BIG NEWS / હિજાબ વિવાદ હવે પહોંચ્યો સુપ્રીમ કોર્ટ, કર્ણાટક હાઈકોર્ટના ચુકાદા વિરુદ્ધ કરાઈ અરજી

• કર્ણાટક હાઇકોર્ટના નિર્ણયને પડકાર ફેંકતી અરજી સુપ્રીમમાં દાખલ
• હિજાબ મામલે આજે કર્ણાટક હાઇકોર્ટે આપ્યો હતો મહત્વનો ચુકાદો
• શાળા-કોલેજમાં હિજાબ પહેરવો જરૂરી નથી : કર્ણાટક હાઇકોર્ટ

હિજાબ વિવાદને લઇને આજે કર્ણાટક હાઇકોર્ટે મહત્વનો ચુકાદો આપ્યો છે. જેમાં કર્ણાટક હાઇકોર્ટે આજે વિદ્યાર્થીનીઓની અરજી ફગાવી દીધી. કોર્ટે કહ્યું કે, "શાળા-કોલેજમાં હિજાબ પહેરવો જરૂરી નથી.'' પરંતુ હવે કોલેજની 6 મુસ્લિમ છોકરીઓએ હાઈકોર્ટના નિર્ણયને સુપ્રીમ કોર્ટમાં પડકાર્યો છે. આ તમામ યુવતીઓ હાઈકોર્ટમાં અરજદાર રહી ચૂકી છે. બીજી તરફ, સુપ્રીમ કોર્ટમાં હિન્દુ સેના દ્વારા અરજી દાખલ કરવામાં આવી કે જેમાં કર્ણાટક હાઈકોર્ટના આદેશ સામેની અપીલમાં કોઈ પણ આદેશ પસાર કરવામાં આવે તે પહેલાં સુનાવણીની વિનંતી કરાઇ.

તમને જણાવી દઇએ કે, હિજાબ મામલે કર્ણાટક હાઈકોર્ટે આજે મોટો ચુકાદો આપ્યો છે. આ સાથે જ હાઈકોર્ટે વિદ્યાર્થીઓની અરજી પણ ફગાવી દીધી. શાળા-કોલેજમાં હિજાબ પહેરવો જરૂરી નથી તથા હિજાબ એ ધર્મનો અનિવાર્ય હિસ્સો નથી તેવું કર્ણાટક હાઈકોર્ટે કહ્યું. શાળામાં હિજાબ પહેરવો જરૂરી નથી. તેવું હાઈકોર્ટે તારણ કાઢ્યું અને આખરે આ અરજીને ફગાવી દેવામાં આવી. 

9 ફેબ્રુઆરીમાં અરજી દાખલ કરાઇ હતી

આપને જણાવી દઈએ કે, ઉડ્ડપીની છોકરીઓ દ્વારા દાખલ કરવામાં આવેલી એક અરજી પર 9 ફેબ્રુઆરીએ મુખ્ય ન્યાયાધીશ રિતૂ રાજ અવસ્થી, ન્યાયમૂર્તિ કૃષ્ણા એસ દીક્ષિત અને ન્યાયમૂર્તિ જેએમ ખાજીની હાઈકોર્ટે પૂર્ણ પીઠનું ગઠન કર્યું હતું. છોકરીઓએ અરજીમાં કહ્યું કે, ક્લાસની અંદર હિજાબ પહેરવાની મંજૂરી આપવી જોઈએ, કારણ કે, આ તેમની આસ્થાનો ભાગ છે. 

આ અગાઉ 1 જાન્યુઆરીએ, ઉડ્ડપીની એક કોલેજના અધિકારીઓ દ્વારા હિજાબના કારણે ક્લાસમાં પ્રવેશ કરતા રોક્યા બાદ 6 વિદ્યાર્થિનીઓએ કેમ્પસ ફ્રંટ ઓફ ઈંડિયા દ્વારા આયોજીત એક પત્રકાર પરિષદમાં ભાગ લીધો હતો અને કોલેજના આદેશનો વિરોધ કર્યો હતો, ત્યાર બાદ ભારે હોબાળો મચી ગયો હતો.

1. I disagree with Karnataka High Court's judgement on #hijab. It’s my right to disagree with the judgement & I hope that petitioners appeal before SC

2. I also hope that not only @AIMPLB_Official but also organisations of other religious groups appeal this judgement...

— Asaduddin Owaisi (@asadowaisi) March 15, 2022

અસદુદ્દીન ઓવૈસી હાઈકોર્ટના ચુકાદાથી અસહમત

AIMIMના પ્રમુખ અને હૈદરાબાદથી સાંસદ અસદુદ્દીન ઓવૈસી સ્કૂલ-કોલેજમાં હિજાબ પહેરવા અંગે કર્ણાટક હાઈકોર્ટના ચુકાદા સાથે સહમત ન હોવાનું જણાવ્યું. આ અંગેની માહિતી તેમણે ટ્વિટ કરીને આપી હતી. તેમણે કહ્યું કે, 'ચુકાદા સાથે અસહમત થવાનો મારો હક્ક છે. હું આશા રાખું કે અરજદારો આ મુદ્દે સુપ્રીમ કોર્ટમાં અપીલ કરે.'

ચુકાદા પર કોઈ પણ પ્રકારના જશ્ન પર પ્રતિબંધ લગાવાયો

ચુકાદો આવે તે પહેલા શિવમોગાના ડીસી આર સેલ્વામણિએ જિલ્લામાં મંગળવારે સ્કૂલ અને કોલેજોમાં રજા જાહેર કરી દીધી છે. તેમણે કાયદો અને વ્યવસ્થા બનાવી રાખવા માટે જિલ્લામા સીઆરપીસી આદેશની કલમ 144 લાગૂ કરી દીધી છે. આ આદેશ મંગળવારે સવારે 6 વાગ્યાથી 21 માર્ચ રાતના 10 વાગ્યા સુધી લાગૂ રહેશે. શિક્ષકો અને વિદ્યાર્થીઓને ઉપરાંત કોઈ પણ કોલેજ કે શાળા પરિસરમાં આવી શકશે નહીં.

આ ઉપરાંત ચુકાદાને લઈને કોઈ પણ પ્રકારના જશ્ન પર પણ રોક લગાવી દેવામાં આવી છે. શિવમોગાના એસપીએ કહ્યું છે કે, શિવમોગામાં આઠ કેએસઆરપી બટાલિયન, 6 ડીએઆર, 1 આરએએફની ટુકડી તૈનાત કરી દેવામાં આવી છે. 

ચીફ જસ્ટિસના ઘરની સુરક્ષામાં વધારો

હિજાબ વિવાદ મુદ્દે કર્ણાટક હાઈકોર્ટના ચુકાદા પહેલાં ચીફ જસ્ટિસ રિતુરાજ અવસ્થીના ઘરની બહાર સુરક્ષા વધારી દેવાઇ હતી. બેંગલુરુ સહિત કર્ણાટકના પાંચ જિલ્લાઓમાં કલમ 144 લાગુ કરીને તમામ પ્રકારના સરઘસ અને લોકોના ભેગાં થવા પર પ્રતિબંધ લગાવવામાં આવ્યો હતો. તો બીજી તરફ સમગ્ર કર્ણાટકમાં કલમ 144 લાગુ કરીને સ્કૂલ-કોલેજોને બંધ કરી દેવાઇ હતી.