રિક્ષા, બસ, ટ્રક, ટ્રેલર, આયશર, ટેક્સી જેવાં ટ્રાન્સપોર્ટ પ્રકારનાં વાહનો માટેનું ડ્રાઈવિંગ લાઇસન્સ કઢાવવા હવે શૈક્ષણિક લાયકાતની જરૂર નથી. અભણ વ્યક્તિ પણ ડ્રાઈવિંગ લાઇસન્સ મેળવી શકશે.
અમદાવાદ સહિત રાજ્યભરની આરટીઓમાં હેવી વિહિકલ માટેનું ડ્રાઈવિંગ લાઇસન્સ મેળવવા માટે હવે કોઈપણ પ્રકારનાં શૈક્ષણિક પુરાવા રજૂ નહીં કરવા પડે. અમદાવાદની આરટીઓમાં પણ આ નિયમ લાગુ કરી દેવાયો છે અને લાઇસન્સ માટેની સારથિ વેબસાઈટમાં પણ હવે નવા નિયમ મુજબ ફેરફાર કરી દેવાયા છે. જેના કારણે અરજદારને કોઈપણ પ્રકારના શૈક્ષણિક લાયકાતના પુરાવા આપ્યા વિના લાઇસન્સ કઢાવવાનું સરળ બનશે.
હાલમાં દેશભરમાં હેવી ડ્રાઈવરની ભારે અછત પ્રવર્તી રહી છે. જેના કારણે શૈક્ષણિક લાયકાત નાબૂદ કરીને ડ્રાઈવરોની સંખ્યા વધારવાનો નિર્ણય સરકાર દ્વારા લેવાયો છે. રિક્ષા, બસ, ટ્રક, ટ્રેલર, આયશર, ટેક્સી જેવા ટ્રાન્સપોર્ટ પ્રકારનાં વાહનો માટેનું ડ્રાઈવિંગ લાઇસન્સ કઢાવવા માટે કોઈપણ અરજદાર ધોરણ આઠ સુધી અભ્યાસ કરેલો હોવો એ ફરજિયાત હતું. અરજદારે શૈક્ષણિક લાયકાતના પુરાવા આપવા પડતા હતા અને શૈક્ષણિક લાયકાતના પુરાવા તરીકે સર્ટિફિકેટ પણ આપવું પડતું હતું ત્યાર બાદ તેના આધારે જ ડ્રાઈવિંગ લાઇસન્સ મેળવી શકાતું હતું.
આ અંગે એઆરટીઓ એસ એ મોજણીદારે જણાવ્યું હતું કે નવો નિયમ થઈ ગયો છે. તેથી હવે ઓછું ભણેલા કે સાવ નહીં ભણેલા લોકો પણ હેવી વાહનોનું લાઇસન્સ કઢાવી શકે છે.