શહેરમાં પોલીસના ડર વગર બુટલેગરો બિનધાસ્ત દારૂ-જુગારના અડ્ડા ચલાવી રહ્યા છે. પોલીસની મીલીભગત ગણો કે પછી તેની જાણ બહાર બુટલેગરો રાજસ્થાન તેમજ અન્ય રાજ્યમાંથી વિદેશી દારૂનો જથ્થો લાવીને ઊંચી કિમતે વેચી રહ્યા છે.
કાલુપુર રેલવે સ્ટેશન કે જેને હાઇસિક્યોરિટી ઝોન પણ ગણવામાં આવે છે તેવી જગ્યા ઉપર પણ દારૂનો અડ્ડો ધમધમતો હોવાનો પર્દાફાશ થયો છે. ગઇ કાલે રાત્રે પીસીબીની ટીમે રેલવે સ્ટેશનના પ્લેટફોર્મ નંબર ૧રથી ૧૦૦ મીટરના અંતર પર ચાલતા દારૂના અડ્ડાનો પર્દાફાશ કરતાં ચાર લાખની રોકડ સહિત ૭૬ વિદેશી દારૂની બોટલો સાથે એક સગીરની ધરપકડ કરી છે.
રેલવે સ્ટેશન પર ધમધોકાર અડ્ડો ચાલતાં રેલવેતંત્રની સંડોવણીના મામલે અનેક તર્કવિતર્ક સર્જાય છે. અમદાવાદ પીસીબીની ટીમે કાલુપુર રેલવે સ્ટેશનના પ્લેટફોર્મ નંબર ૧ર પર ચાલતા દારૂના અડ્ડા પર દરોડા પાડતાં ખળભળાટ મચી જવા પામ્યો છે.
પીસીબીને બાતમી મળી હતી કે કુખ્યાત બુટલેગર અનવર રેલવે સ્ટેશનના પ્લેટફોર્મ નંબર ૧ર પર દારૂ વેચી રહ્યો છે. બાતમીના આધારે પીસીબીની ટીમે દરોડા પાડતાં જાહેરમાં દારૂનો અડ્ડો ચાલતો હતો.
પોલીસને જોઈ દારૂડિયામાં નાસભાગ મચી ગઈ હતી અને બુટલેગર અનવર સહિત તેના બે સાગરીતો પણ નાસી છૂટ્યા હતા. પોલીસે ઘટનાસ્થળ પરથી ૪ લાખ રોકડા અને ૭૬ વિદેશી દારૂની બોટલ સાથે સગીરની અટકાયત કરી છે. કાલુપુરુ રેલવે પોલીસે આ મામલે તપાસ શરૂ કરી છે.
કાલુપુર રેલવે સ્ટેશનની પ્રિમાઇસીસમાં જુગાર પણ રમાય છે ત્યારે દારૂના અડ્ડાનો પર્દાફાશ પીસીબીની ટીમે કર્યો છે. રેલવે સ્ટેશન પર મારમારી, લૂંટ, ચોરી હત્યા જેવી અનેક ઘટનાઓ પણ ઘટી છે. કાલુપુર રેલવે સ્ટેશન હાઇિસક્યોિરટી ઝોનમાં આવે છે રેલવે પ્રોટેક્શન ફોર્સ, ગુજરાત પોલીસની આખેઆખી ટીમ હોવા છતાંય કેવી રીતે આ પ્રકારના અડ્ડા ચાલે છે તે એક સવાલ છે.