રાજ્યમાં ભારે વરસાદની આગાહી છે. ત્યારે ઉત્તરગુજરાતમાં મેઘરાજાએ ફરીથી પધરામણી કરી છે. આજે અરવલ્લી, સાબરકાંઠા, ખેડા, નડિયાદ, હિંમતનગર, રાજકોટ, પાટણ, ભાવનગર સહિતના વિસ્તારોમાં વરસાદ પડ્યો હતો.
હવામાન ખાતાની આગાહી બાદ આજે વહેલી સવારથી અરવલ્લી જીલ્લાના વિવિધ વિસ્તારોમાં વરસાદ પડ્યો હતો. ત્રણ દિવસના વિરામ બાદ જિલ્લના મોડાસા, માલપુર, મેઘરજ અને ભિલોડા તાલુકામાં સરેરાશ ૨ ઇંચ જેટલો વરસાદ ખાબક્યો હતો. તો મોડાસાના મોટી ઇસરોલ પંથકમાં ચાર ઇંચ જેટલો વરસાદ ખાબતા ખેતરોમાં પાણી ભરાયા હતા. જ્યારે ઇસરોલથી માધુપુરા ગામ વચ્ચેના રસ્તા પરના કોજ વે ઉપર થઇ પાણી પસાર થતા આસપાસના પાંચ ગામોના વાહન વ્યવહારને અસર થઇ હતી. જિલ્લાના અન્ય માર્ગો પર પણ વરસાદને કારણે વાહન ચાલકો ફસાયા હતા.
તો આ તરફ સાબરકાંઠામાં પણ ધોધમાર વરસાદ પડતા હડીયોલ ગામે પાણી ભરાયા હતા. ગામના તમામ રસ્તા પર પાણી ફરી વળતા ગ્રામજનો મુશ્કેલીમાં મુકાયા હતા. તો હડિયોલ-ગઢોડા રોડ પાણીમાં ગરકાવ થતા વાહન ચાલકોને સમસ્યા થઈ હતી.
સિદ્ધપુરમાં બે ઇંચથી વધુ વરસાદ
આ બાજુ પાટણમાં વરસાદે વિરામ લીધાબાદ ફરી ધમાકેદાર એન્ટ્રી કરતા સિદ્ધપુર શહેરમાં બે ઇંચથી વધુ વરસાદ ખાબક્યો હતો. જેને લઈને શહેરમાં પાણી ભરાયા. ભારે વરદસાદને પગલે નીચાણવાળા વિસ્તારો અને રસ્તાઓ પર પાણી ભરાયા. રસ્તાઓ પર પાણી ભરાઈ જતા વાહનચાલકોને મુશ્કેલીનો સામનો કરવો પડ્યો.
ધાનેરામાં ધોધમાર વરસાદ
આ ઉપરાંત રાજ્યમાં વરસાદી માહેલની વચ્ચે બનાસકાંઠાના ધાનેરામાં પણ ધોધમાર વરસાદ શરૂ થયો હતો. બપોરબાદ ધોધમાર વરસાદ પડતાં જ શહેરમાં પાણી ભરાવાનું શરૂ થયુ હતુ.
સુરેન્દ્રનગર જિલ્લાના ગામોના વાતાવરણમાં પલટો
સુરેન્દ્રનગર જિલ્લામાં વાતાવરણમાં પલટો જોવા મળ્યો. લીંબડી, ચુડા અને પાટડી ગામોમાં વરસાદી માહોલ સર્જાયો. તો સુરેન્દ્રનગર જિલ્લાના કેટલાક ગામોમાં ધીમીધારે વરસાદનું આગમન થયું.
હડીયોલ ગામે પાણી ભરાયા
હિંમતનગરના હડીયોલ ગામે પાણી ભરાયા હતા. ભારે વરસાદને પગલે ગામમાં અડધો ફૂટ પાણી ભરાયા હતા. હડિયોલ ગામના તમામ રસ્તા પર પાણી ફરી વળ્યા હતા. તો હડિયોલ-ગઢોડા રોડ પાણીમાં ગરકાવ થયો. પાણી ભરાતા લોકોને હાલાકીનો સામનો કરવા પડ્યો.
ખેડામાં ધોધમાર વરસાદ
રાજ્યમાં વરસાદી માહોલની વચ્ચે ખેડામાં ભારે વરસાદ શરૂ થયો. નડિયાદમાં ભારે પવન સાથે વરસાદ પડ્યો. વરસાદથી વાતાવરણમાં ઠંડક પ્રસરી છે. તો ખેડૂતોમાં ખુશીનો માહોલ જોવા મળી રહ્યો છે.
જળાશયોમાં પાણીની આવક થઇ
આ વરસાદના પગલે જીલ્લાના જળાશયોમાં પણ પાણીની આવક થઇ હતી. જેમાં મેશ્વોમાં 1710 કયુસેક, માજુમ્મા 500, વાત્રકમાં 145 તેમજ વૈડી ડેમમાં 1100 ક્યુએસેક પાણીની આવક ચાલુ થઇ હતી, જીલ્લામાં વરસેલા વરસાદને પગલે ભૂમિ પુત્રોમાં ખુશાલી વ્યાપી છે.