હેલમેટ તેના ભાવ કરતા ડબલ ભાવે કાળા બજાર તો થઈ જ રહ્યા છે પણ હવે તો તે મોંઘી જણસની જેમ સાચવવા પડશે કારણ કે, હેલમેટ ચોરીને વીડિયો વાઈરલ થયો છે. તો વળી તપેલીનું હેલમેટ બનાવીને નીકળેલ વડીલનો વીડિયો પણ વાઈરલ થયો છે. જામનગરમાં હેલમેટના કાળાબજારને નાથવા હવે પોલીસે રેડ પાડવી પડી હતી.
હેલ્મેટ ચોરીના સીસીટીવી પણ Video વાઈરલ થયો
વૃદ્ધ નાગજીભાઈ મેર તપેલીને હેલમેટ બનાવીને ઉપયોગ કર્યો
જામનગરમાં SP કચેરી પાછળ હેલ્મેટની કાળાબજારી શરૂ થઇ ગઇ
રાજ્યભરમાં આજથી ટ્રાફિક નિયમનોના પાલનને લઈને ચર્ચાઓ વહેતી થઈ હતી જેમાં PUC કઢાવવા માટેની લાંબી લાંબી લાઈનો તો લાગી જ હતી અને હેલમેટના કાળાબજાર શરૂ થઈ ગયા હતા. સાવ સસ્તા અને ગુણવત્તાની કોઈ જ ગેરેન્ટી વગરના હેલમેટ આજે વેપારીઓ મોં માંગ્યા ભાવે વેચી રહ્યા હતા. પણ હવે રાજકોટમાં હેલમેટ ચોરીનો વીડિયો વાઈરલ થયો છે.
ટ્રાફિકના નિયમની અવળી અસર
રાજકોટમાં નવા ટ્રાફિક નિયમની વીપરીત અસર પણ જોવા મળી છે. હેલમેટના નિયમ આવતા જ હેલમેટની ચોરી પણ શરૂ થઇ ગઇ છે. હેલ્મેટ ચોરીના સીસીટીવી પણ વાયરલ થયા છે. યુવકે બીજી બાઇક પર મુકેલ હેલમેટની ચોરી કરી હતી.
જામનગરમાં પોલીસે રેડ પાડી
જામનગરમાં SP કચેરી પાછળ હેલ્મેટની કાળાબજારી શરૂ થઇ ગઇ છે. હેલ્મેટની કાળાબજારી પર પોલીસની રેડ કરી છે. હેલ્મેટના ચાર ગણા ભાવ વસુલતા શખ્સોની અટકાયત કરવામાં આવી છે. પોલીસે હેલ્મેટનો મોટો જથ્થો કબ્જે કર્યો છે. સીટી બી-ડિવિઝન પોલીસે કાર્યવાહી હાથ ધરી છે.
આણંદમાં ડબલના ભાવે એક વેચાઈ રહ્યા છે હેલમેટ
હેલમેટની ખરીદી માટે દ્વિચક્રી વાહનચાલકો બજારમાં ઉમટ્યા છે ત્યારે લોકોની હેલ્મેટ ખરીદવાની ઉત્સુકતાનો કેટલાક વેપારીઓ ભરપૂર દૂર ઉપયોગ કરી રહ્યા છે. આણંદ જિલ્લામાં પણ હેલ્મેટમાં વેપારીઓ દ્વારા ઉગાડી લૂંટ ચલાવવા આવી હતી. હલકી ગુણવત્તા સાથે 450થી લઈ 550 સુધી મળતા હેલ્મેટના વેપારીઓ ગ્રાહકો પાસેથી 950 લઇને ખુલ્લેઆમ લૂંટ કરી હતી.
જેતપુરના એક વૃદ્ધે તપેલીનું હેલમેટ પહેર્યુ
જેતપુરના એક વૃદ્ધનો વીડિયો વાઈરલ થયો છે આ વીડિયોમાં વૃદ્ધ નાગજીભાઈ મેર તપેલીને હેલમેટ બનાવીને ઉપયોગ કર્યો છે. નાગજીભાઈ પોતાના સ્કૂટર પર નિકળ્યા હતા ત્યારે લોકોએ વીડિયો બનાવીને વાયરલ કર્યો હતો જે હવે વધુને વધુ જોવાઈ રહ્યો છે. આ દરમિયાન તેમની સાથે વીટીવીએ વાત કરતા તેમણે જણાવ્યુ કે, ટ્રાફિકના નિયમનું પાલન કરવુ તે ફરજીયાત છે, પરંતુ તેમની પાસે હેલ્મેટ ખરીદવાના રૂપિયા ન હોવાથી તેઓ તપેલીને હેલ્મેટ બનાવીને પહેરે છે.
ડબલ ભાવે વેચાઈ રહેલા હેલમેટ નકલી છે કે અસલી ?- કોણ કરશે ચકાસણી?
પરંતુ જે હેલ્મેટ પર સલામતીની વાતો થઇ રહી છે તે હેલ્મેટ કેટલી ગુણવત્તાવાળી છે, તે લોકોનું માથું સલામત રાખી શકશે કે નહીં? તેની ચકાસણી કરવાની તસદી હજુ સુધી કોઇ લઇ રહ્યું હોવાનું દેખાતું નથી. આજથી ટ્રાફિકના નવા નિયમના સખત પાલનની તંત્ર દ્વારા જોરશોરથી જાહેરાત કરવામાં આવી છે અને આ જાહેરાતથી શહેરીજનો રીતસરના ફ્ફડી ગયા છે. ઘર ઘરમાં એક જ ચર્ચા છે, હેલ્મેટ ખરીદી લો, નહીંતર દંડ થશે.
ફૂટપાથ પર વેચાઇ રહેલી હેલ્મેટ પર આઇએસઆઇના નકલી માર્કા લાગેલા છે, પરંતુ તે સાચા છે કે પ્રિન્ટ કરીને લોકોને વેચવામાં આવી રહ્યા છે આ બાબતે એકપણ તંત્રે ચકાસણી કરી રહ્યાનું દેખાતું નથી. દંડ વસૂલવાની સાથે તંત્રએ પણ કેટલીક બાબતો ધ્યાનમાં રાખવી જોઈતી હતી.