ભારતના દાનવીરો / 21530000000 રૂપિયાનું દાન! ટાટા અંબાણીને પાછળ છોડી આ શખ્સ બન્યા સૌથી મોટા દાનવીર, જુઓ લિસ્ટ

ભારતના દાનવીરોની નવી યાદી આવી છે, જેમાં એક બિઝનેસમેન અને તેના પરિવારે સૌથી વધુ પૈસા દાનમાં આપ્યા છે. હુરુન ઈન્ડિયા 2024ની યાદીમાં આ વાતનો ખુલાસો કરવામાં આવ્યો છે. જેમાં ભારતના ટોચના 10 દાનવીરોના નામ આપવામાં આવ્યા છે. ટાટા અને અંબાણી જેવા દિગ્ગજ પણ આમાં પાછળ છે. દાનની બાબતમાં મુકેશ અંબાણી અને તેમનો પરિવાર બીજા ક્રમે છે.

હુરુન ઈન્ડિયા ફિલાન્થ્રોપી લિસ્ટ અનુસાર, શિવ નાદર અને પરિવારે પાંચ વર્ષમાં ત્રીજી વખત આ સ્થાન હાંસલ કર્યું છે અને તે યાદીમાં ટોચ પર છે. તેમણે 2,153 કરોડ રૂપિયાનું દાન કર્યું છે. બીજા સ્થાને મુકેશ અંબાણી અને પરિવાર, બજાજ પરિવાર, કુમાર મંગલમ બિરલા પરિવાર, ગૌતમ અદાણી અને પરિવાર છે. આ બધાએ મળીને નાણાકીય વર્ષ 2024માં 4,625 કરોડ રૂપિયાનું દાન કર્યું છે.

શિવ નાદર

યાદી અનુસાર, HCLના સ્થાપક શિવ નાદર (79)એ નાણાકીય વર્ષ 2023ની સરખામણીમાં 5 ટકા વધુ સંપત્તિ દાન કરી છે. શિવ નાદર ફાઉન્ડેશનની સ્થાપના 1994 માં કરવામાં આવી હતી અને તે શિક્ષણ, કલા અને સંસ્કૃતિ પર ધ્યાન કેન્દ્રિત કરે છે. જો આપણે દરરોજ તેમના દાનની સરેરાશની ગણતરી કરીએ તો, શિવ નાદરે દરરોજ 5.9 કરોડ રૂપિયાનું દાન કર્યું છે.

મુકેશ અંબાણી

રિલાયન્સ ઇન્ડસ્ટ્રીઝના માલિક મુકેશ અંબાણી (67) એ 407 કરોડ રૂપિયાનું દાન આપ્યું છે, જે આ યાદીમાં બીજા સ્થાને છે. બજાજ પરિવારે રૂ. 352 કરોડનું દાન કર્યું છે અને દાન આપવાની બાબતમાં ત્રણ સ્થાન ઉપર ચઢીને નંબર 3 પર આવી ગયા છે.

ગૌતમ અદાણી

એડેલગિવ-હુરુન ઈન્ડિયા અનુસાર, કુમાર મંગલમ બિરલાએ 334 કરોડ રૂપિયાનું દાન કર્યું છે અને તે ચોથા સ્થાને છે. અબજોપતિ ગૌતમ અદાણીએ 330 કરોડ રૂપિયાનું સખાવતી યોગદાન આપ્યું છે, જે યાદીમાં 5માં નંબરે છે. નાણાકીય વર્ષ 2023ની સરખામણીમાં તેમના દ્વારા દાનમાં આપવામાં આવેલી રકમમાં 16 ટકાથી વધુનો વધારો થયો છે.

નંદન નીલેકણી

ઈન્ફોસિસના નંદન નીલેકણી 307 કરોડ રૂપિયાના દાન સાથે યાદીમાં છઠ્ઠા સ્થાને છે, જે ગયા વર્ષની સરખામણીમાં 62 ટકાનો ઉછાળો છે. તેમની પત્ની રોહિણી નીલેકણી રૂ. 154 કરોડના દાન સાથે યાદીમાં સૌથી ઉદાર મહિલા છે અને ટોચના 10 પરોપકારીઓની યાદીમાં 10મા ક્રમે છે. રોહિણી નિલેકણી ઓનેસ્ટેપના સહ-સ્થાપક અને નિર્દેશક છે.

અન્ય

ઈન્ડો એમઆઈએમના અધ્યક્ષ 52 વર્ષીય કૃષ્ણા ચિવુકુલાને પ્રથમ વખત હુરુન ઈન્ડિયા ફિલાન્થ્રોપી લિસ્ટ 2024માં સામેલ કરવામાં આવ્યા છે. ચિવુકુલાએ IIT મદ્રાસને રૂ. 228 કરોડનું દાન આપીને સાતમું સ્થાન મેળવ્યું છે. સંસ્થાના ઈતિહાસમાં તેમનું યોગદાન સૌથી મોટું છે. 8મા નંબરે અનિલ અગ્રવાલ અને તેમનો પરિવાર છે, જેમણે વેદાંતના પરોપકારી અને CSR હાથ, અનિલ અગ્રવાલ ફાઉન્ડેશન દ્વારા રૂ. 181 કરોડનું દાન આપ્યું છે. 9માં નંબર પર સુસ્મિતા અને સુબ્રતો બાગચી છે, જેમણે 179 કરોડ રૂપિયાનું યોગદાન આપ્યું છે. તેમણે દેશમાં જાહેર આરોગ્ય શિક્ષણ અને સંશોધનમાં ક્રાંતિ લાવવા માટે 2023 માં અમદાવાદ યુનિવર્સિટીમાં બાગચી સ્કૂલ ઓફ પબ્લિક હેલ્થની સ્થાપના કરી.

દાતાઓની સંખ્યા વધી રહી છે

100 કરોડથી વધુનું દાન આપનાર વ્યક્તિઓની સંખ્યા 2019માં માત્ર 9ની સરખામણીમાં વધીને 18 થઈ ગઈ છે. 100 કરોડ રૂપિયાનું દાન આપનારા લોકોની આ સંખ્યા પ્રભાવશાળી છે કારણ કે અબજોપતિઓની સંખ્યા લગભગ બમણી અને ભારતના જીડીપી કરતાં પાંચ ગણી ધરાવનાર ચીનમાં 25 પરોપકારીઓ રૂપિયા 100 કરોડથી વધુનું દાન કરે છે.

આ પણ વાંચોઃ સરકારી ભરતીના નિયમો અધવચ્ચેથી બદલી શકાતા નથી- સુપ્રીમ કોર્ટનો મોટો ચુકાદો

બધાજ સમાચાર અને અપડેટ્સ મેળવવા માટે પ્લેસ્ટોર/ એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