ચિંતા / હિમાચલમાં બર્ડ ફ્લૂના કારણે 1700 પક્ષીઓના મોત, પર્યટકોની એન્ટ્રીને લઈને તંત્રનો મહત્વનો નિર્ણય

• બર્ડ ફ્લૂના કારણે હિમાચલ પ્રદેશમાં 1700 પક્ષીના મોત 
• તંત્રએ પોંગ તળાપ પ્રવાસીઓ માટે કર્યું બંધ 
• શિયાળામાં લાખો પક્ષીઓ આવે છે 

સ્થાનિક પ્રશાસને પોંગ ડેમમાં મૃત મળી આવેલા પક્ષીઓનો નમૂના ભોપાલ મોકલ્યો હતો. અહીંથી આ પક્ષીઓનો તપાસ રિપોર્ટ પોઝિટિવ આવ્યો છે. વન વિભાગનું કહેવું છે કે, મોટી સંખ્યામાં પક્ષીઓના મોત બાદ વહીવટીતંત્રે આ પગલું ભર્યું હતું. ભોપાલના રિપોર્ટમાં, બધા પક્ષીઓમાં H5N1 એવિયન ઈન્ફલ્યુએન્ઝા વાયરસ મળી આવ્યા છે.

શિયાળામાં લાખો પક્ષીઓ આવે છે 

આપને જણાવી દઇએ કે આ પ્રવાસી પક્ષીઓની એક સેન્ચ્યુરી હિમાચલ પ્રદેશની રાજધાની શિમલાથી આશરે 300 કિલોમીટર દૂર કાંગરાના પોંગ જળાશયમાં બનાવવામાં આવી છે. દર વર્ષે સાઇબેરીયા અને મધ્ય એશિયાના ઠંડા પ્રદેશોમાંથી શિયાળામાં લાખો પક્ષીઓ આવે છે અને ફેબ્રુઆરી - માર્ચ સુધી રહે છે. આ પછી, આ પક્ષીઓ ફરીથી પાછા ફરે છે.

અન્ય રાજ્યોમાં પણ ચિંતા વધી 

કોરોના વાયરસનો ખતરો હજી ટળ્યો નથી ત્યાં વધુ એક બીમારીએ સમગ્ર દેશની ચિંતામાં વધારો કર્યો છે. ભારતમાં બર્ડ ફ્લૂના કિસ્સાઓ પ્રકાશમાં આવ્યા છે. બર્ડ ફ્લૂ એવિયન ઈન્ફલ્યુએન્ઝા વાયરસ(H5N1)ના કારણે થાય છે. રાજસ્થાન, મધ્ય પ્રદેશ, ઝારખંડ અને હિમાચલ પ્રદેશમાં આ વાયરસને લઇને એલર્ટ જાહેર કરવામાં આવ્યું છે. આ વાયરસ પક્ષીઓ માટે ખૂબજ ખતનાક સાબિત થઇ રહ્યો છે. 

પ્રવાસીઓની એન્ટ્રી પર પ્રતિબંધ

આ વર્ષે અત્યાર સુધીમાં ફક્ત થોડા જ દિવસોમાં 1700 પક્ષીઓનાં મોત નીપજ્યાં છે. આ પછી, જિલ્લા વહીવટીતંત્ર દ્વારા આ જળાશયની આસપાસ ચિકન, ઇંડા સહિતના મરઘાં ઉત્પાદનોના વેચાણ પર પ્રતિબંધ મૂકવામાં આવ્યો છે. પોંગ તળાવના એક કિલોમીટરના ક્ષેત્રમાં આવતા ક્ષેત્રને એક ચેતવણી ઝોન જાહેર કરાયો છે. વહીવટીતંત્રે પ્રવાસીઓને પણ આ વિસ્તારોમાં ન જવા કહ્યું છે.

માનવી માટે ખતરનાક 

બર્ડ ફ્લૂ એ વાયરલ ઇન્ફેક્શન જેવું છે જે માત્ર પક્ષીઓ માટે જ નહીં પણ અન્ય પ્રાણીઓ અને માણસો માટે પણ એટલું જ જોખમી છે. બર્ડ ફ્લૂથી સંક્રમિત પક્ષીઓના સંપર્કમાં આવતા પ્રાણીઓ અને માણસો તેનાથી સરળતાથી સંક્રમિત થઈ જાય છે. આ વાયરસ એટલો ખતરનાક છે કે તે મૃત્યુનું કારણ પણ બની શકે છે.

શેનાથી ફેલાય છે ? 

એવિયન ઈન્ફ્લૂએન્જા -H5N1 વાયરસ બર્ડ ફ્લૂના નામથી જાણીતો છે. આ ખતરનાક વાયરસ પક્ષીઓને અધિક પ્રભાવિત કરે છે. ખાસ કરીને મરઘાં-મરઘીઓ અને અન્ય પક્ષીઓ તેનો શિકાર ઝડપથી બને છે. તેની અસરથી પક્ષીઓ અને માણસો મોતને ભેટી શકે છે. WHOના આંકડા અનુસાર 2003 પછી બર્ડ ફ્લૂની બિમારીથી 332 લોકોના મોત નીપજ્યા છે. તો WHO ના એક રિસર્ચ અનુસાર H5N1 વાયરસ પર જો કાબૂ ન કરી શકાય તો ભયંકર રોગચાળો ફેલાઈ શકે છે.