જળબંબાકાર / રાજ્યભરમાં ભારે વરસાદની સ્થિતિ યથાવત, 2 દિવસ ભારે આગાહીને લઇ તંત્ર એલર્ટ

 

ખેડાના 10 તાલુકામાં વરસાદ થતા તંત્ર એલર્ટ:

ખેડા જિલ્લામાં સતત ધોધમાર વરસાદ વરસી રહ્યો છે. ખેડાના 10 તાલુકામાં વરસાદ થતા તંત્ર એલર્ટ થયુ છે. મહેમદાવાદ, ડાકોર, ઠાસરા, ખેડા, મહુધા, કઠલાલ, કપડવંજ અને ગળતેશ્વરમાં વરસાદ વરસી રહ્યો છે. ભારે વરસાદની આગાહીને લઈને કલેકટર દ્વારા લોકોને સાવચેત રહેવા સૂચના અપાઈ છે. નીચાણવાળા વિસ્તારોમાં રહેતા લોકોને સલામત સ્થળે ખસેડવાના આદેશ અપાયા છે.

છોટાઉદેપુરમાં વરસાદી આક્રમણ:

છોટાઉદેપુર જિલ્લામાં ગત રાત્રીના આઠ વાગ્યાથી શરૂ થયેલા વરસાદના આક્રમણના પગલે સર્વત્ર જળબંબોળની સ્થિતિ સર્જાઇ છે. જેમાં કવાંટ તાલુકામાં 20 ઇંચ વરસાદ અને છોટાઉદેપુરમાં 13 ઇંચ વરસાદ ખાબક્યો છે. 24 કલાકમાં જ તોફાની વરસાદના પાણીની સાથે રામી ડેમ પણ ઓવરફ્લો થતાં હેરણ નદી ગાંડીતુર બની છે સાથે ઓરસંગ પણ બે કાંઠે થતાં લોકો નદીના નીર નીહાળવા માટે ઉમટી પડ્યાં હતાં. રામી ડેમે 196.55ની સપાટી વટાવી 20 સેન્ટીમીટરે ઓવરફ્લો થઇ છે. મધરાતે વરસાદી પાણીના ધસમસતા પ્રવાહના કારણે 40થી વધુ ગામોને દોડધામ કરવાનો વારો આવ્યો છે. પાવીજેતપુર તાલુકાના ગામોમાં મધરાતે બે વાગ્યે વરસાદી પાણી ભરાતાં લોકોને સલામત સ્થળે ખસેડાયા છે.
 

મહીસાગરમાં સતત ધોધમાર વરસાદ:

મહીસાગરના સંતરામપુર, કડાણામાં સતત ધોધમાર વરસાદ વરસી રહ્યો છે. ભારે વરસાદ થતા કડાણા ડેમમાં પાણીની આવક થઈ રહી છે. ડેમમાં 1 લાખ 77 હજાર 217 ક્યુસેક પાણીની આવક થઈ રહી છે. પાણીની આવક થતા છેલ્લા 24 કલાકમાં ડેમની સપાટીમાં 5 ફૂટનો વધારો થયો છે. પાણીની આવક થતા સપાટી 402.6 ફૂટ પર પહોંચી છે. આ ડેમની ભયજનક સપાટી 419 ફૂટ છે. હાલમાં રુલ લેવલની સપાટીથી પાણી માત્ર 10 ફૂટ નીચે છે.

નર્મદા ડેમના 25 દરવાજા ખોલાયા:

ઉપરવાસમાં ભારે વરસાદ થતાં નર્મદા ડેમની જળ સપાટી પ્રથમવખત 131 મીટરે પહોંચતાં મોડી રાત્રે ડેમના 25 દરવાજા ખોલવામાં આવ્યા છે. ઉપરવાસમાં ભારે વરસાદને લઇ પાછલા ઘણા દિવસથી નર્મદા ડેમમાં પાણીની સતત આવક થઇ રહી હતી. જ્યારે મોડી રાત્રે ડેમ ઓવરફ્લો થતાં ડેમના 25 દરવાજા 0.92 સેમી  ખોલવામાં આવ્યા છે.  25 દરવાજા 0.92 સેમી ખોલી 6 લાખ ક્યૂસેક પાણી છોડાયું છે. જ્યારે નદીકાંઠે અવર-જવર ન કરવા તંત્ર દ્વારા સૂચના આપવામાં આવી છે. ભરૂચ અને નર્મદા જિલ્લાના ગામોને એલર્ટ કરવામાં આવ્યા છે. ડેમ ખાતે પાણીની સપાટી 131 મીટરે વટાવી જતાં દરવાજા ખોલનો નિર્ણય લેવાયો હતો. હાલ ડેમની સપાટી 131.16 મીટર છે. ડેમમાં હાલ 6,23,635 ક્યુસેક્સ પાણીની આવક થઈ રહી છે, જ્યારે 50,070 ક્યુસેક્સ પાણીની જાવક થઈ રહી છે. તો નર્મદાના ગોરા ગામનો બ્રિજ અવરજવર માટે બંધ કરાયો છે. નર્મદા ડેમમાંથી પાણી છોડાતા બ્રિજ પર અવરજવર બંધ કરાયો છે. કલેક્ટરે સોશિયલ મીડિયામાં જાહેરાત કરી છે. ચોમાસામાં પુલની રેલિંગ પણ કાઢી લેવાઇ છે. ગોરા ગામનો ડૂબાડૂબ બ્રિજ પથ્થરોનો બનેલો છે.

