સત્તાનો તાજ / હિમાચલમાં CMને લઈ સસ્પેન્સ યથાવત: કોંગ્રેસના નિરીક્ષકો આજે રિપોર્ટ સોંપતા જ ફાઇનલ નામ પર હાઈકમાન્ડ મારશે અંતિમ મહોર!

• હિમાચલમાં CM પદ માટે હજુ પણ અડચણો
• ધારાસભ્યોએ પાર્ટી હાઇકમાન્ડ પર નિર્ણય છોડ્યો
• હિમાચલમાં કોંગ્રેસે 40 બેઠક મેળવી જીત હાંસીલ કરી

હિમાચલની સીટ કોંગ્રેસે જીતી છે પરંતુ કોને મુખ્યમંત્રી બનાવવા એ હજુ ફાઈનલ થયું નથી. આજે શિમલામાં ધારાસભ્ય દળની બેઠક બાદ પાર્ટીના નિરીક્ષકો પોતાનો રિપોર્ટ પાર્ટી હાઈકમાન્ડને સોંપશે. કોંગ્રેસના હિમાચલ પ્રભારી રાજીવ શુક્લાએ બેઠક બાદ કહ્યું હતું કે ધારાસભ્યોએ સર્વસંમતિથી એક લીટીનો ઠરાવ પસાર કર્યો છે. તેનો રિપોર્ટ શનિવારે હાઈકમાન્ડને સોંપવામાં આવશે. 

હાઈકમાન્ડ નક્કી કરશે CM ચહેરો
કોંગ્રેસના નિરીક્ષકો ભૂપેન્દ્ર સિંહ હુડ્ડા, ભૂપેશ બઘેલ અને રાજ્ય પ્રભારી રાજીવ શુક્લાએ શુક્રવારે શિમલામાં પાર્ટીના ધારાસભ્યો સાથે બેઠક યોજી હતી. જો કે આ બેઠકમાં મુખ્યમંત્રીના ચહેરા પર મહોર લાગી શકી ન હતી, ત્યારબાદ ધારાસભ્યોએ એક લીટીનો ઠરાવ પસાર કરીને નિર્ણય હાઈકમાન્ડ પર છોડી દીધો હતો. હવે પાર્ટી હાઈકમાન્ડ હિમાચલ પ્રદેશના નવા મુખ્યમંત્રીનું નામ નક્કી કરશે.  

જનતાની 10 ગેરંટી પૂરી કરીશું:- કોંગ્રેસ
આ દરમિયાન શુક્લાએ કહ્યું કે કોંગ્રેસ રાજ્યમાં સરકાર બનાવીને ખુશ છે અને અમે રાજ્યની જનતાને આપવામાં આવેલી 10 ગેરંટી પૂરી કરવા અને વધુ સારું શાસન આપવા માટે બધું જ કરીશું. રાજીવ શુક્લાએ કહ્યું કે કોંગ્રેસ પાર્ટી પૂર્વ મુખ્યમંત્રી વીરભદ્ર સિંહનું સન્માન કરે છે. જો કે, આ દરમિયાન, તેમણે રાજ્યના પ્રથમ મહિલા મુખ્ય પ્રધાન અથવા હિમાચલના કોઈ નેતા દ્વારા ટોચના પદનું પ્રતિનિધિત્વ કરવાની સંભાવનાને લગતા પ્રશ્નોને ટાળ્યા હતા. 

સમર્થકોએ નારા લગાવ્યા
કોંગ્રેસ વિધાયક દળની બેઠક પહેલા, મુખ્યમંત્રી પદના ઉમેદવારો પ્રતિભા સિંહ, મુકેશ અગ્નિહોત્રી અને સુખવિંદર સિંહ સુખુ તેમના સમર્થકો સાથે શિમલામાં પાર્ટી કાર્યાલય પર પહોંચ્યા. જ્યાં સમર્થકોએ તેમની તરફેણમાં સૂત્રોચ્ચાર કર્યા હતા. તમને જણાવી દઈએ કે 68 સભ્યોની હિમાચલ વિધાનસભામાં કોંગ્રેસે 40 બેઠકો જીતીને ભાજપ પાસેથી સત્તા છીનવી લીધી છે.  

