હવામાન / ગુજરાતમાં મોટા કરા સાથે વરસાદનું જોરદાર ઝાપટું, વાતાવરણમાં આવશે ધ્રુજારી છૂટાવે તેવો પલટો, અંબાલાલની આગાહી 'ભારે'

• મહીસાગર જિલ્લાના વીરપુરમાં કરા પડ્યા
• રાજ્યના મહત્તમ વિસ્તારોમાં કમોસમી વરસાદની આગાહી
• હવામાન નિષ્ણાંત અંબાલાલ પટેલની આગાહી
• બગસરના હામાપુરમાં પડ્યા બરફના કરા 

 ગુજરાતમાં ઠંડીનો ચમકારો યથાવત છે. સવારે અને રાત્રે તેજ પવન ફૂંકાઈ રહ્યો છે. આ તરફ હવામાન વિભાગે 28 જાન્યુઆરીએ ઉત્તર અને મધ્ય ગુજરાતમાં કમોસમી વરસાદની આગાહી કરી છે. હવામાન વિભાગની આગાહી બાદ ગુજરાતમાં ખેડૂતોની ચિંતામાં વધારો થઈ ગયો છે. આ તરફ હવે સુરત, અરવલ્લી, ભાવનગર અને આણંદમાં કમોસમી વરસાદ વરસ્યો છે. આ સાથે પંચમહાલ, ખેડા અને વડોદરામાં વાદળછાયું વાતાવરણ જોવા મળી રહ્યું છે.  

કમોસમી વરસાદને કારણે ખેડૂતો ચિંતામાં મુકાયા 
રાજ્યમાં કડકડતી ઠંડી વચ્ચે  હવામાન વિભાગે અનેક વિસ્તારોમાં વરસાદની આગાહી કરી છે. જેને લઈ ગઈકાલે મોડી રાત્રે વડોદરાના ગ્રામ્ય વિસ્તારમાં વાતાવરણમાં પલટો આવ્યો હતો. મોડી રાત્રે ગ્રામ્ય વિસ્તારમાં કમોસમી વરસાદ પડ્યો હતો. વડોદરાના સાવલી પંથકમાં ગતરાત્રીએ માવઠું પડ્યું હતું. કમોસમી વરસાદને કારણે ખેડૂતો ચિંતામાં મુકાયા છે. 
મહિસાગ જીલ્લાના વીરપુરમાં વરસાદી માહોલમાં કરા પડવા પામ્યા છે. જીલ્લામાં બેવડી ઋતુનો લોકો અનુભવ કરી રહ્યા છે તો બીજી તરફ ખેતરમાં ઉભા પાકને નુકશાનીની ભીતિ લોકો સેવી રહ્યા છે.

ફેબ્રુઆરી માસમાં ઠંડી યથાવત રહેશેઃ અંબાલાલ પટેલ
રાજ્યના મહત્તમ વિસ્તારોમાં કમોસમી વરસાદની આગાહી કરવામાં આવી છે. હવામાન નિષ્ણાંત અંબાલાલ પટેલ દ્વારા કરવામાં  આવેલી  આગાહી મુજબ કચ્છ, સૌરાષ્ટ્ર સહિતના વિસ્તારોમાં કમૌસમી વરસાદ પડશે. તેમજ ફેબ્રુઆરી માસમાં ઠંડી યથાવત રહેશે. તેમજ દિવસે તાપમાન વધશે  જ્યારે રાત્રે તાપમાનમાં ઘટાડો જોવા મળશે અને ફેબ્રુઆરી માસમાં પણ કમોસમી વરસાદ થવાની સંભાવના પણ વ્યક્ત કરવામાં આવી છે. જ્યારે માર્ચ મહિનામાં સરેરાશ કરતા વધુ ગરમી પડશે. તેવી આગાહી અંબાલાલ પટેલ દ્વારા કરવામાં આવી છે.

બગસરા પંથકમાં પણ કરા પડ્યા
અમરેલી-બગસરા પંથકમાં  કમોસમી વરસાદ પડવા પામ્યો છે. અમરેલીના હામાપુરમાં વરસાદી વાતાવરણ વચ્ચે બરફના કરા તેમજ ધોધમાર વરસાદ પડ્યો હતો અને બગસરાના કાગદડી અને સમઢિયાળામાં વરસાદી ઝાપટું પડ્યું હતું. જેથી હામાપુર ગામમાં ખેડૂતોને પાકમાં નુકશાન થવાની ભીંતી સેવાઈ રહી છે.

હવામાન વિભાગે શું કરી છે આગાહી ? 
રાજ્યમાં ઠંડી-માવઠાને લઈને હવામાન વિભાગે આગાહી કરી છે. હવામાન વિભાગના જણાવ્યા મુજબ, આજે ઉત્તર અને મધ્ય ગુજરાતમાં કમોસમી પડી શકે છે. બનાસકાંઠા, પાટણ, ખેડા, સાબરકાંઠા, અરવલ્લી, આણંદ, મહીસાગર અને દાહોદમાં કમોસમી વરસાદ પડી શકે છે. તેમજ અમદાવાદ, ગાંધીનગરમાં પણ હળવા વરસાદની સંભાવના છે.  એટલું જ નહીં આ વિસ્તારોમાં ભારે પવન સાથે વરસાદની સંભાવના છે. સૌરાષ્ટ્ર અને કચ્છમાં સૂકા અને ઠંડા પવનો ફૂંકાશે. સાથે પવનોની ગતિ ઉત્તર પૂર્વીય જોવા મળશે તેમજ કમોસમી વરસાદ પડે તો પવનની ગતિ 40થી 50 કિમી પ્રતિ કલાકની રહેશે.

મહત્વનું છે કે, આજે નલિયામાં 4.5 ડિગ્રી તાપમાન નોંધાયું છે. જ્યારે કેશોદમાં 8.4 ડિગ્રી, રાજકોટમાં 9.4 ડિગ્રી અને અમદાવાદમાં 13.5 ડિગ્રી તાપમાન નોંધાયું છે. ગુજરાતમાં ઠંડીના માહોલ વચ્ચે હવે હવામાન વિભાગે મોટી આગાહી કરી છે. હવામાન વિભાગે રાજ્યમાં કમોસમી વરસાદની સાથે કોલ્ડવેવની આગાહી કરી છે. મહત્વનું છે કે, ગઈકાલે મોડી રાત્રે વડોદરાના ગ્રામ્ય વિસ્તારમાં વાતાવરણમાં પલટો આવ્યો હતો. મોડી રાત્રે ગ્રામ્ય વિસ્તારમાં કમોસમી વરસાદ પડ્યો હતો. વડોદરાના સાવલી પંથકમાં ગતરાત્રીએ માવઠું પડ્યું હતું. કમોસમી વરસાદને કારણે ખેડૂતો ચિંતામાં મુકાયા છે.