ભરૂચમાં નર્મદા નદીએ વોર્નિંગ લેવલ વટાવતા તંત્ર એલર્ટ:

ભરૂચમાં નર્મદા નદીએ વોર્નિંગ લેવલ વટાવતા તંત્ર એલર્ટ પર છે. વહીવટી તંત્ર દ્વારા લોકોનું સ્થળાંતર કરવામાં આવી રહ્યું છે. અંકલેશ્વરના સરફૂદ્દીન ગામ ખાતે એસડીએમીન ટીમ સ્થળાંતરની પ્રક્રિયા શરૂ કરી દીધી છે. નદી કાંઠાના પાસેના ગામોમાંથી 500 લોકોનું સ્થળાંતર કરવામાં આવ્યું છે. સરફુદ્દીન, ખાલપિયા, જુના કાંસિયા અને બોરભાઠા બેટમાં લોકોને સલામત સ્થળે ખસેડવામાં આવ્યા છે.

ડીસામાં ધોધમાર વરસાદ:

બનાસકાંઠાના ડીસામાં ધોધમાર વરસાદ વરસી રહ્યો છે. ત્યારે ભારે વરસાદને કારણે ડીસાના કંશારી ગામના રસ્તાઓ પર પાણી ફરી વળ્યા છે.. ઠેર ઠેર પાણી ભરાતા લોકોને ભારે હાલાકીનો સામનો કરવાનો વારો આવ્યો છે.

અરવલ્લીમાં સાંબેલાધારે:

અરવલ્લીના ધનસુરા અને બાયડમાં ધોધમાર વરસાદ વરસી રહ્યો છે. તાલુકામાં ભારે વરસાદ થતા કોઝ-વે પાણીમાં ડૂબ્યા છે. ભારે વરસાદના કારણે ધનસુરાના સેઘીયાની, રાયણ, છેવાડીયાના ગામ સંપર્ક વિહોણા થયા છે. ભારે વરસાદના કારણે બાયડના ભારુજીના મુવાડા, મહાદેવપુરામાં વાહન વ્યવહાર ઠપ થયો છે. મગનપુરા, રણછોડપુરા સહિતના ગામમાં વાહન વ્યવહારને અસર થઈ છે. વાહન વ્યવહાર ખોરવાતા લોકોને હાલાકી ભોગવવી પડી રહી છે.

દાહોદમાં સતત ધોધમાર વરસાદ:

દાહોદમાં સતત ધોધમાર વરસાદ વરસી રહ્યો છે. ભારે વરસાદ થતા જિલ્લામાં આવેલા નાળા ઓવરફ્લો થયા છે. જ્યારે પડાવ વિસ્તારમાં આવેલી દૂધમતી નદી ઓવરફ્લો થઈ છે. નદીના પાણી રસ્તા પર આવતા વાહન વ્યવહાર બંધ કરાયો અને લોકોને હાલાકી થઈ રહી છે. તંત્ર દ્વારા સાવચેતીના ભાગરૂપ એલર્ટ જાહેર કરાયું છે. કોઈ અનિચ્છનિય ઘટના ન બને તે માટે નદી કિનારે પોલીસકર્મીને તૈનાત કરવામાં આવ્યા છે.

વડોદરામાં ફરી વરસાદ:

વડોદરામાં ભારે વરસાદને કારણે વિશ્વામિત્રી નદીની જળ સપાટીમાં વધારો થયો છે. ભારે વરસાદને કારણે આજવા ડેમ અને પ્રતાપપુરા સરોવરમાંથી સતત પાણીની આવક થઈ રહી છે. હાલ નદીની જળ સપાટી 14 ફૂટે પહોંચી છે. અને નદીની ભયાજનક સપાટી 26 ફૂટ છે. વિશ્વામિત્રી નદીમાં 8300 કયુસેક પાણીની આવક થઈ રહી છે. ત્યારે આજવા ડેમની સપાટી 212.15 ફૂટ પહોંચી છે. કલેકટરે તાત્કાલીક અધિકારીઓની બેઠક બોલાવીને પરિસ્થિતિ પર નજર રાખવા માટે આદેશ કર્યો છે.