પ્રતિભાના સમર્થકોએ સૂત્રોચ્ચાર કર્યા હતા
વિધાનમંડળ પક્ષની બેઠક પહેલા, હિમાચલ કોંગ્રેસના વડા અને પૂર્વ સીએમ વીરભદ્ર સિંહના પત્ની પ્રતિભા સિંહના સમર્થકોએ પાર્ટીના કેન્દ્રીય સુપરવાઈઝર ભૂપિંદર સિંહ હુડ્ડા અને ભૂપેશ બઘેલના વાહનોને રોક્યા અને તેમના સમર્થનમાં સૂત્રોચ્ચાર કર્યા. આ ઘટના ત્યારે બની જ્યારે કેન્દ્રીય નિરીક્ષક શુક્લા સાથે રાજ્યપાલ રાજેન્દ્ર વિશ્વનાથ આર્લેકરને મળવા જઈ રહ્યા હતા. કેન્દ્રીય નેતાઓએ પાર્ટીના વિજેતા ધારાસભ્યોની યાદી રાજ્યપાલને સુપરત કરી અને સરકાર રચવા માટે ઔપચારિક રીતે દાવો કરવા માટે સમય માંગ્યો. 

ખડગેએ કહ્યું- રિપોર્ટના આધારે નિર્ણય લેવામાં આવશે
બીજી તરફ હિમાચલ પ્રદેશમાં મુખ્યમંત્રીને લઈને પાર્ટી અધ્યક્ષ મલ્લિકાર્જુન ખડગેએ દિલ્હીમાં કહ્યું કે પહાડી રાજ્યમાં મોકલવામાં આવેલા નિરીક્ષકોએ પાર્ટીના તમામ ધારાસભ્યોને અંગત મંતવ્યો પૂછ્યા. ત્યારપછી નિરીક્ષકો અમને ધારાસભ્યો વિશે જણાવશે, જેના આધારે પાર્ટી મુખ્યમંત્રી પદના ઉમેદવાર નક્કી કરશે. સીએલપીની બેઠક પહેલા મીડિયા સાથે વાત કરતા કોંગ્રેસ નેતા સુખુએ કહ્યું કે હું મુખ્યમંત્રી પદનો ઉમેદવાર નથી. હું માત્ર કોંગ્રેસનો કાર્યકર છું અને હાઈકમાન્ડ જે પણ નિર્ણય લેશે તે સ્વીકારવામાં આવશે. 

અંતિમ નિર્ણય હાઈકમાન્ડ લેશેઃ વિક્રમાદિત્ય
આ પહેલા 66 વર્ષીય પ્રતિભા સિંહે સંકેત આપ્યા હતા કે તેઓ મુખ્યમંત્રી પદની રેસમાં છે. આ વાત તેમના પુત્રએ પણ કહી હતી. તેમના પુત્ર અને શિમલા ગ્રામીણના કોંગ્રેસના ધારાસભ્ય વિક્રમાદિત્ય સિંહે કહ્યું હતું કે હું મુખ્યમંત્રી પદની રેસમાં નથી, પરંતુ મારી માતા મુખ્યમંત્રી પદના દાવેદારોમાંથી એક છે. તેમણે કહ્યું કે તમામ ધારાસભ્યોની બેઠક બોલાવવામાં આવી છે અને અંતિમ નિર્ણય હાઈકમાન્ડ દ્વારા લેવામાં આવશે. ધારાસભ્યોની સામૂહિક ઈચ્છાને ધ્યાનમાં લેવામાં આવશે અને ત્યારબાદ નિરીક્ષકો હાઈકમાન્ડ સુધી પહોંચાડશે. 

મુખ્યમંત્રી પદની રેસમાં ત્રણ નેતાઓ
આ સાથે વિક્રમાદિત્ય સિંહે કહ્યું હતું કે જો તેમની માતાને સીએમ બનાવવામાં આવશે તો તેઓ તેમની શિમલા ગ્રામીણ સીટ ખાલી કરશે, કારણ કે પ્રતિભા સિંહ હજુ સુધી વિધાનસભાના સભ્ય નથી. હિમાચલ કોંગ્રેસના પ્રમુખ પ્રતિભા સિંહ, સુખવિંદર સિંહ સુખુ અને હરોલીના ધારાસભ્ય મુકેશ અગ્નિહોત્રીને મુખ્યમંત્રી પદના પ્રબળ દાવેદાર માનવામાં આવે છે. પ્રતિભા સિંહ અને સુખવિંદર સિંહ સુખુ બંને પ્રભાવશાળી રાજપૂત સમુદાયના છે, જ્યારે મુકેશ અગ્નિહોત્રી બ્રાહ્મણ છે. અત્યાર સુધી શાંતા કુમાર એકમાત્ર બ્રાહ્મણ હતા જે બે વખત મુખ્યમંત્રી બન્યા છે.