આજે સમગ્ર દેશમાં 74માં ગણતંત્ર દિવસની ઉજવણી કરવામાં આવી રહી છે. ઠેર-ઠેર દેશભક્તિના ગીતો સંભળાય રહ્યા છે. આ અવસર પર દીવ અને સોમનાથ વચ્ચે હેલિકોપ્ટર સેવા શરૂ કરવામાં આવી છે.
દીવ અને સોમનાથ વચ્ચે શરૂ થઈ હેલિકોપ્ટર સેવા
દીવ અને દમણ ચાલતું હેલિકોપ્ટર હવે દીવ સોમનાથ ઉડાન ભરશે
દીવના કલેક્ટર હેલિકોપ્ટર મારફતે સોમનાથ આવ્યા
કેન્દ્રશાસિત પ્રદેશ દીવ પર્યટન ક્ષેત્રે ઉત્તરોતર પ્રગતી કરી રહ્યું છે અને પર્યટન ક્ષેત્રે દેશ વિદેશમાં નામના મેળવી રહ્યું છે. સોમનાથ દર્શને આવતા પર્યટકો દીવની અચૂક મુલાકાત લેતા હોય છે. તેને ધ્યાનમાં રાખીને હવે દીવથી સોમનાથ હેલિકોપ્ટર સેવાનો પ્રારંભ થયો છે.
દીવ અને સોમનાથ વચ્ચે શરૂ થઈ હેલિકોપ્ટર સેવા
પ્રજાસત્તાક પર્વે સૌરાષ્ટ્રવાસીઓને હવાઈ સેવાની ભેટ આપવામાં આવી છે. આજથી દીવ-સોમનાથ વચ્ચે હેલિકોપ્ટર સેવા શરૂ કરવામાં આવી છે. પ્રથમ ફેરીમાં દીવ કલેક્ટર વિદ્યાર્થીઓ સાથે હેલિકોપ્ટર મારફતે સોમનાથ પહોંચ્યા હતા. કલેક્ટરે સોમનાથ આવી હલિકોપ્ટર સેવાનો ટ્રાયલ લીધો હતો. સોમનાથ મંદિર ટ્રસ્ટે હવાઈ સેવાને આવકારી છે.
હેલીપેડ ખાતે કરાયું દીવ કલેક્ટરનું સ્વાગત
આજે દીવના કલેક્ટર હેલિકોપ્ટરમાં બેસીને સોમનાથ હેલીપેડ ખાતે પહોંચ્યા હતા. જ્યાં સોમનાથ ટ્રસ્ટના પદાધિકારીઓ દ્વારા દીવ કલેક્ટરનું સ્વાગત કરવામાં આવ્યું હતું. મહત્વનું છે કે, ભૂતકાળમાં દમણ અને દીવ વચ્ચે ચાલતું હેલિકોપ્ટર હવે દીવથી સોમનાથ સુધી પણ ઉડાન ભરશે. આ દીવથી સોમનાથ આવતા મુસાફરો માટે સારા સમાચાર છે. જોકે, હેલિકોપ્ટરમાં મુસાફરી માટે ટિકિટ કેટલી રાખવામાં આવી છે, તેની વિગતો હાલ સામે આવી નથી.
PM મોદીએ દમણ અને દીવ વચ્ચેની હેલિકોપ્ટર સેવાનો કરાવ્યો હતો આરંભ
ફેબ્રુઆરી 2019માં PM મોદી દ્વારા દમણ અને દીવ વચ્ચેની હેલિકોપ્ટર સેવાનો આરંભ કરાવવામાં આવ્યો હતો. હેલિકોપ્ટર સેવાને લઇ ટુરિસ્ટોમાં ખુશી છવાઇ હતી. એક જ પ્રદેશના બે ભાગ એવા દમણ અને દીવ વચ્ચે રોડ માર્ગે 700 કિલોમીટર જેટલું અંતર છે. દમણથી દીવ રોડ માર્ગે પહોંચતા 14 કલાકથી વધુ સમય લાગે છે. જોકે, હેલિકોપ્ટરની સેવા શરૂ થયા બાદ દમણથી દીવ હેલિકોપ્ટરમાં માત્ર એક કલાકમાં જ પહોંચી શકાય છે.