આવ રે વરસાદ... / દક્ષિણ ગુજરાતમાં મેઘરાજા મહેરબાન, જાણો હવે ક્યાં ભારે વરસાદની આગાહી

• આજે રાજ્યના 61 તાલુકામાં વરસાદ વરસ્યો
• સૌથી વધુ દક્ષિણ ગુજરાતમાં વરસ્યો વરસાદ 
• અમદાવાદ, ગાંધીનગર, વડોદરામાં હળવા વરસાદની આગાહી

સૌથી વધુ વલસાડના કપરાડામાં સવા 5 ઈંચ
ગુજરાતમાં દક્ષિણ વિસ્તારમાં છેલ્લા ચાર દિવસથી વરસાદી માહોલ જામ્યો છે. રાજ્યમાં હવામાન વિભાગે પાંચ દિવસ સુધી ભારે વરસાદની આગાહી કરી હતી જેમાં આજે 61 તાલુકાઓમાં મેઘરાજા મન મૂકીને વરસ્યા હતા

23 જુલાઈએ બંગાળની ખાડીમાં લો પ્રેશર બની રહ્યું છે
રાજ્યમાં સૌથી વધુ વરસાદ દક્ષિણમાં જોવા મળી રહ્યો છે અને એમાં પણ વલસાડમાં તો મેઘરાજાએ જોરદાર ધડબડાટી બોલાવી છે ત્યારે આજે કપરાડામાં સૌથી વધુ પાંચ ઈંચ વરસાદ વરસ્યો હતો. આ સિવાય ધરમપુરમાં પોણા 2 ઈંચ, સુબિરમાં 1.5 ઈંચ, વઘઈમાં સવા ઈંચ, ડાંગમાં 1 ઈંચ વરસાદ, ડોલવણમાં 1 ઈંચ, બાલાસિનોરમાં 1 ઈંચ વરસાદ વરસ્યો હતો. ઉમરગામમાં અડધો ઈંચ, વાંસદામાં અડધો ઈંચ, પારડીમાં અડધો ઈંચ જ્યારે ખેરગામમાં અડધો ઈંચ વરસાદ વરસ્યો હતો. 

હવામાન વિભાગે દક્ષિણ ગુજરાતમાં ભારે વરસાદની કરી છે આગાહી
નોંધનીય છે કે હજુ આગામી સમયમાં પણ દક્ષિણ ગુજરાતમાં ભારે વરસાદની આગાહી કરવામાં આવી છે. 23 જુલાઇએ બંગાળની ખાડીમાં લો પ્રેશર બની રહ્યું છે જેના કારણે ગુજરાતમાં વરસાદ સારો રહે તેવી શક્યતા છે. દક્ષિણ ગુજરાતની સાથે સાથે અમદાવાદ, ગાંધીનગર, વડોદરામાં પણ હળવા વરસાદની આગાહી કરવામાં આવી છે. દક્ષિણ ગુજરાતમાં વલસાડ, નવસારી, ડાંગ, તાપી, દાદરા નગરહવેલીમાં ભારે વરસાદ રહે તેવી સંભાવના છે.