રાજ્યમાં ફરી વખત હેલ્મેટ ફરજિયાત થયું છે ત્યારે ટ્રાફિક પોલીસ પણ ફરી સક્રીય થઇ છે. હેલ્મેટ વિના વાહન ચલાવતા લોકો પાસેથી 5 દિવસની અંદર 11 લાખનો દંડ વસૂલવામાં આવ્યો છે. મહત્વનું છે કે નવા મોટર વ્હિકલ એક્ટ બાદ રાજ્ય સરકારે હેલ્મેટને શહેરી વિસ્તારમાં મરજિયાત કર્યું હતું પરંતુ હાઇકોર્ટે જવાબ માંગતા સરકારે કહ્યું હતું કે રાજ્યમાં હેલ્મેટ ફરજિયાત જ છે.
ગુજરાતમાં ફરી હેલ્મેટ ફરજિયાત થયા બાદ કાર્યવાહી
ટ્રાફિક પોલીસે ચલાવી ડ્રાઇવ
નિયમોનો ભંગ કરનારાઓ પાસેથી વસૂલ્યો દંડ
અમદાવાદ ટ્રાફિક પોલીસ દ્વારા ટ્રાફિકના નિયમો ભંગ કરતા અને હેલ્મેટ વિના વાહન ચલાવતા લોકો સામે કડક કાર્યવાહી શરૂ કરી દીધી છે. અમદાવાદ ટ્રાફિક ડ્રાઇવ પણ યોજવામાં આવી છે. 1થી 5 ફેબ્રુઆરી સુધીમાં ટ્રાફિક પોલીસે હેલ્મેટ વગરના 2 હજારથી વધુ વાહન ચાલકો પાસેથી 11 લાખ 36 હજારનો દંડ વસૂલવામાં આવ્યો છે. ટ્રાફિક પોલીસે 10 હજારથી વધુ ચાલકોને ઝડપીને 55.82 લાખ સુધીના દંડ ફટકાર્યા છે.
મહત્વનું છે કે નવેમ્બર મહિનામાં હેલ્મેટને ફરજિયાત કરવાની જાહેરાત કરવામાં આવી હતી. પાંચ દિવસની ટ્રાફિક ડ્રાઇવમાં હેલ્મેટ પહેર્યા વિનાના 5 હજાર આઠસો જેટલા ચાલકો પાસેથી 29 લાખ 12 હજારનો દંડ વસૂલ્યો હતો. ત્યારે હવેની પાંચ દિવસની ડ્રાઇવમાં 11 લાખનો જ દંડ વસૂલ્યો છે. જેથી એવું કહી શકાય કે વાહનચાલકો હેલ્મેટ પહેરી રહ્યા છે.
ગુજરાત સરકારે હેલ્મેટ મરજિયાત કર્યું અને હાઈકોર્ટમાં કહ્યું- હેલ્મેટ ફરજિયાત જ છે
કેન્દ્ર સરકારે ગત 1 નવેમ્બર, 2019થી બાઇક ચાલક અને પાછળ બેસનાર માટે હેલ્મેટ ફરજિયાત પહેરવાનો કાયદો અમલી કર્યો હતો. જ્યારે ગુજરાત સરકારે 4 ડિસેમ્બર, 2019ના રોજ કેબિનેટની બેઠકમાં શહેરી વિસ્તારમાં બાઇક માટે હેલ્મેટ પહેરવું મરજિયાત કર્યું હતું. આ બેઠક બાદ રાજ્યના પરિવહનમંત્રી આર.સી. ફળદુએ પત્રકારોને જણાવ્યું હતું કે, ગુજરાતમાં હેલ્મેટ પહેરવું ફરજિયાત નહીં કરવાનો રાજ્ય સરકારે નિર્ણય લીધો છે.
જો કે, કેબિનેટની બેઠક બાદ આજદિન સુધી ગુજરાત સરકારે કેબિનેટના આ નિર્ણયનો કોઈ પરિપત્ર જારી કર્યો નહોતો. ત્યારે ગુજરાત સરકારે હાઈકોર્ટમાં પલટી મારી હતી. સરકારે એવો જવાબ રજૂ કર્યો હતો કે, ગુજરાતમાં હેલ્મેટ પહેરવું ફરજિયાત જ છે અને તેઓ મરજિયાત કરવા માગતા નથી. જેને લઇને હાઈકોર્ટે સરકારને એફિડેવિટ ફાઈલ કરીને આ બાબત રજૂ કરવા કહ્યું હતું.