ચોમાસું / દક્ષિણ ગુજરાતમાં બારેમેઘ ખાંગા, દમણગંગા નદીમાં ઘોડાપૂર

સૌથી વધુ વરસાદ જીલ્લના કપરાડા અને વાપી તાલુકામાં વરસ્યો છે. આ બંને તાલુકામાં 10 ઇંચથી પણ વધુ વરસાદ નોંધાયો છે. જિલ્લાના મધુબન ડેમમાં પાણીની આવકમાં સતત વધારો થઇ રહ્યો છે. ડેમના ઉપરવાસમાં ભારે વરસાદથી મધુબન ડેમમાં પાણીની પુષ્કળ આવક થઇ રહી છે. હાલ ડેમમાં 1,69406 ક્યુસેક પાણીની આવક થતા ડેમનું લેવલ 73.95 મીટરએ પહોંચ્યું છે. જેથી રૂટ લેવલ જાળવવા ડેમનું વહીવટી તંત્ર મોડમાં આવી ગયું છે. ડેમના 8 દરવાજા 3.70 મીટર ખોલાતાં દમણગંગા નદી તોફાની બની છે. 

મધુબન ડેમમાંથી દમણગંગા નદીમાં દોઢ લાખ ક્યુસેક પાણી છોડવામાં આવી રહ્યું છે. ડેમમાંથી પાણી છોડાતા દમણગંગા નદી ગાંડતૂર બનતા નદીકિનારાના ગામના લોકોને સાવચેત રહેવા તંત્રનું સૂચન આપવામાં આવ્યું છે. વલસાડ જિલ્લા કલેકટર સી આર ખરસાણે નદી કિનારા વિસ્તારના લોકોને સાવચેત રહેવા ટ્વીટ કરી સૂચન કર્યું છે. જિલ્લામાં ભારે વરસાદની પરિસ્થિતિને લઇ તંત્ર એલર્ટ મોડ પર આવી ગયું છે અને આગામી ભારે વરસાદને પગલે અધિકારીઓએ પોતાની ઓફિસ ન છોડવા પણ સૂચના આપવામાં આવી છે.

તો વાપીના ચલા, ચાણોદ કોલોની વિસ્તારમાં પાણી ભરાવાની સમસ્યા ઉભી થઇ છે. વહેલી સવારથી જ સતત વરસી રહેલો વરસાદ નોકરી-ધંધા જતા લોકો માટે મુસીબત સાબિત થયો છે. તો શાળા કોલેજ જતા વિદ્યાર્થીઓ પણ ભારે વરસાદના કારણે અટવાયા છે. ત્યારે આગામી દિવસમાં હજી વધુ વરસાદની આગાહી હવામાન વિભાગે કરી છે. ત્યારે વલસાડ જિલ્લાનું વહીવટી તંત્ર પણ એલર્ટ પર રખાયું છે.