અમદાવાદમાં મોડી રાતથી વરસાદ શરૂ:

આગાહીને પગલે અમદાવાદમાં રાત્રે 1 વાગ્યાથી વરસાદ શરૂ થયો છે. મોટાભાગના વિસ્તારોમાં હજુ વરસાદ ચાલુ છે. ધીમીધારે વરસાદ પડવાના કારણે શહેરીજનોમાં આનંદ જોવા મળ્યો છે. ઝરમર ઝરમર વરસાદમાં લોકો અહલાદક વતાવરણની મજા માણી રહ્યા છે. તો હવામાન વિભાગ દ્વારા 11 ઓગસ્ટ સુધી ભારે વરસાદની આગાહી કરવામાં આવી છે.

સુરેન્દ્રનગર જિલ્લામાં પણ સાર્વત્રિક વરસાદ:

આ તરફ સુરેન્દ્રનગર જિલ્લામાં પણ સાર્વત્રિક વરસાદ વરસી રહ્યો છે. સુરેન્દ્રનગરમાં વહેલી સવારથી ધીમીધારે વરસાદ પડી રહ્યો છે. તો જિલ્લાના લિંબડી, ચુડા અને ધ્રાંગધ્રા તાલુકાના ગ્રામ્ય વિસ્તારોમાં પણ વરસાદ પડી રહ્યો છે. જ્યારે વઢવાણમાં મોડી રાતથી ધીમધારે વરસાદ પડી રહ્યો છે. જેના કારણે ખેડૂતોમાં પણ ખુશીની લાગણી છવાઈ ગઈ છે.

તાપીમાં મોડી રાતથી વરસાદ:

તાપીમાં ભારે વરસાદ થતા ઉકાઈ ડેમમાં પાણીની આવક થઈ છે. પાણીની આવક થતા ઉકાઈ ડેમમાંથી હાઈડ્રો દ્વારા પાણી છોડાવામાં આવશે. 4 હાઈડ્રો પાવર સ્ટેશન દ્વારા પાણી છોડી વીજળી ઉત્પન્ન કરાશે. હાઇડ્રો પાવર સ્ટેશન દ્વારા 24 હજાર ક્યુસેક પાણી તાપી નદીમાં છોડવામાં આવશે. જેને લઈને તંત્ર દ્વારા એલર્ટ રહેવા માટે સૂચના અપાઈ છે.

રાજકોટમાં ભારે વરસાદની આગાહીઃ તમામ કર્મચારીઓની રજા રદ્દ

રાજકોટ શહેરમાં સતત ધોધમાર વરસાદ વરસી રહ્યો છે. હવામાન વિભાગે બે દિવસ ભારે વરસાદની આગાહી કરી છે.  ભારે વરસાદની આગાહીને પગલે વહીવટી તંત્ર એલર્ટ થયુ છે. આગાહીને પગલે શહેરમાં એક NDRF અને બે SDRFની ટીમ તૈનાત કરાઈ છે. કલેક્ટરે તમામ અધિકારીઓને એલર્ટ રહેવા માટે સૂચના પણ આપી છે. સાથે જ કર્મચારીઓને હેડક્વાર્ટર ન છોડવા માટેની સૂચના પણ અપાઈ છે. તમામ અધિકારીઓની બે દિવસ માટે રજાઓ રદ્દ કરવામાં આવી છે.

પંચમહાલમાં સતત વરસાદ:

પંચમહાલમાં સતત ધોધમાર વરસાદ થઈ રહ્યો છે. ભારે વરસાદના કારણે પાનમ નદીમાં પાણીની આવક થઈ છે. ઘણા સમય બાદ પાનમ નદીમાં નવા નીર આવ્યા છે. નદીની જળસપાટીમાં સતત વધારો થઈ રહ્યો છે. નદીમાં પાણીની આવક થયા બાદ હવે ડેમની પણ સપાટીમાં વધારો થાય તેવી શક્યતા છે.

અતિભારે વરસાદની આગાહી:

બંગાળની ખાડીમાં લો પ્રેશરને કારણે  રાજ્યમાં હજુ બે દિવસ અતિભારે વરસાદની હવામાન વિભાગે આગાહી કરી છે. સૌરાષ્ટ્રમાં સામાન્યથી ભારે વરસાદ, જ્યારે ઉત્તર ગુજરાત અને મધ્ય ગુજરાતમાં પણ ભારે વરસાદની આગાહી કરવામાં આવી છે. તંત્ર દ્વારા 10 ઓગસ્ટ સુધી અધિકારીઓને સતર્ક રહેવા આદેશ કરવામાં આવ્યા છે. અધિકારીઓને પોતાનું હેડક્વાટર નહી છોડવા પણ સરકારે આદેશ કર્યો છે. તો આગાહીની અસર મોડી રાત્રીથી અમદાવાદ શહેરમાં જોવા મળી છે.