મેઘમહેર / અમદાવાદમાં વરસાદના કારણે બન્યા એવા હાલ કે વાહન ચાલકો મુસીબતમાં મુકાયા, જુઓ શહેરમાં સર્જાયા આવા દ્રશ્યો  

• અમદાવાદમાં ૨૫.૬૫ ઇંચ વરસાદ નોંધાયો
• શહેરના અનેક વિસ્તારોમાં ધમાકેદાર વરસાદ
• શહેરમાં અનેક જગ્યાએ વરસાદી પાણી ભરાયા

ચાંદખેડાવાસીઓ સૌથી ઓછા ૧૯.૨૪ ઇંચ વરસાદથી પરેશાનઃ અમદાવાદમાં ૨૫.૬૫ ઇંચ વરસાદ નોંધાયો છે, ત્યારે ગુજરાતમાં આગામી પાચં દિવસ સુધી વરસાદની આગાહી કરવામાં આવી રહી છે એવામાં જાણકારો કહી રહ્યા છે કે આગામી ગાંધી જયંતી સુધી શહેરમાં વરસાદી વાતાવરણ છવાયેલું રહેશે.

અમદાવાદના અનેક વિસ્તારોમાં ધમાકેદાર વરસાદ

શહેરમાં સવારના ૧૦-૩૦ વાગ્યાથી ફરીથી મેઘમહેર શરૂ થઈ છે. ખાસ કરીને પશ્ચિમ અમદાવાદમાં   ભારે વરસાદ પડી રહ્યો છે. બોડકદેવ, સાયન્સ સિટી, ગોતા, ઘાટલોડિયા, વેજલપુર, ચાંદલોડિયા, ઉસ્માનપુરા, ચાંદખેડા અને રાણીપમાં ભારે વરસાદ વરસી રહ્યો છે. વરસાદનું જોર વધવાથી એસજી હાઈવે પર ટ્રાફિક અસ્તવ્યસ્ત થઈ ગયો છે. સેંકડો વાહનચાલકો મુસીબતમાં મુકાયા છે.

શહેરમાં અનેક જગ્યાએ વરસાદી પાણી ભરાયા

શહેરમાં ચાલુ સપ્ટેમ્બર મહિનામાં સતત વરસાદી માહોલ રહ્યો છે. જોકે એકધાર્યો ભારે વરસાદ તો આ દિવસોમાં પડ્યો નથી, પરંતુ વરસાદનાં હળવાંથી ભારે ઝાપટાં કે પછી ઝરમર વરસાદ લોકોને ચોમાસુ હજુ જળવાઈ રહ્યું છે તેવો અહેસાસ કરાવે છે. આમ તો રાજ્યનાં અન્ય શહેરોની જેમ અમદાવાદના રસ્તાઓ પર નદીઓ વહી નથી, તેમ છતાં હવે અમુક અંશે સિઝનનો સંતોષકારક વરસાદ પડી ચૂક્યો છે. મ્યુનિ. તંત્ર દ્વારા શહેરના ૨૫ વિભિન્ન સ્થળોએ વરસાદમાપક યંત્ર ગોઠવ્યાં છે અને તેમાં દરરોજ નોંધાતી વરસાદની આંકડાકીય માહિતીને જોતાં ઓઢવમાં આ સિઝનનો સૌથી વધુ ૩૦.૩૨ ઇંચ વરસાદ ખાબકી ચૂક્યો છે.

પાણી ભરાવાની સમસ્યા-સ્થાનિક હેરાન પરેશાન 

પાલડી ટાગોર હોલ સ્થિત મ્યુનિ. મધ્યસ્થ કન્ટ્રોલ રૂમનાં સૂત્રોનાં જણાવ્યા મુજબ શહેરના સાત ઝોન પૈકી પૂર્વ ઝોનમાં ચકુડિયા, ઓઢવ, વિરાટનગર, નિકોલ, રામોલ અને કઠવાડા એમ છ જગ્યાએ, પશ્ચિમ ઝોનમાં ટાગોર હોલ, ઉસ્માનપુરા, ચાંદખેડા અને રાણીપ- એમ ચાર જગ્યાએ, દક્ષિણ-પશ્ચિમ ઝોનમાં સરખેજ, જોધપુર, બોપલ અને મક્તમપુરા- એમ ચાર જગ્યાએ, મધ્ય ઝોનમાં મ્યુનિ. કોર્પોરેશન મુખ્યાલય અને દૂધેશ્વર- એમ બે જગ્યાએ, ઉત્તર ઝોનમાં મેમ્કો, નરોડા અને કોતરપુર- એમ ત્રણ જગ્યાએ અને દક્ષિણ ઝોનમાં મણિનગર, વટવા- એમ બે જગ્યાએ વરસાદમાપક યંત્ર ગોઠવાયાં છે, જ્યાં વરસાદને લગતી માહિતી એકત્ર કરીને તે મુજબના આંકડાના આધારે મિ.લિ. કે ઇંચમાં પડેલો વરસાદ દર્શાવાય છે.

અમદાવાદનો સિઝનનો સરેરાશ વરસાદ ૬૫૧.૪૬ મિ.મી

શહેરમાં કુલ ૨૫ જગ્યા પૈકી ઓઢવ ખાતે ચાલુ ચોમાસાની સિઝનનો સૌથી વધુ ૩૦.૩૨ ઇંચ વરસાદ પડી ચૂક્યો છે. ઓઢવવાસીઓ વરસાદના મામલે નસીબદાર બન્યા છે. પૂર્વ ઝોનના ઓઢવમાં ચાલુ સિઝનનો સૌથી વધુ વરસાદ પડ્યો છે, તો પશ્ચિમ ઝોનના ચાંદખેડામાં સૌથી ઓછો વરસાદ નોંધાયો છે. ચાંદખેડાવાસીઓ માત્ર ૧૯.૨૫ વરસાદ પડવાથી પરેશાન છે.

ગુજરાતમાં સાર્વત્રિક વરસાદની આગાહી 

અમદાવાદનો સિઝનનો સરેરાશ વરસાદ ૬૫૧.૪૬ મિ.મી. એટલે કે ૨૫.૬૫ ઇંચ નોંધાયો છે તેમ મ્યુનિ. મધ્યસ્થ કન્ટ્રોલરૂમનાં સૂત્રો વધુમાં જણાવે છે. દરમિયાન હજુ આગામી તા. ૨ ઓક્ટોબર- ગાંધી જયંતી સુધી વરસાદ પડશે તેવી સ્થાનિક હવામાન વિભાગની કચેરી દ્વારા આગાહી કરાઈ છે, જે મુજબ આજે મધ્યમ વરસાદ, આવતી કાલે હળવો વરસાદ, તા. ૨૯ ઓક્ટોબરે ફરી મધ્યમ વરસાદ, તા. ૩૦ સપ્ટેમ્બરે હળવો વરસાદ અને તા. ૧ અને ૨ ઓક્ટોબરે ફરી મેઘો મહેરબાન થાય તેવી આગાહી છે.