હવામાન / રાજ્યમાં મેઘમહેર યથાવત, 48 કલાક ભારે વરસાદની આગાહી

બનાસકાંઠા:

બનાસકાંઠામાં ધીમીધારે વરસાદ શરૂ થઇ ગયો છે. જીલ્લામાં છેલ્લા 24 કલાકથી ધીમીધારે વરસાદ પડી રહ્યો છે. પાલનપુર અને તેની આસપાસના વિસ્તારોમાં વરસાદ ચાલું છે અને હજુ આગામી 48 કલાક ભારે વરસાદની આગાહી કરવામાં આવી છે. તો બનાસકાંઠા અને રાજસ્થાનના સિરોહી તેમજ આસપાસના જિલ્લાઓમાં થઈ રહેલા ભારે વરસાદના કારણે બનાસકાંઠાના તમામ ડેમની જળસપાટીમાં સતત વધારો થઈ રહ્યો છે. બનાસકાંઠાના દાંતીવાડા ડેમની જળસપાટી 554.25 ફૂટે પહોંચી છે. તો ડેમની ભયજનક સપાટી 604 ફૂટ છે. ડેમમાં 872 ક્યુસેક પાણીની આવક થઈ રહી છે. તો બીજી તરફ સીપુ ડેમની જળસપાટી પણ 579.72 ફૂટે પહોંચી છે. સીપુ ડેમની ભયજનક સપાટી 611 ફૂટ છે. જો હજુ પણ ઉપરવાસમાં સતત વરસાદ ચાલુ રહેશે તો બન્ને ડેમની જળસપાટીમાં વધારો થઈ શકે છે અને ડેમમાંથી પાણી છોડવાની પણ ફરજ પડી શકે છે.

સાબરકાંઠા: 

સાબરકાંઠા જીલ્લામાં વહેલી સવારથી ધીમી ધારે મેઘરાજા મનમૂકીને વરસી રહ્યા છે. જીલ્લાના હિંમતનગર, ધનપુરા, ખેડ, રામપુર, જામ્મુડી સહિતના અનેક ગામમોમાં વરસાદી માહોલ છવાયેલો છે. જીલ્લામાં ગઇકાલ સવારથી અત્યાર સુધી ત્રણ ઇંચ વરસાદ નોંધાયો છે.

અરવલ્લી:

અરવલ્લીમાં ધોધમાર વરસાદ પડતા નદીઓમાં નવા નીર આવતા જળાશયોની જળ સપાટીમાં વધારો થયો છે. ભારે વરસાદ પડતા વાત્રક જળાશયમાં ૨ હજાર ૮૬૪ ક્યુસેક પાણીની આવક થઈ છે. તો મેશ્વો ૫૭૦ અને માજુમ ૨૫૦ ક્યુસેક પાણીની આવક થઈ છે.

અમદાવાદ:

આ તરફ અમદાવાદમાં સતત બે દિવસથી ધીમીધારે વરસાદ થઈ રહ્યો છે. સતત વરસાદ ચાલુ રહેવાના કારણે લોકોને પણ મુશ્કેલીનો સામનો કરવો પડ્યો હતો. નોકરી ધંધાર્થે જતા લોકો વરસાદી પાણીમાં ભિંજાયા હતા.

સૌરાષ્ટ્રમાં પણ વરસાદ યથાવત:

આ તરફ સૌરાષ્ટ્રમાં પણ વરસાદ યથાવત છે. જેના કારણે જળાશયોની સપાટીમાં સતત વધારો થઈ રહ્યો છે. રાજકોટ માટે જીવાદોરી સમાન ન્યારી 1 ડેમમાં પાણીની સતત આવકના કારણે ડેમની જળસપાટીમાં વધારો થયો છે. ડેમ ઓવરફ્લો થવામાં માત્ર અઢી ફૂટ બાકી છે. ગઈકાલે ડેમનો એક દરવાજો દોઢ ફૂટ સુધી ખોલવામાં આવ્યો હતો. ડેમની હાલની જળસપાટી 22. 60 ફૂટે પહોંચી છે અને ડેમમાં 1248 MCFT પાણીનો જથ્થો છે. આ સિઝનમાં જ ન્યારી 1 ડેમના દરવાજા બે વખત ખોલવામાં આવી ચૂક્યા છે. ન્યારી 1 ડેમમાંથી રાજકોટના પશ્ચિમ વિસ્તારને પીવાનું પાણી પુરુ પાડવામાં આવે છે.

સુરેન્દ્રનગર:

સુરેન્દ્રનગરમાં વિરામ બાદ ફરી એકવાર વરસાદનું આગમન થયું છે. આજે વહેલી સવારથી સુરેન્દ્રનગર અને વઢવાણ સહીત શહેરીના તમામ વિસ્તારોમાં ધીમી ધારે વરસાદની શરૂઆત થઈ છે. વરસાદ પડતા વાતાવરણમાં ઠંડક પ્રસરી છે.

ભારે વરસાદની આગાહી:

હવામાન વિભાગે ભારે વરસાદની આગાહી કરી છે. ત્યારે બનાસકાંઠામાં પણ સાર્વત્રિક વરસાદ જોવા મળ્યો છે. અમીરગઢ, દાંતા, દાંતીવાડા, ડીસા,પાલનપુર અને વડગામમાં મેઘરાજા મનમુકીને વરસી રહ્યાં છે. દાંતામાં 4 ઇંચ, અમીરગઢ 3 ઇંચ,પાલનપુરમાં 3 ઇંચ વરસાદ ખાબક્યો છે. તો દાંતીવાડામાં 2.5 ઇંચ,વડગામ 2.5 ઇંચ, લાખણી 2 ઇંચ વરસાદ પડતા નિચાણવાળા વિસ્તારમાં પાણી ભરાયા છે. પાણી ભરાતા લોકોને ભારે હાલાકીનો સામનો કરવાનો વારો આવ્યો છે.