હાર્દિક પટેલના કોંગ્રેસમાંથી રાજીનામાં બાદ એક પછી એક કોંગ્રેસ નેતાના નિવેદનો બહાર આવી રહ્યા છે જેમાં હાર્દિક પટેલ પર અનેક આક્ષેપો પણ લગાવાય રહ્યા છે.
હાર્દિકના રાજીનામા પર કોંગ્રેસની પ્રતિક્રિયા
હાર્દિક મોકા પરસ્ત છે
હાર્દિકે પાર્ટીને નુકસાન થાય તેવા કામો પણ કર્યાના આરોપ
છેલ્લા કેટલાય સમયથી કોંગ્રેસથી નારાજ હાર્દિક પટેલે આજે ધડાકો કરી કોંગ્રેસમાંથી રાજીનામું ધરી દીધી છે. જેને પગલે કૉંગ્રેસ અને હાર્દિક પટેલ વચ્ચેના ગજગ્રાહ પર પૂર્ણ વિરામ મુકાયું છે. ત્યારે હાર્દિક પટેલના રાજીનામા મુદ્દે કૉંગ્રેસ પ્રવક્તા મનિષ દોષીનું નિવેદન સામે આવ્યું છે. તેમણે જણાવ્યુ કે હાર્દિક પટેલ કોંગ્રેસ પાર્ટીને નુકસાન થાય તેવા કામો પણ કરતાં હતા. સાથે-સાથે હાર્દિક રાજનીતિ નહી પણ પરંતુ મોકા પરસ્તી કરી રહ્યા હોવાનું પણ મનીષ દોશીએ નિવેદન આપ્યું હતું.
એમનું મહત્વ વધે તે માટે હેલિકોપ્ટર અપાયું હતું
કોંગ્રેસ સાથેની નારાજગીને લઈને હાર્દિક પટેલે રાજીનામું આપી દીધા બાદ હવે હાર્દિક પર કોંગ્રેસ પક્ષના અગ્રણીઓ દ્વારા જ આકરા પ્રહારો કરવામાં આવી રહ્યા છે. કોંગી આગેવાનો એક પછી એક નિવેદન જારી કરી આરોપો લગાવી રહ્યા છે. રાજ્યના કોંગ્રેસ પ્રભારી રઘુ શર્મા બાદ મનીષ દોષીનું નિવેદન સામે આવ્યું છે.જેમાં તેમણે જણાવ્યુ કે નારાજગીને લઈને હાર્દિકે પક્ષના ફોરમમાં ચર્ચા કરવાનું યોગ્ય સમજ્યું ન હતું. એટલું જ નહી અન્ય રાજ્યોમાં સ્ટાર પ્રચારક તરેકેની પણ તેમને જવાબદારી આપવામાં આવી હતી અને હાર્દિક પટેલનું મહત્વ વધે તે માટે પક્ષ દ્વારા તેમને હેલિકોપ્ટરની વ્યવસ્થા પણ કરી આપી હતી.
હાર્દિક રાજનીતિ નહી પણ પરંતુ મોકા પરસ્તી કરી રહ્યા છે
આ મામલે હાર્દિક પટેલ વિરુદ્ધ તીખી પ્રતિક્રિયા આપતા જણાવ્યુ હતુ કે હાર્દિક પટેલે ટ્વિટરના મધ્યમથી આપેલ રાજીનામાં લખેલ ભાષા એક તૈયાર સ્ક્રિપ્ટ છે. જે બીજાને ખુશ કરવા તે આ સ્ક્રિપ્ટ મુજબ આગળ વધી રહ્યો છે. હાર્દિક પટેલને કોંગ્રેસે નાની ઉમરમાં પદ, પ્રતિષ્ઠા અને ખરાબ સમયમાં મજબૂતી સાથે સાથ આપ્યો હતો. ત્યારે હવે તેમના નિવેદનો પરથી લાગી રહ્યું હતું કે તેઓ નવી તક શોધી રહ્યા છે. એટલે હાર્દિક પટેલ રાજનીતિ નહી પણ પરંતુ મોકા પરસ્તી કરી રહ્યા હોવાનું પણ તેમણે ઉમેર્યું હતું.