અમદાવાદ શહેરમાં મોડી રાત્રે શહેરના તમામ વિસ્તારમાં સાર્વત્રિક વરસાદ ખાબક્યો
અમદાવાદમાં ગાજવીજ સાથે વરસ્યો વરસાદ
બોડકદેવ,થલતેજ,માનસી સર્કલ વિસ્તારમાં વરસાદ
શિવરંજની,જોધપુર અને સેટેલાઇટ તેમજ એસ.જી હાઇવે પર વરસાદ
હવામાન વિભાગે 5 દિવસ અતિભારે વરસાદની આગાહી કરી છે ત્યારે અમદાવાદમાં છેલ્લા એક દિવસ વરસાદી વાતાવરણ બન્યું છે પણ અત્યાર સુધી શહેરના અમુક વિસ્તારમાં જ વરસાદ પડ્યો હતો. પરંતુ હાલ શહેરમાં ધોધમાર વરસાદ ખાબકી રહ્યો છે. લાંબાસમય બાદ ધમાકેદાર વરસાદ વરસાતા શહેરિજનો પ્રફુલ્લિત થઈ ઉઠયા છે તો બીજી તરફ ભારે વરસાદના પગલે રોડ પર ટ્રાફિક જામના દ્રશ્યો સર્જાયા છે. કડાકા ભડાકા સાથે અવિરત વરસી રહેલા વરસાદને લીધે અંડરપાસ બ્રિજમાં પાણી ભરાઈ જવાની વકી છે તો બીજી તરફ સુસવાટા સાથે જોરદાર પવન ફુંકાતા શહેરના રસ્તા પર ઝાડ પાડવાની પણ ઘટનાઓ સામે આવી રહી છે. આમ તો હાલ શહેરમાં સાર્વત્રિક વરસાદ પડી રહ્યો છે. જેમાં સૌથી વધુ સેટેલાઈટ,જજીસ બંગલો,વસ્ત્રાપુર,શિવરંજની, થલતેજ,વેજલપુર,સરખેજ,નારોલ, ઘાટલોડિયા,ઈસનપુર,વટવા માં વરસાદ ધડબડાટી બોલાવી રહ્યો છે. ઘણા વિસ્તારોમાં પાણી ભરાવાથી પણ સમસ્યા સર્જાતાં તંત્રની પ્રિ મોન્સુનની કામગીરી સામે પણ સવાલ ઊભા થઈ રહ્યા છે.
અન્ય જિલ્લામાં પણ વરસાદની ધમાકેદાર ઈનિંગ
આ સિવાય રાજયમાં વલસાડ, નવસારી,સુરત તેમજ સૌરાષ્ટ્રમાં જૂનાગઢ અમરેલી, ગિરસોમનાથમાં વરસાદે ધમાકેદાર બેટિંગ કરી છે. રાજ્યમાં 200થી વધુ તાલુકામાં આજે વરસાદે પધરામણી કરી છે ત્યારે ખેડૂતોના પાકને નવજીવન મળ્યું છે તો શહેરમાં વસવાટ કરતાં લોકોને ભારે બફારામાંથી રાહત મળી છે. લો પ્રેસર સિસ્ટમ સર્જાતાં ગુજરાતમાં હજુ પણ 5 દિવસ માધ્યમથી ભારે વરસાદની આગાહી છે ત્યારે દુકાળની ભણકારા વચ્ચે ખાલીખમ પડેલી નદી અને ડેમમાં વરસાદી પાણીની આવક થઈ છે, નાના નાળા છલકાઈ ચૂક્યા છે, ખેતરમાં વરસાદી પાણીના ભરાવા થઈ રહ્યા છે.
વલસાડમાં સતત બીજા દિવસે પણ વરસાદી મોહાલ જામેલો જોવા મળી રહ્યો છે. ઉમરગામમાં 36 કલાકની અંદર 18 ઈંચ જેટલો વરસાદ પડ્યો છે. જેના કારણે નિચાણવાળા વિસ્તારમાં રહેતા લોકોના ઘરમાં પાણી ઘુસી ગયા છે. સાથેજ સમગ્ર ગામમાં જળબંબાકાર જેવી સ્થિતી જોવા મળી રહી છે. જૂનાગઢના માળીયા હાટીનામાં પણ મેઘરાજા આજે મનમૂકીને વરસ્યા છે,. સમગ્ર વિસ્તારમાં શરેરાશ 3 ઈંચ વરસાદ પડ્યો જેના કારણે અહીયાના સુકાઈ રહેલા પાકોને પણ નવું જીવન મળ્યું છેગીર સોમનાથના તલાલામાં આજે 6 ઈંચ વરસાદ નોંધાયો છે. સાથેજ જૂનાગઢના માળિયામાં 5.5 ઈંચ વરસાદ પડ્યો છે. ઉનામાં 4 ઈંચ જેટલો વરસાદ નોંધાયો છે. ગીર ગઢડામાં 3.5 ઈંચ અને કેશોદમાં અઢી ઈંચ વરસાદ નોંધાયો છે. કલ્યાણપુરમનાં સવા 2 ઈંચ અને ગોંડલમાં 2 ઈંચ વરસાદ નોંધાયો છે. મહુવામાં અને કોટડા સાંગાણાીમાં પણ 2 ઈંચ વરસાદ નોંધાયો છે. વેરાવળ, તાલાળા, સૂત્રાપાડા, કોડિનાર અને ઉનામાં વરસાદ જોવા મળ્યો છે. ઉપરાંત ગીરગઢડા પંથકમાં વરસાદ પડતા અહીયાના ખેડૂોતમાં ખુીશનો માહોલ જોવા મળ્યો હતો. કોડિનાર, સુત્રાપાડામાં 1.5 ઈંચ વરસાદ પડ્યો જેના કારણે બજારોમાં પાણી વહેતા થઈ ગયા છે.
કયા જિલ્લાઓમાં વરસાદની આગાહી?
અમદાવાદ, ગાંધીનગર, સુરત
અમરેલી, ભાવનગર, રાજકોટ
તાપી, ડાંગ, વડોદરા
આહવા, નવસારી, વલસાડ
નડિયાદ, ખેડા
મહેસાણા, સાબરકાંઠા
બનાસકાંઠા, અરવલ્લી, મોડાસા
આ વિસ્તારોમાં બે દિવસ સુધી મધ્યમથી ભારે વરસાદ પડે તેવી સંભાવના છે.