ચોમાસું / દક્ષિણ ગુજરાતમાં બારે મેઘ ખાંગા, હજુ પાંચ દિવસ ભારે વરસાદની આગાહી

સર્ક્યુલેશનના કારણે રાજ્યમાં વરસાદ વરસી રહ્યો છે. ત્યારે આગામી 4 ઓગસ્ટે વધુ એક સિસ્ટમ બનશે. ત્યારે ભારે વરસાદની આગાહીને લઇ માછીમારોને દરિયો ન ખેડવા સૂચના અપાઇ છે. સૌરાષ્ટ્ર- કચ્છમાં ભારે વરસાદ પડી શકે છે. 

જ્યારે પાટણ, મહેસાણા, છોટાઉદેપુરમાં પણ ભારે વરસાદની આગાહી કરાઇ છે. જ્યારે નર્મદા, દમણ, દાદરા હવેલી, નવસારી, વલસાડમાં પણ ધોધમાર વરસાદ વરસી શકે છે. તો ભાવનગર, અમરેલી, દીવ, ગીર સોમનાથ, જૂનાગઢ, બોટાદ, રાજકોટમાં ભારે વરસાદની આગાહી કરાઇ છે. જ્યારે અમદાવાદમાં પણ હળવાથી મધ્યમ વરસાદની આગાહી કરાઇ છે.

રાજ્યમાં વરસાદની જો વાત કરીએ તો, દક્ષિણ ગુજરાતમાં બારે મેઘ ખાંગા જેવી સ્થિતિ સર્જાઈ છે. ગુજરાતના બોર્ડર પર આવેલા મહારાષ્ટ્રના કેટલાક વિસ્તારોમાં ભારે વરસાદ થતાં નદી નાળાઓ છલકાઈ ગયા છે.

તો તાપી જિલ્લામાં પ્રવેશતી નદીઓમાં પણ પૂર જેવી સ્થિતિ સર્જાઈ છે. તાપીના વાલોડ, વ્યારા, સોનગઢ અને ડોલવણ પંથકમાં વરસાદના કારણે લો લેવલ કોઝ-વે પાણીમાં ગરકાવ થઈ ગયો હતો. જેથી વાહનવ્યવહારને અસર થઈ હતી. કોઝ-વે ડૂબી જતાં કેટલાક લોકો જીવના જોખમે નદી પાર કરી રહ્યા હતા. તો કેટલાક લોકો અટવાઈ પડ્યા હતા. 

કોઝવે પાણીમાં ગરકાવ થવાથી કણધા, કરંજખેડ, પપલવાળા, તાકીઅંબા, પીઠાદાર અને બેસનીયા ગામનો સંપર્ક કપાઈ ગયો હતો. તો ગ્રામજનોને તાલુકા મથક જવા માટે આ એક જ માર્ગ હોવાથી લોકોને હાલાકીનો સામનો કરવાનો વારો આવ્યો હતો.