હિટ એન્ડ રનઃ સુરતમાં સરપંચના દીકરાએ નશામાં રોંગ સાઇડમાં કાર ચલાવતા 3ના મોત

સુરતઃ ડીંડોલી બ્રિજ પર થયેલા  હિટ એન્ડ રન મામલે પોલીસે કાર ચાલક અને તેના મિત્રની ધરપકડ કરી છે. મોડીરાત્રે પોલીસે આરોપીઓની ધરપકડ કરી છે. બીજી તરફ બ્રહ્મ સમાજે મૃતદેહ સ્વીકારવાનો ઈન્કાર કર્યો હતો. જ્યાં બ્રહ્મ સમાજના લોકો સ્મીમેર હોસ્પિટલ એકઠા થયા હતા.

દિવ્યેશ અગ્રવાલ અગાઉ હત્યા જેવા ગુનાઓમાં ઝડપાઈ ચૂક્યો છે. અકસ્માત સમયે દિવ્યેશ કાર ચલાવી રહ્યો હતો. દિવ્યેશ પોલીસ સાથે પણ ઘરોબો ધરાવે છે. દિવ્યેશ નશાની હાલતમાં હોવાનો સ્થાનિકોનો આરોપ છે.

મળતી માહિતી પ્રમાણે કાર ચાલક નશાની હાલતમાં ધૂત હતો. ઓવરબ્રિજ પર પાંચથી છ લોકોને અડફેટે લીધા હતા. જેમાં એક પુરુષ મહિલા અને બાળકનું ઘટના સ્થળ પર જ મોત થયું છે. સૂત્રો તરફથી મળતી માહિતી પ્રમાણે કારમાં 5 થી 6 લોકો સવાર હતા. આ તમામ લોકો પોલીસકર્મીઓ હોવાની માહિતી છે.



જોકે અકસ્માત બાદ આ તમામ લોકો ફરાર થઈ ગયા છે. ઘટના અંગે જાણ થતા જ ડીંડોલી પોલીસ સહિત ઉચ્ચ અધિકારીઓ ઘટના સ્થળ પર દોડી આવ્યા છે. ત્રણેય મૃતદેહને પીએમ માટે મોકલી કાર ચાલકોની શોધખોળ હાથ ધરી છે. જોકે પોલીસ તપાસમાં આ કાર ગોડાદરાના સરપંચના પુત્રની હિતેષની ગાડી હોવાનું સામે આવ્યું છે.

ઉલ્લેખનીય છે કે અકસ્માતમાં એક જ પરિવારના 3 લોકોના મોત થયા હતા. માતા-પિતા એક બાળકીનું મોત થયું હતું.