મહિલાઓ સુરક્ષિત છે તેવી વાતો વચ્ચે રોજ દેશ અને રાજ્યમાં અનેક મહિલાઓ અને દીકરીઓ હેવાનોનો ભોગ બની રહી છે. તાજેતરમાં જ હરિયાણામાં એક દીકરીની જાહેરમાં એક નરાધમે ગોળી મારી હત્યા કરી નાખી. જે ઘટનાના પડઘા હિંમતનગરમાં પડ્યા છે. જ્યાં યુવાનોએ જ દીકરીઓ અને મહિલાઓની સુરક્ષા માટે એક પહેલ શરૂ કરી છે. ત્યારે જાણો શું છે આ પહેલ...
હવે એક પત્ર ઉતારી દેશે રોમિયોગિરી
હિંમતનગરના યુવાનોની પહેલને સલામ
આવી રીતે કરો દીકરીઓની સુરક્ષા
તાજેતરમાં જ હરિયાણામાં નિકિતા નામની દીકરીને જાહેરમાં એક નરાધમે ગોળી મારી હત્યા કરી નાખી. જેના પડઘા આખા દેશમાં પડયા છે. ત્યારે આ પડઘાની અસર હિંમતનગરના યુવા સંગઠન પર પણ પડયા છે. યુવાનોએ બહેન-દીકરીઓની રક્ષા માટે મુહિમ શરૂ કરી છે. બહેન-દીકરીઓની રક્ષા માટે ફરિયાદ બોક્સ બનાવ્યું છે. એવું ફરિયાદ બોક્સ કે, જે આખા ઉત્તર ગુજરાતની બહેન-દીકરીઓની રક્ષા કરશે.
હિંમતનગરના યુવા સંગઠન દ્વારા શરૂ કરવામાં આવેલું આ ફરિયાદ બોક્સ તમામ મંદિરો, દેરાસર, જાહેર રસ્તા સહિતની તમામ જગ્યાઓ પર મુકવામાં આવશે. જેમાં કોઈપણ મહિલા કે, વિદ્યાર્થિની તેની છેડતી કરનાર વિશે ચીઠ્ઠી દ્વારા ફરિયાદ કરી શકે છે. જોકે આ માટે મહિલા કે વિદ્યાર્થિનીએ છેડતી કરનારની વિગત આપવી પડશે. આમ તે છેડતી કરનાર સામે પોલીસ ફરિયાદ સુધીની કાર્યવાહી કરવામાં આવશે. જેથી તે ફરી કોઈની પણ છેડતી કરવાતા પહેવા 10 વખત વિચારશે. જોકે અહીં મહિલા કે વિદ્યાર્થિનીની માહિતી ગૃપ્ત રાખવામાં આવશે.
અસામાજિક તત્વો અને રોમિયોની છેડતીથી બહેન-દીકરીઓને બચાવવા માટે યુવાનો દ્વારા ઉત્તમ પહેલ કરવામાં આવી છે. એક તરફ હેવાનિયતની વધતી ઘટનાઓ સામે માતા-પિતા અને બહેન-દીકરીઓમાં ડરનો માહોલ ફેલાયો છે. તેવામાં આ રીતે યુવાનો દ્વારા જ મહિલાઓની સુરક્ષા માટે સુંદર અભિયાન શરૂ કરાયું છે. આ પહેલને VTV આવકારે છે. આશા રાખીએ કે, રાજ્યના દરેક યુવા સંગઠનો આ પ્રકારની પહેલ કરે, જેથી રાજ્યની દરેક બહેન-દીકરી નિડર બની બહાર નિકળી શકે, હેવાનોનો ભોગ બનતા બચી શકે.