સૌરાષ્ટ્ર અને દક્ષિણ ગુજરાતના અનેક જિલ્લાઓમાં આજે સવારથી ભારે પવન સાથે વરસાદ શરૂ છે. આ સાથે જ હવામાન વિભાગની આગાહી અનુસાર આવનાર પાંચ દિવસ સુધી વરસાદ થવાની સંભાવના છે. ઉપરાંત નવરાત્રી માટે થનગની રહેલાં ખૈલયાઓના નોરતાં બગડવાની પૂર્ણ સંભાવના છે.
આવનાર પાંચ દિવસ ઉત્તર ગુજરાત, દક્ષિણ ગુજરાત, સૌરાષ્ટ્ર અને મધ્ય ગુજરાતમાં છુટા છવાયા વરસાદી ઝાપટાની સંભાવના છે. ત્યારે સૌરાષ્ટ્રના જામનગર, રાજકોટ, પોરબંદર સહિતના વિસ્તારોમાં ધોધમાર વરસાદ વરસવાની સંભાવના છે.
રાજકોટમાં ભારે પવન સાથે વરસાદ
રાજકોટમાં ભારે પવન અને ગાજવીજ સાથે વરસાદ વરસ્યો છે. રાજકોટ શહેર સહિત લોધિકા, મેટોડા અને પડધરી વિસ્તારોમાં વરસાદ ખાબક્યો છે. કોટડાસાંગણીમાં 2 ઈંચ જેટલો વરસાદ થયો છે. વરસાદી માહોલ સર્જાતા શહેરમાં ઠંડક પ્રસરી છે.
નવસારી જિલ્લામાં વીજળીના કડાકા સાથે વરસાદ
નવસારી જિલ્લામાં વીજળીના કડાકા સાથે વરસાદ ખાબક્યો હતો. બફારા બાદ વરસાદ વરસતા વાતાવરણમાં ઠંડક પ્રસરી હતી. તો વરસાદની સાથે સાથે ધોળા દિવસે અંધારપટ સર્જાયો હતો.
જોડિયામાં એક ઇંચ વરસાદ
જામનગરમાં ધોધમાર વરસાદના પગલે બજારોમાં પાણી વહેતાં થયા છે. ધ્રોલ અને જામજોધપુરમાં અડધો ઈંચ જેટલો વરસાદ વરસ્યો, તો જોડિયામાં એક ઈંચ વરસાદ પડ્યો હતો.
પોરબંદરના બરડા પંથકમાં વરસાદ
પોરબંદરના બરડા પંથકમાં વરસાદી વાતાવરણ સર્જાયું હતું. સીમર, ભોમિયાવદર અને રોજીવાડામાં વરસાદ વરસ્યો છે. આ વિસ્તારમાં દોઢ ઈંચ વરસાદ વરસતા વાતાવરણમાં ઠંડક પ્રસરી હતી.
અરવલ્લીના મોડાસા સહિત વરસાદ
અરવલ્લીના મોડાસા સહિત અનેક વિસ્તારોમાં ગાજવીજ સાથે વરસાદ ખાબક્યો હતો. મોડાસાના પોલીસ સ્ટેશન ફરતે પાણી ફરી વળ્યા હતા. મોડાસાના શિણોલમાં એક ઈંચ વરસાદ ખાબક્યો હતો. શામળાજી સહિત પંથકમાં ગાજવીજ સાથે વરસાદ શરૂ થતા કેટલાક વિસ્તારમાં વીજળી ગુલ થઇ હતી.
ખેડા જિલ્લામાં વાવાઝોડા સાથે વરસાદ
નડિયાદ સહિત ખેડા જિલ્લામાં ભારે પવન સાથે વરસાદી ઝાપટા પડ્યા હતા. જેમાં મહેમદાવાદમાં 1 ઇંચ, નડિયાદમાં અડધો ઇંચ વરસાદ પડ્યો હતો. ચોમાસું પૂર્ણતાના આરે છે, ત્યારે વરસાદનું જોર જારી રહેતા હવે ખેડૂતોમાં ચિંતામાં મુકાયા છે.
અંકલેશ્વરમાં 2 કલાકમાં અઢી ઇંચ વરસાદ
ઉમેજ ગામમાં 2 કલાકમાં 2 ઇંચ વરસાદ ખાબક્યો હતો. સામતેર અને કાણેકબરડામાં 1 ઇંચ, ખંભાળિયામાં અડધા કલાકમાં દોઢ ઇંચ, ભાવનગરના સિહોર અને તળાજામાં પોણો-પોણો ઇંચ વરસાદ વરસી ગયો છે.
વડોદરામમાં પોણો ઈંચ વરસાદ
વડોદરાના કરજણમાં પોણા કલાકમાં પોણા બે ઇંચ વરસાદ પડ્યો હતો.
વલસાડ જિલ્લામાં ઉમરગામ વિસ્તારમાં વીજ ગાજ સાથે વરસાદ ખાબક્યો હતો.
ઉત્તર ગુજરાતમાં વિજાપુરમાં દોઢ ઈંચ વરસાદ પડ્યો હતો
મહેસાણામાં એક ઇંચથી વધુ વરસાદ ખાબક્યો જ્યારે વિસનગરમાં 10મીમી વરસાદ પડ્યો હતો
ખંભાળિયામાં અડધા કલાકમાં દોઢ ઇંચ વરસાદ પડી જતાં રસ્તા પર પાણી ફરી વળ્યાં હતાં.
પાંચમા નોરતા પહેલા વિદાય નહીં થાય ચોમાસુંઃ હવામાન વિભાગ
નવરાત્રીના ગણતરીના દિવસો બાકી છે. ત્યારે હવામાન વિભાગ દ્વારા ફરી એકવાર ભારે વરસાદની આગહી કરવામાં આવી છે. ત્યારે આવનાર ૩ તારીખ સુધી વરસાદની આશંકા હવામાન વિભાગ દ્વારા વ્યક્ત કરવામાં આવી હતી. ત્યારે હવામાન વિભાગના નિયામક જયંત સરકારે જણાવ્યું હતું કે, આગામી દિવસોમાં રાજ્યમાં વરસાદ રાજ્યમાં વરસાદની સંભાવના છે. જો કે દક્ષિણ ગુજરાતમાં ભારે વરસાદ થવાની આશંકા વ્યક્ત કરી હતી. સાથે સાથે દરિયાકાંઠા પર વિસ્તારના માછીમારોને દરિયો નહીં ખેડવાનું સુચન કરવામાં આવ્યું છે. તેમજ માછીમારી માટે દરિયાકાંઠા લોકોને એલર્ટ કરવમાં આવ્યાં છે. 3 ઓક્ટોબર સુધી વરસાદ થવાની નહીવત્ શક્યતા છે.