હવામાન વિભાગે રાજ્યમાં વરસાદને લઈ આગાહી કરતા જણાવ્યું છે કે ગુજરાતમાં આગામી બે દિવસ સામાન્યથી ભારે વરસાદ પડી શકે છે.
ગુજરાતમાં સારા વરસાદની શકયતા
સાયક્લોનિક સર્કયુલેશનનું વધી શકે છે જોર
7 સપ્ટેમ્બર બાદ પડી શકે છે સારો વરસાદ
સપ્ટેમ્બર મહિનાના શરૂઆતથી જ મેઘરાજા મહેરબાન છે ત્યારે હજુ પણ ગુજરાતમાં સારા વરસાદની શક્યતાઓ જોવા મળી રહી છે હવામાન વિભાગે રાજ્યમાં વરસાદને લઈ આગાહી કરતા જણાવ્યું છે કે આગામી બે દિવસ સામાન્યથી ભારે વરસાદ પડી શકે છે. જ્યારે મંગળવારથી ફરી વરસાદનું જોર વધવાની શક્યતાઓ પણ હવામાન વિભાગે વ્યક્ત કરી છે.
ગુજરાતમાં બે દિવસ સામાન્ય વરસાદની આગાહી
આ વખતે સપ્ટેમ્બરમાં પડેલા સારા વરસાદને કારણે રાજ્યમાં જે પાણીની અછત સર્જાઈ હતી જે પુરી થઈ છે, મહત્વનું છે કે વરસાદ પાછો ખેંચાતા ખેડૂતો પણ સિંચાઈના પાણી માટે મજબૂર બન્યા હતા બીજી તરફ સ્થિતિ એવી સર્જાઈ હતી કે જો વરસાદ ન પડે તો ગુજરાતમાં પાણીની તંગી વર્તાઈ શકવાની સંભાવનાઓ વ્યક્ત કરવામાં આવી રહી હતી પરતું સપ્ટેમ્બર મહિનીથી રાજ્યમાં મેઘરાજાએ ધમાકેદાર બેટિંગ કરતા અને જળસ્ત્રોતમાં નવા નીર આવ્યા છે તેમજ ચેકડેમમાં નવા પાણીની આવક થતા પાણીનું સ્તર પર વધુ છે, જ્યારે સિંચાઈ માટે ખેડૂતોને પણ વરસાદી પાણી મળતે ખેડૂતો પણ ખુશખુશાલ જોવા મળી રહ્યા છે.
મંગળવારથી ફરી વરસાદનું જોર વધવાની શકયતા
જો કે હવામાન વિભાગે હજુ પણ ભારે થી અતિભારે વરસાદ પડવાની શક્યતાઓ સેવી છે. મધ્ય અને ઉત્તર ગુજરાતમાં હળવાથી ભારે વરસાદ પડી શકે છે. જ્યારે કેટલાક વિસ્તારમાં પવન સાથે વરસાદ પડશે તેવું હવામાન વિભાગે જણાવ્યું છે. દક્ષિણ ગુજરાત અને સૌરાષ્ટ્રમાં મધ્યમ વરસાદની શક્યતાઓ વ્યક્ત કરતા હવામાન વિભાગનું માનવું છે કે ગુજરાતમાં હજુ પણ 40 ટકા વરસાદની ઘટ જોવા મળી રહી છે જે સપ્ટેમ્બરની અંત સુધીમાં પુરી થઈ શકે છે, તેમજ આગામી 7 સપ્ટેમ્બર બાદ સારો વરસાદ પડવાની હવામાન વિભાગે આગાહી કરી છે.
ગુજરાતમાં હજુ 40 ટકા વરસાદની ઘટ હોવાનું અનુમાન
મહત્વનું છે કે લાંબા વિરામ બાદ રાજ્યના અનેક વિસ્તારમાં સારો એવો વરસાદ થતા ડેમોમાં નવા નીરની આવક થઈ છે. પરંતુ ચિંતાજનક વાત એ છે કે, રાજ્યના 15 ડેમમાં ટીપુય પાણી નથી. જો કે અમરેલી જિલ્લાનો ધાતરવાડી ડેમ સંપૂર્ણપણે ભરાયો છે. આ ઉપરાંત આ જ વિસ્તારમાં ધાતરવાડી-2 ડેમમાં છલકાયો છે. જયારે તાપી જિલ્લામાં આવેલાં દોસવાડા ડેમ પણ સંપૂર્ણ ભરાયો છે. જ્યારે બોટાદ જિલ્લામાં ખંભાડા ડેમમાં હાલ 94 ટકા પાણીનો જથ્થો છે. જયારે મહિસાગર જિલ્લામાં આવેલા વણાકબોરી ડેમમાં 93.34 ટકા અને અમરેલી જિલ્લાના ખોડિયાર ડેમમાં 90 ટકા પાણી ઉપલબ્ધ છે. બીજી તરફ, ઉત્તર ગુજરાતમાં હજુ ડેમો ખાલીખમ છે. ઉત્તર ગુજરાતના ડેમોમાં અત્યારે માત્ર 23.63 ટકા જ પાણી છે. જો હજુ વરસાદ નહી આવે તો આગામી દિવસોમાં
પાણીની ખેંચ વર્તાઇ શકે છે.