મેઘરાજા અટકવાનું નામ નથી લઇ રહ્યા ત્યારે આજે ફરી દક્ષિણ ગુજરાતના અનેક પંથકમાં ભારે વરસાદ પડ્યો હતો. સુરતના ચેરાપુંજી તરીકે ઓળખાતા સુરત જિલ્લાના ઉમરપાડામાં 2 કલાકમાં જ 11 ઈંચ વરસાદ ખાબક્યો હતો. ઉમરપાડામાં આભ ફાટતા જીવન અસ્તવ્યસ્ત થઇ ગયું છે. તો પાક નિષ્ફળ જવાની ભીતિને લઇને ખેડૂતો ચિંતામાં મૂકાઇ ગયા છે.
ઉમરપાડામાં 2 કલાકમાં 11 ઇંચથી વધુ વરસાદ
છેલ્લા 3 કલાકમાં વરસ્યો ધોધમાર વરસાદ
સુરત, વડોદાર, તાપી અને પંચમહાલ ગ્રામ્યમાં ભારે વરસાદ
દક્ષિણ ગુજરાતના કેટલાક વિસ્તારોમાં અનારાધાર વરસાદથી સર્વત્ર પાણી પાણી થઈ ગયું હતું. સુરત જિલ્લાના ઉમરપાડા તાલુકાના ગ્રામ્યમાં ધોધમાર વરસાદ પડ્યો હતો. સુરત જિલ્લાના ઉમરપાડા તાલુકામાં બપોરના 2થી 4 વાગ્યા સુધીમાં 11 ઇંચ જેટલો વરસાદ પડી ચૂક્યો છે. તો માંગરોળ તાલુકામાં સાડા પાંચ ઇંચ વરસાદ પડ્યો છે.
છેલ્લા 3 કલાકમાં ભારે વરસાદથી ઉમરપાડાના ચિતલડા અને ખાંભા બંગલીને જોડતે કોઝ-વે બંધ થયો હતો. કોઝવે પાણીમાં ગરકાવ થતા વાહન વ્યવહાર બંધ થયો છે. નીચાણવાળા વિસ્તારોમાં પાણી ભરાયા છે. તો વીરા નદીમાં ઘોડાપુર આવ્યું છે. ઉમરપાડા તાલુકાના ઉચવાણ ગામે ભાર વરસાદથી રસ્તા પર પાણી ભરાતા બજારોમાં નદી વહેતી થઇ છે.
બીજી તરફ તાપી જિલ્લાના કેટલાક વિસ્તારોમાં વરસાદ પડ્યો છે. જેમાં વાલોડ નગર સહિત આજુબાજુ વિસ્તારમાં વરસાદ પડ્યો છે.
વડોદરા જિલ્લામા વરસાદી માહોલ સર્જાયો હતો. જેમાં પાદરા, ભાયલી, વાધોડીયા, રણોલીમાં અઠવાડિયાના વિરામ બાદ વીજળીના કડાકા અને ભારે પવન સાથે વરસાદ પડ્યો હતો. વાધોડીયામાં નીંચાણવાળા વિસ્તારોમા પાણી ભરાયા હતા. તો 4 દિવસના વિરામ બાદ ડભોઈમાં ભારે ઉકળાટ બાદ વીજળીના કડાકા સાથે વરસાદ શરુ થયો છે. તો અહીં વરસાદ થતાં ખેડૂતોમાં ખુશી જોવા મળી છે.
પંચમહાલ જિલ્લાના કાલોલ, હાલોલ સહિત વિસ્તારોમાં ભારે પવન સાથે ધોધમાર વરસાદ પડ્યો હતો. જેને લઇને વીઝીબલીટી ઘટી હતી અને વરસાદથી ખેડૂતો પણ ચિંતામાં મૂકાયા છે.