મેહુલો / આણંદમાં મેઘરાજાએ ધડબડાટી બોલાવી: 4 કલાકમાં 7 ઈંચ વરસાદ, અનેક વિસ્તારો બેટમાં ફેરવાયા

• જાહેર માર્ગો ઉપર વરસાદી પાણી ભરાયા 
• રસ્તાઓ પરથી નદી વહેતી હોય તેવા દ્રશ્યો સર્જાયા
• વરસાદને કારણે રાહદારીઓ,વાહનચાલકો પરેશાન

રાજ્યમાં મેહુલો મન મુકીને વરસી રહ્યો હોય તેવું લાગી રહ્યું છે અનેજ જિલ્લાઓમાં સારો એવો વરસાદ નોંધાયો છે ત્યારે આણંદમાં પણ ધમાકેદાર વરસાદની શરૂઆત થઈ ચુકી છે. 

જાહેર માર્ગો ઉપર વરસાદી પાણી ભરાયા 

આજ સવારથી જાણે આણંદમાં આભ ફાટ્યું હોય એમ સવારે વરસાદ પડતા ચારો કોર પાણી છવાઈ ગયા હતા આણંદમાં સવારે 6 થી 10 વાગ્યા સુધીના 4 કલાકમાં 7 ઇંચ જેટલો વરસાદ ખાબક્યો હતો જેમાં 6થી 8 વાગ્યા સુધીમાં 5 ઇંચ અને 8થી 10 વાગ્યા સુધીમાં 2 ઇંચ જેટલો વરસાદ નોંધાયો છે. ભારે વરસાદને પગલે નીચાણવાળા વિસ્તારો બેટમાં ફેરવાયા છે અને રસ્તાઓ પર જાણે નદી વહેતી હોય એવાં દૃશ્યો જોવા મળી રહ્યાં છે.

રસ્તાઓ પરથી નદી વહેતી હોય તેવા દ્રશ્યો સર્જાયા

આણંદમાં ધોધમાર વરસાદ પડવાને કારણે કારણે અનેક વિસ્તારમાં પાણી ભરાઇ ગયા હતા જેથી પહેલા વરસાદમાં જ પાલિકાની પ્રિ-મોન્સૂનની કામગીરીની પોલ ખુલી ગઇ છે. રસ્તા પરથી પાણી ન ઓસરતા સ્મશાન યાત્રા પણ પાણી વચ્ચેથી કાઢવી પડે તેવી સ્થિતિ સર્જાઈ છે જેને લઇ તંત્રની પ્રિમોન્સૂનની કામગીરી પર પણ સવાલો ઉઠી રહ્યા છે.

વરસાદને કારણે રાહદારીઓ,વાહનચાલકો પરેશાન

આણંદમાં આજ સવારથી જ કેટલાક વિસ્તારોમાં વરસાદ ખાબક્યો હતો. ગુજરાતમાં સવારે 6 થી 8માં રાજ્યના 25 તાલુકામાં વરસાદ પડ્યો હતો. સૌથી વધારે આણંદમાં 7 ઈંચ વરસાદ ખાબક્યો હતો. છેલ્લા 4 કલાકમાં જ આણંદમાં 7 ઇંચ વરસાદ ખાબકી ચૂક્યો છે. તેમજ હજુ આગામી 3 કલાકમાં ભારે વરસાદની આગાહી કરવામાં આવી છે. સવારે બે કલાકમાં સુરતના ઓલપાડ 2.5 ઈંચ, સુરતના ચોરયાશીમાં અઢી ઈંચ, આણંદના પેટલાદમાં 1.5 ઈંચ અને બોટાદના બરવાળામાં અડધો ઈંચ  ખાબક્યો હતો. 

ગુજરાતમાં આગામી 26 કલાક ભારે 

ગુજરાતમાં આગામી 26 કલાક ભારે વરસાદ વરસી શકે છે. હવામાન વિભાગનું માનીએ તો આગામી 26 કલાક ભારે વરસાદ વરસી શકે છે. મધ્ય ગુજરાત અને સૌરાષ્ટ્રમાં ભારે વરસાદ વરસે તેવી શક્યતા છે.. જૂનાગઢ, ગીર-સોમનાથ, જામનગર, ભાવનગર અને અમરેલીમાં ભારે વરસાદની આગાહી કરવામાં આવી છે.. તો અમદાવાદ, ગાંધીનગર, વડોદરામાં પણ ભારે વરસાદ વરસી શકે છે.. આણંદ, નડિયાદ, ખેડા, ભરૂચ, નવસારી, ડાંગ અને છોટાઉદેપુરમાં ભારે વરસાદ વરસવાની શક્યતા છે..  રાજ્યમાં 26 કલાક બાદ વરસાદનું જોર ઘટી શકે છે. જોકે દક્ષિણ ગુજરાતમાં વરસાદ રહેશે..