રાજ્યભરમાં ફરી એકવાર વરસાદનો રાઉન્ડ શરૂ થયો છે. ત્યારે શનિવારે સવારથી અરવલ્લીનાં મોડાસાનાં ગ્રામ્યપંથકમાં સતત 3 કલાકમાં 5 ઇંચ વરસાદ ખાબક્યો હતો. જ્યારે આજે પણ રાજ્યના મોટાભાગના વિસ્તારોમાં વરસાદી માહોલ યથાવત છે. સૌરાષ્ટ્ર અને ઉત્તર-દક્ષિણ ગુજરાતમાં મેઘરાજાની આજે પણ મહેર યથાવત જોવા મળી રહી છે. ક્યાંક ધોધમાર તો ક્યાંક ઝરમર ઝરમર વરસાદ વરસી રહ્યો છે. તો હવામાન વિભાગ દ્વારા આગાહી કરવામાં આવી છે.
જૂનાગઢ
જૂનાગઢમાં વિરામ બાદ વરસાદનું ફરી આગમન થયુ છે. ભાદરવાના પ્રારંભે જ મેઘરાજા મહેરબાન થયા છે. શહેર અને તાલુકાઓમાં ધીમીધારે વરસાદ વરસી રહ્યો છે. માળીયા, માંગરોળમાં ભારે વરસાદ વરસી રહ્યો છે. તો માળીયામાં વરસાદ થતા હટીના ભાખરવડા ડેમ ઓવરફ્લો થયો છે. ડેમ ઓવરફ્લો થતા પાણીની સમસ્યાનો અંત આવશે. જ્યારે હાલ ડેમમાં પાણીની આવક થતા કાંઠા વિસ્તારના 9 ગામને એલર્ટ કરવામાં આવ્યા છે. આંબેચા, જાનડી, સમઢીયાળા, કડાયા, ધણેજ, ઝડકા, ગડુના ગ્રામજનોને એલર્ટ કરાયા છે. સાથે જ તંત્ર દ્વારા સ્થાનિકોને નદીના પટમાં અવર-જવન ન કરવાની સૂચના અપાઈ છે.
કચ્છ
આગાહીના પગલે કચ્છના અબડાસામાં મોડીરાત્રે ગાજવીજ સાથે ભારે વરસાદ પડ્યો છે. ત્યારે અબડાસાના તેરા ગામમાં પશુઓ પર વીજળી પડી હતી. વીજળી પડતા 7થી વધુ પશુઓનો મોત નિપજ્યા છે.
અરવલ્લી-સાબરકાંઠાં
જ્યારે અરવલ્લીના ભિલોડામાં સતત વરસાદ વરસી રહ્યો છે. ભારે વરસાદ થતા ભીલોડાનો સુનસર ધોધ ફરી એક વખત જીવંત થયો છે. પંથકમાં છેલ્લા 24 કલાકમાં 2 ઈંચ વરસાદ નોંધાયો છે, જ્યારે સાબરકાંઠામાં પણ મેધરાજા મનમૂકીને વરસી રહ્યા છે.
સુરત
તો સુરતમાં વિરામ બાદ ફરી વરસાદ શરૂ થઇ ગયો છે. અનેક વિસ્તારમાં વરસાદી ઝાપટું પડ્યું. રાંદેર, અડાજણમાં વરસાદ પડ્યો. તો કતારગામ, અઠવા વિસ્તારમાં વરસાદી ઝાપટું છે. વરસાદને પગલે શહેરીજનોમાં આનંદ છવાયો છે.
હવામાન વિભાગ
ભાદરવા મહિનાની શરૂઆતના દિવસોમાં મેઘમહેર થઇ શકે છે. હવામાન વિભાગે અમદાવાદમાં આગામી 3 દિવસ ભારે વરસાદની આગાહી કરી છે. રાજસ્થાનમાં સક્રિય વરસાદી સિસ્ટમ આવી છે જેના કારણે વરસાદ વરસી શકે છે. રાજ્યના વિવિધ વિસ્તારમાં હળવા વરસાદની આગાહી કરવામાં આવી છે. રાજસ્થાન નજીકના વિસ્તાર અને સૌરાષ્ટ્ર-કચ્છમાં વધુ વરસાદની શક્યતા છે.