ હાથ ધરી
આ બનાવની જાણ પોલીસને કરવામાં આવતા પોલીસની ટીમ ઘટનાસ્થળે દોડી આવી હતી અને 4 ઈજાગ્રસ્તોને સારવાર અર્થે તાત્કાલિક હોસ્પિટલમાં ખસેડવામાં આવ્યા હતા. હાલ બી-ડિવિઝન પોલીસની ટીમે કારના નંબરના આધારે ફરાર ચાલકની શોધખોળ હાથ ધરી છે.

ગીર સોમનાથમાં અકસ્માતમાં યુવકનું મોત
નોંધનીય છે કે, ગઈકાલે ગીર સોમનાથમાં હિટ એન્ડ રનની ઘટના સામે આવી હતી. જેમાં ઉના નજીક કંસારી રોડ પર અજાણ્યા વાહને યુવાનને હડફેટે લેતા યુવાન ગંભીર રીતે ઘાયલ થયો હતો. જે બાદ તેને સારવાર માટે હોસ્પિટલે લઈ જવામાં આવ્યો હતો. જ્યાં સારવાર દરમિયાન યુવાનનું મોત નિપજ્યું હતું. વાહન ચાલક અકસ્માત સર્જી ફરાર થઈ ગયો હતો.