રાજ્યમાં પડેલા સાર્વત્રિક વરસાદથી નદી, નાળા છલકાઈ ગયા તો ક્યાંક વરસાદના કારણે જંગલ વિસ્તારોમાં નવા ધોધ સક્રિય તો ક્યાંક આલહાદક દ્રશ્યો સર્જાયા
ગુજરાતમાં વરસી શકે છે ભારે વરસાદ
26 થી 30 સપ્ટેમ્બર સુધી રહેશે વરસાદી માહોલ
કડાકા ભડાકા સાથે વરસાદ પડતા સર્જાયા આવા દ્રશ્યો
એક તરફ ગુજરાતમા વરસાદે માજા મુકી છે ત્યારે ફરી હવામાન વિભાગ દ્વારા ભારેથી અતિભારે વરસાદની આગાહી કરવામાં આવી છે. હવામાન વિભાગે 26 થી 30 સપ્ટેમ્બર સુધી વરસાદની તો 28 અને 30 સપ્ટેમ્બરે ભારે વરસાદની શકયતા વ્યક્ત કરી છે, તેમજ સૌરાષ્ટ્ર અને મધ્ય ગુજરાતમાં ભારે વરસાદની તો દક્ષિણ ગુજરાત અને ઉત્તર ગુજરાતમાં હળવાથી ભારે વરસાદની આગાહી સેવી છે, એક તરફ ગુજરાતમાં સાર્વત્રિક વરસાદ પડી રહ્યો છે ત્યારે હજુ પણ થોડા ઘણા અંશે વરસાદની ઘટ જોવા મળી રહી છે જે આ મહિનામાં જ પુરી થાય તેવું અનુમાન લગાવવામાં આવી રહ્યું છે.
પંચમહાલના ગોધરામાં મુશળધાર વરસાદ
આ તરફ મેઘમહેર હવે મેઘ કહેર બને તેવી લાગી રહ્યું છે, કેમ કે રાજ્યમાં પડેલા સાર્વત્રિક વરસાદથી નદી, નાળા છલકાઈ ગયા છે તો કેટલીક નદીઓમાં ઘોડાપૂર જેવી સ્થિતિનું નિર્માણ થયું છે. પંચમહાલના ગોધરામાં મુશળધાર વરસાદને કારણે ગદુકપૂર બ્રિજ પર પાણી ફરી વળતા બ્રીજ પરથી પાણી વહેવા લાગ્યા હતા, તો આ તરફ પંચમહાલના જાંબુઘોડામાં ધોધમાર વરસાદને લીધે ભાટ ગામે આવેલા રિસોર્ટમાં પાણી ભરાતા કલાકો સુધી પર્યટકો રિસોર્ટમાં અટવાયા હતા અને પાણીનો પ્રવાહ જોઈ રિસોર્ટમાં રહેલા લોકોના જીવ પણ તાળવે ચોટી ગયા હોય તેવા દ્રશ્યો સર્જાયા હતા આ તરફ પાવાગઢ પોલીસે થોડા સમય માટે રસ્તો બંધ કરવાની પણ ફરજ પડી હતી
દેવગઢ બારીયાના ઐતિહાસિક ટાવર પર વીજ પડી
બીજી તરફ દાહોદ ભારે વરસાદને કારણે દેવગઢ બારીયાના ઐતિહાસિક ટાવર પર વીજ પડતા ટાવર ટોચનો ભાગ ધરાશયી થઈ ગયો હતો જો કે સદનસીબે કોઇ જાનહાની સર્જાઈ નહોંતી આમ વીજળીના કડાકા ભડાકા સાથે વરસાદ તૂટી પડતા વરસાદ ક્યાંક આલહાદક દ્રશ્યો સર્જાયા હતા તો ક્યાંક આખેઆખુ ટેન્કર પાણીમાં હોડીને જેમ તરતું હોય તેવું પણ જોવા મળ્યું હતું,
પાવાગઢ ડુંગરના પગથિયા ઉપરથી પાણી વહેતા થયા
પંચમહાલમાં મેઘરાજાનું રૌદ્ર સ્વરૂપ જોવા મળ્યું જેમાં ઘોઘંબામાં પાણીના પ્રવાહમાં એક આખું ટેન્કર તણાયું હતું, તો પાવાગઢ ડુંગરના પગથિયા ઉપરથી પાણી વહેતા હોય તેવા દ્રશ્યો પણ સર્જાયા હતા વહેલી સવારથી જાંબુઘોડા,ઘોઘંબા,હાલોલમાં વરસાદને કારણે જળબંબાકાર જેવી સ્થિતિ સર્જાઈ હતી તો ક્યાંક વરસાદના કારણે જંગલ વિસ્તારોમાં નવા ધોધ સક્રિય થતા રમણિય દ્રશ્યો સર્જાયા છે.
પ્રથમ વખત કરાડ નદી બે કાંઠે વહેતી થઈ
આ વખતે વરસેલા વરસાદને કારણે પંચમહાલની પ્રથમ વખત કરાડ નદી બે કાંઠે વહેતી જોવા મળી હતી તો નદી પર આવેલા ચેકડેમો પણ ઓવર ફ્લો થતા અલીન્દ્રા, બાકરોલ, મધવાસ, રતનપુરા, પલાસા સહિતના ગામોના ખેડૂતોમાં ખુશી જોવા મળી રહી છે. આ તરફ નર્મદામાં પણ સતત વરસાદથી નદી-નાળા છલકાયા છે.
જળાશયોમાં પાણીની આવક
રાજ્યમાં વરસાદ બાદ જળાશયોમાં પાણીની આવક તો 15 દિવસમાં ગુજરાતના 15 ટકા ડેમ ભરાયા ગયા છે. રાજ્યના 102 જળાશયમાં 70 ટકા જળસંગ્રહ થયો છે તો રાજ્યના 51 ડેમ સંપૂર્ણ ભરાયા છે. સપ્ટેમ્બરમાં 20 દિવસમાં 11 ઈંચ વરસાદ નોંધાયો છે. રાજ્યમાં અત્યાર સુધીમાં કુલ 76 ટકા વરસાદ નોંધાતા સૌરાષ્ટ્રના 48 અને દક્ષિણના 3 ડેમ સંપૂર્ણ ભરાયા છે. રાજપીપળાના કરજણ ડેમમાં પાણીની આવક થતા ડેમમાંથી 8 હજાર કયુસેક પાણી છોડાયું છે તો નીચાણવાળા 6 ગામને અલર્ટ કરાયા છે.
રાજ્યના 91 તાલુકામાં વરસ્યો વરસાદ
રાજ્યભરમાં વરસાદી માહોલ યથાવત જોવા મળી રહ્યો છે તો રાજ્યના 91 તાલુકામાં વરસ્યો વરસાદ ખાબક્યો છે. સવારે 6 થી 10 વાગ્યા સુધીમાં 91 તાલુકામાં સૌથી વધુ છોટાઉદેપુરના બોડેલીમાં પોણા 4 ઈંચ વરસાદ નોંધાયો છે. ડેડિયાપાડામાં 2.5 ઈંચ, જેતપુર પાવીમાં 2.5 ઈંચ તો જાંબુઘોડામાં સવા 2 ઈંચ, નડિયાદમાં સવા 2 ઈંચ અને માંગરોળમાં 2 ઈંચ, ક્વાંટમાં 2 ઈંચ વરસાદ તથા વાલિયામાં 2 ઈંચ, વિસાવદરમાં 2 ઈંચ વરસાદ નોંધાયો છે.