અનરાધાર / અમદાવાદમાં ફરી કડાકા-ભડાકા સાથે પહોંચ્યા મેઘરાજા, શહેરના અનેક વિસ્તારોમાં ભારે વરસાદ

• અમદાવાદમાં ફરી જામ્યો વરસાદી માહોલ
• આજે પણ અમદાવાદમાં ગાજવીજ સાથે વરસાદ
• શ્યામલ, એસ.જી.હાઈવે વિસ્તારમાં વરસાદ

લાંબા દિવસના ઉકળાટ બાદ ગઈકાલ શનિવારથી અમદાવાદમાં મેઘાવી માહોલ જામ્યો છે. ગઇકાલની માફક આજે રવિવારે પણ ઢળતી સાંજના સમયગાળા દરમિયાના મેઘરાજાએ તોફાની બેટિંગ આરંભી હતી. પવનના સુસવાટા અને વીજળીના કડાકા ભડાકા વચ્ચે મેઘાનું આગમન થયુ હતું. આજે અમદાવાદમાં ગાજવીજ સાથે  શ્યામલ, એસ.જી.હાઈવે વિસ્તાર, વેજલપુર, બોડકદેવમાં વરસાદી માહોલ જામ્યો હતો. ભારે વરસાદને લઈને નીચાણવાળા વિસ્તારોમાં પાણી ભરાયા હતા.

અમદાવામાં ભારે બફરા બાદ વરસાદ
આજે અમદાવામાં ભારે બફરા બાદ આંધી જેવી સ્થિતિ વચ્ચે પશ્ચિમ અને પૂર્વ વિસ્તાર સહીત મોટા ભાગના વિસ્તારમાં વરસાદ વરસ્યો હતો. ભારે વરસાદને અનેક જગ્યાએ ટ્રાફિક જામના દ્રશ્યો પણ જોવા મળ્યા હતા અને માર્ગો પર પાણી ભરાયા હતા. તો બીજી તરફ ભારે ઉકળાટ વચ્ચે વાતાવરણમાં ઠંડક પ્રસરતા લોકોએ રાહત અનુભવી હતી.

હવામાન વિભાગ દ્વારા 5 દિવસ વરસાદની આગાહી
હવામાન વિભાગ દ્વારા રાજ્યમાં આગામી 5 દિવસ વરસાદની આગાહી કરવામાં આવી છે. જેને લઇને રાજ્યભરમાં વરસાદી માહોલ પણ જામ્યો છે. કચ્છ, સૌરાષ્ટ્ર અને દક્ષિણ ગુજરાતમાં વરસાદને લઈને ખેડૂતોને પણ સોનેરી આશા બંધાઈ છે. બંગાળમાં લો પ્રેશર સર્જાવાને કારણે વરસાદની સંભાવના વ્યક્ત કરાઇ રહી છે. દક્ષિણ ગુજરાતમાં 13 તારીખે ભારે વરસાદની વકી છે. જ્યારે વલસાડ, નવસારી, દમણ, નર્મદા, ભરૂચમાં ભારે વરસાદની આગાહી કરવામાં આવી છે. ગાજવીજ સાથે સમગ્ર ગુજરાતમાં અતિભારે વરસાદની  હવામાન વિભાગ દ્વારા આગાહી કરાઇ છે.