આગાહી / અંબાલાલ પટેલ અને હવામાન વિભાગે ગુજરાતમાં વરસાદને લઇને કરી આ આગાહી

• રાજ્યમાં અનેક વિસ્તારોમાં ધોધમાર વરસાદ
• હવામાન વિભાગે કરી વરસાદની આગાહી
• અંબાલાલ પટેલના મતે 29 જૂનથી શરૂ થશે ચોમાસું

ગુજરાત પર મેઘરાજા મહેરબાન રહેશે. સતત પાંચ દિવસ સુધી રાજ્યને વરસાદ ઘમરોળતો રહેશે. રાજ્યમાં આગામી પાંચ દિવસ સુધી વરસાદી માહોલ યથાવત રહેશે. સૌરાષ્ટ્ર, મધ્ય ગુજરાત તેમજ ઉત્તર ગુજરાત ભારેથી હળવો વરસાદ ખાબકશે. આગામી 5 દિવસ સુધી રાજ્યના મોટાભાગના શહેરોમાં ભારે પવન સાથે વરસાદ વરસી શકે છે. 

ગુજરાતમાં વરસાદની અંબાલાલ પટેલની આગાહી   

ગુજરાતમાં વરસાદ વિશે અંબાલાલ પટેલે કહ્યું કે, જૂન 8થી 11માં ગાજવીજ સાથે ગુજરાતમાં વરસાદ થશે. ગુજરાતમાં જૂન 11થી 17 સુધી ચોમાસું બળતર બનશે. જૂન 10થી 12 વચ્ચે ગુજરાતમાં કેટલાક ભાગમાં ભારે વરસાદ વરસશે. જૂન 14-15-16માં ભારે વરસાદ અને પવન ફૂકાશે. મુખ્ય ચોમાસું 29 જૂનની આસપાસ શરુ થશે.

ગુજરાતમાં વરસાદની હવામાન વિભાગની આગાહી

હવામાન વિભાગ અનુસાર, આગામી 5 દિવસ રાજ્યમાં વરસાદી માહોલ રહેશે. બે દિવસ સૌરાષ્ટ્રમાં ભારે વરસાદ વરસી શકે છે. ત્યારબાદ ઉત્તર ગુજરાત, મધ્ય ગુજરાત, દક્ષિણ ગુજરાત અને સૌરાષ્ટ્રમાં વરસાદ રહેશે. ગુજરાતમાં 10 અને 11 જૂને ભારે વરસાદની આગાહી કરવામાં આવી છે. જેમાં અમરેલી, ભાવનગર, બોટાદ, રાજકોટ, દ્વારકા, જામનગર, મોરબી, સુરેન્દ્રનગર, કચ્છ, અમદાવાદ, ગાંધીનગર, મહેસાણા, પાટણ, સાબરકાંઠા, ખેડા, ડાંગ, તાપી, દાહોદમાં ભારે પવન સાથે વરસાદ પડવાની સંભાવના છે.

ઉલ્લેખનીય છે કે, હવામાન વિભાગની આગાહી પ્રમાણે રાજ્યના મોટાભાગના જિલ્લાઓમાં વરસાદ પડી રહ્યો છે. ત્યારે અમદાવાદમાં પણ અનેક વિસ્તારમાં વરસાદ પડ્યો હતો. અસહ્ય ઉકાળા બાદ અચાનક વાતાવરણમાં પલટો આવ્યો હતો અને વરસાદ ખાબક્યો હતો. રાજ્યના અનેક વિસ્તારોમાં ભારે પવન સાથે વરસાદ ખાબક્યો હતો.