આણંદના સિહોલ પાસે પશુઓ માટે ચારો લેતા નિકળેલી મહિલાને અકસ્માત નડ્યો હતો. જેમાં કારની અડફેટે મહિલાનું મોત નીપજ્યું હતું.
સિહોલ પાસે હિટ એન્ડ રનની ઘટના
કાર ચાલકે મહિલાને અડફેટે લેતા મૃત્યુ
પશુઓ માટે ચારો લેતા નિકળેલી મહિલાને નડ્યો અકસ્માત
આણંદમાં આજે હિટ એન્ડ રનની ગોઝારી ઘટના સામે આવી હતી. જેમાં પેટલાદના સિહોલ પાસે સર્જાયેલ આ ઘટનાને લઇને ચકચાર મચી જવા પામી હતી. બેફામ સ્પીડે આવતી કરના ચાલકે સ્ટેરિંગ પરનો કાબૂ ગુમાવી દઇ મહિલાને અડફેટે લીધી હતી. આ અકસ્માતમાં પશુઓ માટે ચારો લેતા નિકળેલી મહિલાને ગંભીર ઇજા પહોંચતા તેનું કમકમાટીભર્યું મોત નીપજ્યું હતું.
અકસ્માત બાદ કારચાલક શખ્સ કાર મુકીને ફરાર
અકસ્માતની ઘટનાને લઇને સ્થાનીક લોકોના ટોળેટોળા એકઠા થયા હતા. જેને લઇને આરોપી કાર કારચાલક શખ્સ કાર મુકીને નાશી છૂટયો હતો. બીજી તરફ આ ઘટનાની મહેડાવ પોલીસને જાણ કરવામા આવતા પોલીસ કાફલો તાત્કાલીક ઘટનાસ્થળે દોડી ગયો હતો. ગુન્હો નોંધી આજુબાજુના સીસીટીવી તપાસી આરોપી સુધી પહોંચવા કાર્યવાહી હાથ ધરી હતી. મહિલાના મોતની જાણ થતાં પરિવારમાં કાળો કલ્પાંત ફેલાયો છે.
સુરતમાં યુવકનું મોત, યુવતીને પહોંચી ઈજા
આ ઉપરાંત અકસ્માતની વધુ એક ઘટના સુરત જિલ્લામાં સામે આવી હતી. શહેરના ડુમ્મસ રોડ પર ટ્રક અને બાઈક વચ્ચે અકસ્માત સર્જાયો હતો. જેમાં કાળ બનીને આવેલા ટ્રકે બાઇક પર જઇ રહેલા યુવક-યુવતીને ઠોકરે લીધા હતા. આ ઘટનામાં બાઇક ચાલકનું ઘટના સ્થળે જ કમકમાટીભર્યું મોત નિપજ્યુ હતું. બીજી તરફ મહિલાને ગંભીર હાલતમાં સિવિલ હોસ્પિટલ ખાતે ખસેડવામાં આવી હતી. બીજી તરફ ટ્રક ડ્રાઈવર અકસ્માત કરી ફરાર થઇ ગયો હતો. પોલીસની તપાસમાં મૃતક AURO યુનિવર્સિટીમાં કર્મચારી હોવાનું સામે આવ્યું છે.