એક બાજુ ગુજરાતમાં વાયુ વાવાઝોડું લોકોને ડરાવી રહ્યું છે તો બીજી બાજુ પહાડ પર વરસાદ આફત બનીને વરસી રહ્યો છે. હિમાચલ પ્રદેશના ચંબામાં આભ ફાટવાની ઘટના બની છે. જબરદસ્ત વરસાદ અને કરાએ ચંબામાં વિનાશ વેર્યો છે. વરસાદ અને પૂરના કારણે ઘણી જગ્યાએ લેેન્ડ સ્લાઇડ થઇ છે.
ઘણી જગ્યાએ ખૂબ જ ઝડપી પવનો ફૂંકાવાની સાથે વરસાદ પડતાં રસ્તાઓ ધોવાઇ ગયા છે અને મકાનોને મોટી સંખ્યામાં નુકસાન પહોંચ્યું છે. બિહાર સહિત ઉત્તર ભારતમાં જબરદસ્ત આંધીએ હાહાકાર મચાવ્યો છે. બિહારના નાલંદા અને મનેરમાં નવ લોકો મોતને ભેટ્યા છે.
પ્રાપ્ત જાણકારી અનુસાર બિહારના નાલંદા જિલ્લામાંથી ચાર લાશ મળતાં હાહાકાર મચી ગયો છે. મનેરમાં પણ પાંચ લોકો આંધીના કારણે મૃત્યુ પામ્યા છે. હિમાચલ પ્રદેશના ચંબામાં ભારે વરસાદના કારણે ઘણી જગ્યાએ લેન્ડ સ્લાઇડની ઘટના બની છે. આ કારણે ચંબા-ભરમોર નેશનલ હાઇવે સંપૂર્ણ રીતે જામ થઇ ગયો છે.
સતત વરસાદના કારણે ઘણાં ઘર તબાહ થઇ ગયાં છે. પહાડની વચ્ચે પ્રચંડ વેગ સાથે પડતો વરસાદ રસ્તાઓને ચીરતો નીકળી ગયો. પહાડમાંથી તૂટતા પથ્થર અને વરસાદના કારણે લોકોનાં ઘર પણ તબાહ થયાં છે. મોન્સૂન શરૂ થાય તે પહેલાં ચંબાના અલગ અલગ ભાગમાં આભ ફાટવાની ઘટના બની છે.
અહીં વરસાદની સાથે કરા પણ પડી રહ્યા છે. આકાશમાંથી વીજળી પડવાના પણ સમાચાર છે. ઘણી જગ્યાએ જાનવરનાં મૃત્યુ થયાં છે. આ તબાહીમાં ૧૪૦ ઘેટાં-બકરાં મૃત્યુ પામ્યાં છે. ચંબાના અપ્પર લેચ ગામમાં ઘણાં મકાન નષ્ટ થઇ ગયાં છે. હાઇવેના કિનારે વસેલાં ઘરમાં પાણી ઘૂસી ગયાં છે. જબરદસ્ત વરસાદે ચંબા-ભરમોર હાઇવેને સંપૂર્ણ જામ કરી દીધો છે.
અહીં બકાણ પુલની પાસે ઉપરની તરફથી સતત કાળમાળ ધસી રહ્યો છે. વાહનોની અવરજવર પણ ઠપ થઇ ગઇ છે. છેલ્લા ચાર દિવસથી વરસાદ આફત બનીને વરસી રહ્યો છે. રજેરાથી લઇને રાક સુધી ભારે વરસાદના કારણે રસ્તાઓ બંધ થઇ ગયા છે. સાંજના પાંચ વાગ્યે બનેલી ઘટનાના ચાર કલાક બાદ પણ કોઇ અધિકારી કે કર્મચારી જોવા આવ્યા નથી.
દિલ્હીમાં આંધીના કારણે ર૭ ફ્લાઇટ ડાઇવર્ટ કરાઈ
દિલ્હીમાં ગઇ કાલે સાંજે અચાનક ધૂળની ડમરીઓ સાથે આંધીના કારણે ઇન્દિરા ગાંધી ઇન્ટરનેશનલ એરપોર્ટ પર આવી રહેલી ર૭ ફલાઇટ ડાઇવર્ટ કરાઇ છે. ઘણાં વિમાન ઉડાન ભરી શકયાં નથી. ફ્લાઇટ ઓપરેશન લગભગ રપ મિનિટ સુધી પ્રભાવિત રહ્યું. ત્યારબાદ લેિન્ડંગ અને ટેક ઓફ ફરી વખત શરૂ કરાયું. બીજી તરફ અરબ સાગરમાં ઊઠેલા ચક્રવાતી તોફાનના કારણે મુંબઇમાં પણ ખૂબ જ વરસાદ પડ્યો. પર્યટકોની સુરક્ષા જોતાં મુંબઇ સહિત મહારાષ્ટ્રના ઘણા બીચ બે દિવસ માટે બંધ કરી દેવાયા છે.