ગુજરાતમાં 5 દિવસની ભારે આગાહી વચ્ચે સૌરાષ્ટ્ર અને દક્ષિણ ગુજરાતમાં મેઘરાજાએ કહેર વર્તાવતા નીચાણવાળા વિસ્તારોમાં લોકોએ ભારે હાલાકીનો સામનો કરવો પડી રહ્યો છે.
સૌરાષ્ટ્ર અને દક્ષિણ ગુજરાતમાં મેઘરાજાનો કહેર જોવા મળ્યો
ક્યાંક પુલ ધરાશાયી થયો તો ક્યાંક નદીઓમાં ઘોડાપૂર સર્જાયું
જામનગરમાં રેડ એલર્ટ જાહેર કરાતા મનપા ફાયર વિભાગ ખડેપગે
ગુજરાતમાં સૌરાષ્ટ્ર અને દક્ષિણ ગુજરાતમાં સતત વરસી રહેલા વરસાદના કારણે રાજ્યના જૂનાગઢ, પોરબંદર, રાજકોટ, ગીર સોમનાથ અને દ્રારકા સહિતના વિસ્તારોના ગામડાઓ જાણે કે બેટમાં ફેરવાયા હોય એવું લાગી રહ્યું છે. બીજી બાજુ નવસારી અને વલસાડના વિસ્તારો પણ પાણીથી જળબંબાકાર થઇ ગયા છે. ત્યારે આજે રાજ્યના કયા-કયા વિસ્તારોમાં મેઘરાજાએ ધડબડાટી બોલાવી છે તે વિગતવાર જોઇશું.
ભારે વરસાદના કારણે ગીર-સોમનાથના ખેરા ગામનો પુલ તૂટ્યો
ભારે વરસાદના કારણે ગીર-સોમનાથના ખેરા ગામનો પુલ તૂટ્યો. ગામ અને સીમ વિસ્તારને જોડતો આ પુલ 2021માં જ બનાવાયો હતો. જો કે, પુલ તૂટતા સ્થાનિકોને ભારે હાલાકી થઇ રહી છે.
તારીખ 9 અને 10ના રોજ જામનગરમાં રેડ એલર્ટ જાહેર
બીજી બાજુ જામનગર જિલ્લાનો કાલાવડ તાલુકાનો ઉંડ ત્રણ ડેમ ઓવરફ્લો થતા કાલાવડ તાલુકાના રાજસ્થળી, ખીજડિયા, જસાપર સહિતના ગામડાઓને એલર્ટ કરાયા છે. મહત્વનું છે કે,
જામનગરમાં આવતીકાલે બે દિવસ ભારે વરસાદની આગાહીના પગલે ફાયર વિભાગ સજ્જ બની ગયું છે. જણાવી દઇએ કે, હવામાન વિભાગ દ્વારા તારીખ 9 અને 10ના રોજ જામનગરમાં રેડ એલર્ટ જાહેર કરાયું છે. મનપાના ફાયર વિભાગે કોઈ પણ આપદાને પહોંચી વળવા માટે અનેક સાધનો સજ્જ કર્યા છે. રેસ્ક્યુ બોટ સહિતના સાધનો સાથે લોકોની મદદે પહોંચવા માટે મનપા ફાયર વિભાગ ખડેપગે ઉભું રહ્યું છે.
વલસાડના મધુબન ડેમમાં પાણી છોડાતા દમણગંગા નદીનું તોફાની સ્વરૂપ
વલસાડના મધુબન ડેમમાં પાણીની આવકમાં ધરખમ વધારો થયો છે. મધુબન ડેમના 6 દરવાજા 1 મીટર ખોલી નાખવામાં આવ્યા છે. ડેમમાંથી દમણ ગંગા નદીમાં 21 હજાર 900 ક્યુસેક પાણી છોડાયું છે. પાણી છોડાતા દમણગંગા નદીએ તોફાની સ્વરૂપ ધારણ કર્યું છે. વાપી નજીક દમણગંગા નદીનો વિયર ઓવરફ્લો થઇ ગયો છે. પીવાનું પાણી પૂરું પડતો વાપીનો વિયર ઓવરફ્લો થયો છે.
પંચમહાલના જાંબુઘોડા પંથકમાં વરસાદી માહોલ
આ સાથે પંચમહાલના જાંબુઘોડા પંથકમાં વરસાદી માહોલ જામ્યો છે. જાંબુઘોડાના ભાટ સહિતના કોતરોમાં નવા નીરની આવક આવી છે. કોરતના હાલોલ-બાડેલી ધોરી માર્ગ પર પાણી ફરી વળ્યા. વહેલી સવારથી 1 ઈંચથી વધુ વરસાદ નોંધાયો.
