આગાહી / નવી સિસ્ટમ સક્રિય: સૌરાષ્ટ્ર-કચ્છ, ઉત્તર ગુજરાતમાં બે દિવસ સુધી ભારેથી અતિભારે વરસાદની આગાહી, ઓરેન્જ-યલો અલર્ટ જાહેર

• અમદાવાદામાં હળવા ઝાપટાં પડવાની શક્યતા
• ત્રણ જિલ્લામાં ઓરેન્જ એલર્ટ
• સાત જિલ્લામાંમાં યલો એલર્ટ

હવામાન વિભાગે વરસાદની નવી આગાહી કરતા તંત્ર ફરી સાબદું બન્યું છે. હવામાન વિભાગે ઉત્તર અને દક્ષિણ ગુજરાતમાં સારા એવા વરસાદની આગાહી કરી છે અને અમદાવાદ સહીતના વિસ્તારમાં હળવા ઝાપટાની આગાહી કરાઇ છે.હવામાન વિભાગની નવી આગાહી બાદ સરકારી તંત્ર વધુ એક વખત સાબદું બન્યું છે અને એસડીઆરએફ તથા એનડીઆરએફ સહિતની એજન્સીઓને એલર્ટ રહેવા જણાવવામાં આવ્યું છે.

બે દિવસ સુધી રાજ્યભરમાં વરસાદી માહોલ યથાવત્ રહેશે
દક્ષિણ ગુજરાતનાવિસ્તારોમાં આગામી ૨૪ કલાક માટે અતિભારે વરસાદ પડે તેવી શક્યતા છે. સાથે સાથે સૌરાષ્ટ્ર અને કચ્છમાં પણ સારો વરસાદ વરસે તેવી હવામાન વિભાગે આગાહી કરી છે. રાજ્યમાં આજે કચ્છ, બનાસકાંઠા, પાટણ, વલસાડ, દ્વારકા, જામનગર, રાજકોટ, મોરબી, સુરત, ભરૂચ, મહેસાણા, આણંદ, અરવલ્લી અને સાબરકાંઠામાં અતિભારે વરસાદની આગાહી કરવામાં આવી છે. આગાહી પ્રમાણે આગામી બે દિવસ સુધી રાજ્યભરમાં વરસાદી માહોલ યથાવત્ રહેશે. ત્યાર બાદ વરસાદનું જોર ધીમે ધીમે ઘટી શકે છે.

માછીમારોને દરિયો ન ખેડવાની સૂચના 
ઉલ્લેખનીય છે કે, અમદાવાદ સહિત રાજ્યભરમાં છેલ્લા બે દિવસથી સાર્વત્રિક વરસાદ પડી રહ્યો છે ત્યારે હજુ પણ આગામી બે દિવસ મેઘો અનરાધાર વરસે તેવી હવામાન વિભાગે આગાહી વ્યક્ત કરી છે. આગાહીના પગલે કેટલાક જિલ્લા માટે યલો એલર્ટ અને કેટલાક વિસ્તારોમાં ઓરેન્જ એલર્ટ જાહેર કરવામાં આવ્યું છે. દરિયામાં વરસાદી સિસ્ટમ સક્રિય થતાં વરસાદ પડવાની શક્યતા વધી ગઈ છે. માછીમારોને દરિયો ન ખેડવાની સૂચના પણ અપાઈ છે. 

૧૬ જિલ્લામાં યલો એલર્ટ જાહેર
દરિયામાં વરસાદી સિસ્ટમ સક્રિય થતાં આજે બનાસકાંઠા અને કચ્છ સહિત ત્રણ જિલ્લામાં ઓરેન્જ એલર્ટ જ્યારે ૧૬ જિલ્લામાં યલો એલર્ટ જાહેર કરવામાં આવ્યું છે. ખેડા જિલ્લામાં મેઘરાજાએ તોફાની બેટિંગ કરતાં અનેક વિસ્તારો પાણીમાં ગળાડૂબ બન્યા હતા. જેમાં અભીપુર ગામમાં ઠેર ઠેર કેડ સમાં પાણી ભરાયાં હતાં. તળાવ અને ગામના રોડ- રસ્તા ઉપર વરસાદી પાણી ભરાયાં હતાં. 

ક્યાં કેટલી મેઘમહેર 
રાજ્યના ૨૩૧ તાલુકામાં મેઘરાજાએ ધડબડાટી બોલાવી છે. જેમાં સૌથી વધુ વરસાદ થરાદમાં છ ઈંચ અને લાખણીમાં ચાર ઈંચ ખાબક્યો છે. આ ઉપરાંત સુઈ ગામમાં ૩.૫, પાલનપુરમાં ત્રણ, વાવમાં ૨.૭, ખેડાના કઠલાલમાં પોણા ચાર ઈંચ, મહેમદાવાદમાં ત્રણ ઈંચ, ખેરગામમાં પોણા ત્રણ ઈંચ, કચ્છના અંજાર અને ભરૂચના વાલિયામાં ૨-૨ ઈંચ વરસાદ, બાલાસિનોર, ભચાઉ, સંતરામપુર, કપરાડા અને ડાંગમાં ૨-૨ ઈંચ વરસાદ, હાંસોટ, ભૂજ અને કડાણામાં પોણા બે ઈંચ વરસાદ, વડોદરા, બોડેલી, વિજયનગર, દાંતીવાડા, મહેસાણામાં ૨.૫ ઈંચ વરસાદ તો સંખેડા, ફતેપુરા, હારીજમાં ૨.૫ ઈંચ વરસાદ ખાબક્યો છે.