વાહ / એક સમયની ખ્યાતનામ 'એમ્બેસેડર' બનાવનારી કંપની લાવી રહી છે પોતાનું ઇલેક્ટ્રિક સ્કૂટર, જલ્દી મોટું સરપ્રાઈઝ આપવાની તૈયારીમાં

• ભારતીય માર્ગો પર એક વખત ફરીથી 'એમ્બેસેડર'ની વાપસી!
• કંપની આવતા વર્ષ સુધીમાં ઈલેક્ટ્રીક સ્કૂટર લોન્ચ કરી શકે
• ટુ-વ્હીલર બાદ ઈલેક્ટ્રીક ફોર વ્હીલર બનાવવા અંગે વિચારણા થશે

હિન્દુસ્તાન મોટર્સ આવતા વર્ષે મોટો વિસ્ફોટ કરવાની તૈયારીમાં

ભારતીય માર્ગો પર એક વખત ફરીથી એમ્બેસેડરની વાપસી થઇ રહી છે. એમ્બેસેડર કાર બનાવનારી કંપની હિન્દુસ્તાન મોટર્સ આવતા વર્ષે મોટો વિસ્ફોટ કરવાની તૈયારીમાં છે. કંપની આવતા વર્ષ સુધીમાં ઈલેક્ટ્રીક સ્કૂટર લોન્ચ કરી શકે છે. કંપનીના એક વરિષ્ઠ અધિકારીએ કહ્યું કે ટુ-વ્હીલર બાદ ઈલેક્ટ્રીક ફોર વ્હીલર બનાવવા અંગે વિચાર કરી શકાય છે. 

પ્લાન્ટને કરવો પડશે તૈયાર 

હિન્દુસ્તાન મોટર્સના નિર્દેશક ઉત્તમ બોસે કહ્યું કે બંને કંપનીઓની વચ્ચે ડીલની પ્રક્રિયા જુલાઈમાં શરૂ થશે. આ જોઈન્ટ વેન્ચર ત્રણ મહિનામાં સંપૂર્ણ આકાર લેશે. તેમણે કહ્યું કે ટુ-વ્હીલર પ્રોજેક્ટના બે વર્ષ વેપારીકરણ બાદ ફોર વ્હીલર ઈલેક્ટ્રીક વેહીકલ બનાવવા અંગે નિર્ણય કરવામાં આવશે. બોસે કહ્યું કે નવા યુનિટની રચના બાદ પાયલોટ પ્રોજેક્ટને શરૂ થવામાં બે થી  ત્રણ ક્વાર્ટરની જરૂર પડશે. હિન્દુસ્તાન મોટર્સનુ સ્કૂટર આવતા વર્ષ સુધીમાં માર્કેટમાં આવી શકે છે. બોસે એવુ પણ કહ્યું કે તેના ઉત્તરપાડા પ્લાન્ટને રેટ્રો-ફિટ કરવો પડશે. કારણકે ઈલેક્ટ્રોનિક હાર્ડવેર અને સૉફ્ટવેરની સાથે અમુક કંટ્રોલ પેનલ્સ બદલવાની જરૂર છે. 

2014માં બંધ થયો હતો પ્લાન્ટ

કંપનીની એમ્બેસેડરની કારની માંગમાં ઘટાડો થવાને કારણે 2014માં પ્લાન્ટને બંધ કરવામાં આવ્યો હતો. કંપની પાસે ઉત્તરપારામાં 275 એકરનો લેન્ડ એરિયા છે, જેમાં 90 એકરમાં ફેલાયેલા આ પ્લાન્ટનો પણ સમાવેશ થાય છે. ઓક્ટોબર 2014માં કંપનીએ આ પ્લાન્ટને જ્યારે બંધ કર્યો ત્યારે તેમાં 2300 કર્મચારી કામ કરતા હતા. અત્યારે તેની સંખ્યા અંદાજે 300 છે. બોસે કહ્યું કે હિન્દુસ્તાન મોટર્સ હવે નફો કમાઈ રહી છે અને સંપૂર્ણ રીતે દેવામુક્ત કંપની છે.