હિંમતનગર-મહેસાણાને જોડતા હાથમતી પુલ પર 108 સહિત પોલીસકર્મીઓ ફસાયા
સાબરકાંઠા જિલ્લામાં પણ ભારે વરસાદના કારણે જિલ્લાભરના નદી નાળા છલકાયા છે. હિંમતનગર-મહેસાણાને જોડતા હાથમતી પુલ પર ટ્રાફિક જામના દ્રશ્યો સર્જાયા છે. ટ્રાફિકમાં 108 સહિત પોલીસકર્મીઓ પણ ફસાયા હતા. ભારે વરસાદના કારણે સમગ્ર વિસ્તારમાં લોકોને ભારે હાલાકી પડી રહી છે. પુલ પરથી નીચે પાણીનો ધોધ વહી રહ્યો છે.
પંચમહાલના જાંબુઘોડા પંથકમાં આજ સવારથી 1 ઇંચથી વધુ વરસાદ નોંધાયો છે. જાંબુઘોડાના ભાટ સહિતના કોતરોમાં નવા નીરની આવક આવી છે. કોતરના પાણી હાલોલ-બોડેલી ધોરી માર્ગ પર આવી ગયા છે.
અમરેલીની છેવાડાની સોસાયટીઓ પાણીમાં તરબતોળ
અમરેલી શહેરમાં ધોધમાર વરસાદ વરસતા અમરેલીના રાજમાર્ગો પાણી-પાણી થઇ ગયા છે. શહેરના રાજકમલ ચોક, ભીડ ભંજન ચોકમાં પાણી ભરાઇ ગયા છે. જૂના માર્કેટીંગ યાર્ડ રોડ પર પાણી ભરાઇ ગયા છે. અમરેલીના ટાવર રોડ પાણી-પાણી થઇ ગયા છે. અમરેલીની છેવાડાની સોસાયટીઓ પાણીમાં તરબતોળ થઇ ગઇ છે.
વડોદરામાં વહેલી સવારથી જ ધીમી ધારે સામાન્ય વરસાદ વરસતા MS યુનિવર્સિટીની બહાર પણ પાણી ભરાઇ ગયા છે. એક્સપેરિમેન્ટલ ગેટ અને કોમર્સ ગેટની બહાર પણ પાણી ભરાઇ જતા વિદ્યાર્થીઓને ભારે હાલાકી પડી રહી છે. જેના લીધે કોર્પોરેશનની પ્રિ-મોન્સૂનની કામગીરી સામે અનેક સવાલો ઉઠી રહ્યાં છે.
પોરબંદરના દરિયામાં પણ કરંટના કારણે ઉંચા મોજા ઉછળ્યાં
પોરબંદરના દરિયામાં પણ કરંટના કારણે ઉંચા મોજા ઉછળતા જોવા મળ્યા છે. ભારે પવન સાથે પોરબંદર સહિત આસપાસના વિસ્તારોમાં બરાબર વરસાદી માહોલ જામ્યો છે. ભારે વરસાદની આગાહીના પગલે વહીવટીતંત્ર પણ એલર્ટ થઇ ગયું છે. જ્યારે નવસારી જિલ્લામાં પણ વરસાદી માહોલ જામ્યો છે. જ્યારે ગણદેવીમાં દેવધા ડેમમાં પાણીની આવક આવતા ખેડૂતોમાં ખુશીનો માહોલ જામ્યો છે.
દેવસર -બીલીમોરા શહેરને જોડતા માર્ગ પર તોતિંગ વૃક્ષ ધરાશાયી
નવસારી જીલ્લાના ગણદેવી તાલુકામાં પણ ભારે પવન સાથે વરસાદ વરસતા દેવસર -બીલીમોરા શહેરને જોડતા માર્ગ પર તોતિંગ વૃક્ષ ધરાશાયી થઇ ગયા છે. વૃક્ષ ધરાશાયી થતા વીજ પોલ પણ ધરાશાયી થઇ ગયો છે. દેવસર પંચાયત તેમજ દ્વારા દક્ષિણ ગુજરાત વીજ કંપનીના કર્મીઓ દ્વારા વૃક્ષ તેમજ વીજ પોલ હટાવવાની કામગીરી હાથ ધરાઇ છે.
સાળંગપુર પંથકમાં 6 કલાકમાં 4.5 ઇંચ કરતા વધુ વરસાદ
બોટાદના બરવાળા તાલુકાના સાળંગપુર પંથકમાં તેમજ ખાંભડા, રેફડા અને ચાચરીયામાં પણ ધોધમાર વરસાદ વરસ્યો છે. 6 કલાકમાં 4.5 ઇંચ કરતા વધુ વરસાદ નોંધાયો છે. બરવાળા શહેર પંથકના વિસ્તારોમાં સામાન્ય વરસાદ જોવા મળ્યો. ખાંભડા ડેમમાં નવા નીરની આવક આવી છે. ડેમની સપાટી 49.15 મીટરે પહોંચી છે. ડેમમાં 1.60 મીટર પાણીનો વધારો નોંધાયો છે.